Аймақтар • 08 Қараша, 2019

«Egemen Qazaqstan»-ның ғасырлық тойы Алматыда аталып өтті

235 реткөрсетілді

Еліміздің 100 жылдық жылнамасы, бас басылым, қазақ баспасөзінің қарашаңырағы «Egemen Qazaqstan» газетінің ғасырлық мерейтойына арналған іс-шаралар топтамасы Ұлттық кітапханадағы ауқымды шарамен жалғасын тапты. Басылым мерейтойының Ұлттық кітапханада өткізілуінің өзіндік себебі бар.

100 жылдық жылнаманың сақталған орны да, тарихының сканерден өткізіліп, цифрлы архивінің жасалған жері де осы қасиетті оқу ордасы. Конференцияға келген қонақтар алдымен «100 жыл – 100 газет» атты арнайы ұйымдастырылған көрмені тамашалады. 1919 жылы 17 желтоқсанында 20 жастағы Бернияз Күлеевтің өлеңімен басталып жарық көрген  «Ұшқын» газетінің 1-номерінен бастап әр жылдардағы «Еңбек туы», «Еңбекшіл қазақ», «Еңбекші қазақ», «Социалды Қазақстан», «Социалистік Қазақстан», «Егеменді Қазақстан», «Егемен Қазақстан» болып бірнеше рет өзгерген елдің ең басты басылымының әр жылдардағы тігіндісі жұрт назарына ұсынылды.

Жиынға келген қонақтарға алдымен деректі фильм көрсетіліп, онда қызмет істеген қазақтың ірі мемлекет қайраткерлері мен көрнекті тұлғаларының қлы мұраты мен еңбегіне қысқа шолу жасалды. Бұдан кейін Алматы қаласы  әкімі Бақытжан Сағынтаев сөз алып, мерейтой қуанышына жиылған қауымды еліміздің әрбір азаматына етене таныс, республиканың маңдайалды іргелі басылымы «Egemen Qazaqstan» газетінің 100 жылдық мерекесімен құттықтады. «Көрмені тамашалап, естігеніміздей, бүгін «Егеменнің» 29 696 нөмірі жарық көріп отыр екен. Құтты болсын! Ғасырлық тарихы бар бұл газетті қолына ұстаған кез келген жан ондағы әрбір ақпараттың шынайылығына, көтерген тақырыбының маңыздылығына кәміл сенеді. Себебі мемлекеттік мүдде мен журналистік мұратты тең ұстайтын басылымның кәсіби деңгейі, ұстанған бағыты ешқашан өзгерген емес. Сондықтан да тарихы терең, таралымы кең басылымға Елбасымыз Н.Назарбаев «Отанымыздың бас газеті» деп лайықты бағасын берсе, Мемлекет басшысы Қ.Тоқаевтың күнделікті шолу жасайтын газеттерінің арасында аға басылым көш басында тұр. Бір кезеңде Смағұл Сәдуақасов, Жүсіпбек Аймауытов, Тұрар Рысқұлов, Ораз Жандосов, Мұхтар Әуезов сияқты Алаш арыстары тізгінін ұстаған басылым күні бүгінге дейін өзінің бағыт-бағдарын мемлекект мүддесіне, ел игілігіне арнап келеді. Әлемдік ғалам, саясат пен экономика, әдебиет пен мәдениет, спорт пен туризм айдарлары бойынша тың ақпарат, келелі ой таратқан басылым парақтарында жаңашылдық пен дәстүрлі сабақтастық ұрпақтар жалғастығының ізі сайрап жатыр»,деді қала әкімі.

Бақытжан Әбдірұлы құттықтап қана қоймай, басқа да сый-сияпатын ала келгенін айтып, бірнеше ардагер тілшіні Алғыс хатпен марапаттады. Әкім марапаттаған «егемендіктер» арасында Нұрлан Оразалин, Сарбас Ақтаев, Дархан Қыдырәлі, Аян Нысаналин, Уахап Қыдырхан, Мамадияр Жақып бар.

Жиынға қатысушыларды құттықтаған «Egemen Qazaqstan» газетінің Басқарма төрағасы Дархан Қыдырәлі, бұл тек бір газеттің ғана мерейтойы емес, тұтас қазақ баспасөзінің мерекесі екенін атап өтті. Ол Абайдың кіндік қаны тамған Жидебайдан бастау алған басылым мерейтойының жыл бойы аталып өтіліп, бүгін Алматыда жалғасын тауып, алдағы күндері Нұр-Сұлтан қаласында түйінделгенге дейін өткізілетін әр түрлі мазмұндағы маңызды шаралар легінің ілкі сәт толастамағанын айтты. «Біз бұл күнді «Тағзым күні» деп атадық. «Егеменнің» тағдыры да, тарихы да Алматымен тығыз байланыстты. «Egemen Qazaqstan» 70 жыл бойы Алматыда жарық көрді. Еңбек еткен ардагер тілшілер, газетті шығаруға атсалысқан өмірден өткен байырғы қызметкерлердің ұрпақтары бүгін арамызда отыр. Алматы қаласы әкімдігінің Әбіш Кекілбаев пен Шерхан Мұртазаның рухына да айырықша құрмет көрсетіп, лайықты ұлықтай алғаны үшін алғысымызды білдіреміз», деді Басқарма төрағасы Д.Қуандықұлы. Сондай-ақ Д.Қуандықұлы бірнеше «егемендікті» – Н.Оразалин, С.Ақтаев, М.Жақып, Ө.Айтбайұлы, У.Қыдырхан, А.Нысаналин, Г.Сәдірқызын  төсбелгімен марапаттады.

Салттанатты жиын үстінде Ұлттық кітапханамен бірге жүзеге асырылып, сәтті аяқталған ауқымды жоба –100 жылдық жылнаманың цифрлы нұсқасы жинақталған 5 томдықтың тұсаукесер рәсімі де атқарылды. Жаңа кітаптың лентасын Алматы әкімі Б.Сағынтаев, белгілі қаламгерлер Н.Оразалин, Б.Нұржекеұлы, Д.Қыдырәлі қиып, жиынақтың сүйінші данасын Ұлттық кітапхана мен қала әкімдігіне тарту етті.

Алматы қаласы әкімдігінің басшылары, белгілі қоғам қайраткерлері, ғалымдар, баспасөз өкілдері мен кітапхана оқырмандары қатысқан жиында дәстүрлі ән өнерінің шеберлері Ерлан Төлеутай, Саят Нұрғазин ән шырқап, М.Әуезов атындағы драма театрының әртісі Жанат Тыныбаев Міржақып Дулатовтың «Елім-ай» өлеңін оқыды. Жиынға қатысқандардың баршасы ұлтқа тұтқа болған ұлағатты басылымның 1000 жасаған шаһармен бірге ұзақ жасай беруіне тілек қосып, көңіл хошын білдіріп тарқасты.

Соңғы жаңалықтар

Күлкі керуені № 15

Руханият • Бүгін, 09:53

Кішкене оқырмандарға естелік

Руханият • Бүгін, 07:26

Мәлік өнегесі – мәңгілік

Аймақтар • Бүгін, 07:21

Ойқала оғланы

Аймақтар • Бүгін, 07:18

Әлем кубогы кімге бұйырады?

Күрес • Бүгін, 07:10

Сан-Марино да гол салды

Футбол • Бүгін, 07:07

Сортаң жер шаруашылық соры

Экология • Бүгін, 06:57

Қаратау неге қаһарлы?

Қоғам • Бүгін, 06:32

«Ел үміті» сенім ұялатты

Аймақтар • Бүгін, 06:25

Дамуы даусыз елдің халқы қамсыз

Парламент • Бүгін, 06:16

Өндірісі өскелең өңір

Үкімет • Бүгін, 06:14

Күмәні көп «Көкжайлау»

Экономика • Бүгін, 06:00

Егемендіктер елге шықты

Қазақстан • Кеше

Футзал: «Қайрат» есе қайтарды

Спорт • 16 Қараша, 2019

Футзал: «Қайрат» ұтылды

Спорт • 16 Қараша, 2019

Ұқсас жаңалықтар