Рейдті ұйымдастырушылар көпшілік көп жүретін «Рахмет» супермаркетін тексерді. Онда әлеуметтік бірінші сұрыпты нанның бағасы 75 теңгеден сатылып жатыр. Одан кейін тексерушілер тобы «Шапағат» супермаркетіне ат басын тіреді. Мұнда да әлеуметтік нанның бағасы 75 теңгеден сатылуда. «Жауғашты» базары жанындағы әлеуметтік дүкенде нан ғана емес, картоп, сәбіз, қарақұмық бағасы да базардан әлдеқайда арзан екен. Облыс әкімдігінің бастамасымен ашылған он төрт әлеуметтік дүкеннің сегізі қалыпты жұмыс істеп тұр. Алдағы уақытта барлығы іске қосылмақ. Бұл дүкендерде бірінші сұрыпты нан ғана емес, әлеуметтік сұранысқа ие 19 түрлі азық-түлік бағасы базардағы бағадан төмен. Тұрақтандыру қоры мен тиісті мекемелер Қостанай облысымен келісіп, бидайды төмен бағамен сатып алып, қаладағы нан өндіретін наубайханалармен бағаны тұрақты ұстап тұруға уағдаласқан көрінеді.
Түркістан облыстық тұрақтандыру қорының директоры Марал Марасиловтың айтуынша, қаланың 80 пайызын нан өнімдерімен қамтамасыз ететін «Ақжол» ЖШС-мен келісіп, тәулігіне екі мың бөлке нанды арзан етіп елдің дастарқанына жеткізуде. Бұл жұмыс барлық ауданда жүргізілуде.
Түркістан қаласының 80 пайызын отыз түрлі нан өнімімен қамтамасыз ететін «Ақжол» ЖШС-нің өндіріс директоры Нәсиба Атаева әлеуметтік нан бағасын түсіруге Тұрақтандыру қорымен келісімшарт келесі жылы жаңа бидай жиналғанға дейін жасалғанын алға тартады.
Алдағы уақытта басқа да әлеуметтік маңызы бар азық-түлік өнімдерінің бағасын тұрақтандыру мақсатында Түркістан облысының азық-түлік дүкендеріне, сонымен қатар әлеуметтік нан өнімдерін шығаратын қайта өңдеу кәсіпорындарына диірмендер, наубайханаларға несие беру мәселесі қарастырылуда.
Бұған Түркістан облысы әкімінің орынбасары Мейіржан Мырзалиев басқаратын комиссия жауап береді. Комиссияның бірнеше отырысы өткізіліп, қалада азық-түлік бағасын тұрақтандыру бойынша тиісті мекеме басшыларына нақты тапсырма берілді. Нәтижесінде Тұрақтандыру қорының жанынан қажетті азық-түлік қоры жасақталды. Оған күріш, қарақұмық, май, тұз, ет өнімдері кірді. Көпшілік сұранысына орай халық көп шоғырланған аудандарда кәсіпкерлермен бірлесіп тағы да әлеуметтік дүкендер қатарын көбейту жоспарланып отыр. Делдалдар мен алыпсатарлыққа жол бермеу үшін әрі өнім сапасына қоғамдық бақылау жүргізу мақсатында әлеуметтік дүкендерге де онлайн касса аппараттары орнатылады.
Ескендір ЕРТАЙ,
журналист
ТҮРКІСТАН
