1 желтоқсан – Тұңғыш Президент күнімерекесіне орай Алматы облысының Алакөл ауданының бір топ тұрғыны осы бағдарлама арқасында баспанаға қол жеткізді. Яғни, Алакөл ауданында 13 отбасы бір күнде жаңа пәтердің кілтін алып, қоныс тойын тойлады. Бұл үйлер «Бақытты отбасы» бағдарламасы аясында көпбалалы аналарға, «Алтын алқа» және «Күміс алқа» иегерлеріне берілді.
- Мемлекет басшысы мен облыс, аудан әкіміне көптеген отбасына тұрғын үй мәселесін шешуге көмектескендері үшін алғыс айтамыз. Жаңа баспаналы болуды армандаған барша отбасы көп ұзамай қоныс тойын тойласын, - дейді жаңа қоныс иесі, «Бақытты отбасы» бағдарламасына қатысушы К.Мәулетхан.
Айтпақшы,«Бақытты отбасы» бағдарламасына қатысу мүмкіндігі берілген тамыз айынан бері, жұрттың сенімі нығайып, төменгі процентпен үй алуға ынталылар қатары облыс аумағында күрт өсті. Оның ішінде бағдарлама шарапатын көргендердің қатары жыл соңына дейін еселеп көбеймекші. Алакөл ауданында баспаналы болған 19 отбасы соған дәлел.
Сондай-ақ, өңірде «Нұрлы жер» мемлекеттік бағдарламасы аясында да тұрғын үймен қамту жолға қойылған. Былтыр осы бағдарлама бойынша барлығы 80 тұрғын үйдің кілттері кезекте тұрған азаматтарға берілсе, жыл соңында бұл шара тағы жалғасын таппақ.
