Абзал САРИЕВ,
Сыртқы істер министрлігі Инвестиция комитетінің Әкімшілік және құқықтық жұмыс басқармасының үшінші хатшысы:
Жастар жылының жабылуына арналған салтанатты жиында Мемлекет басшысы Қасым-Жомарт Тоқаевтың: «Мына шындықты есте ұстау керек: Елдің тәуелсіздігін, оның аумақтық тұтастығын халықаралық ұйымдардың дауыс беруімен емес, ақылмен, сауатты жүргізілген ішкі және сыртқы саясат арқылы сақтау керек. Халық өзінің тәуелсіздігін күшті, татулықты ту еткен мемлекеттің аясында ғана сақтай алады. Сондықтан ең бастысы – Тәуелсіз Қазақстанның іргетасын әлсіретпеу», деген сөзі маған қатты әсер етті. Мұны барша қазақстандық жас үнемі есте ұстауы керек.
Сонымен қатар Жастар жылында көптеген игі іс атқарылғанын айтқым келеді. Өскелең ұрпақты қолдау мақсатында баспанамен жəне жұмыспен қамту, сапалы əрі қолжетімді білім беру ісі қолға алынды. Мәселен, ірі шаһарларда еңбек етіп жүрген жастарға 9 мың пәтер берілмек. Оны жалға алу құны айына 15 мың теңге ғана. Мұндай баға тіпті шалғай аудандарда да жоқ шығар.
Қазақстанның келешегі – жастар. Яғни, ел тәуелсіздігін сақтау, аумақтық тұтастығы мен тұрақтылығын қамтамасыз ету де жастардың міндеті. Сондықтан әлеуметті, егемен, біртұтас мемлекетті сақтап қалу үшін Тәуелсіз Қазақстанның іргетасын берік ұстауымыз қажет.
Біздің жастарымыз – өте талантты. Олардың жетістіктеріне бүгінде әлем елдері таңданады. Таяуда ғана Нью-Йоркте концерт берген Димаш Құдайберген төрткүл дүниені мойындатты. Осындай жетістіктер Қазақстан атауын биікке шығара беретіні анық. Ол үшін замандастарымды талмай еңбектенуге шақырамын.
Жадыра БАЙБҰЛАНОВА,
ақын, «Дарын» сыйлығының лауреаты:
Тарихқа үңілсек, елімізге – тұтқа, егемендігімізге тұғыр болған – жалынды жастар. Әріге көз салсақ, бәтуалы биіміз Қаз дауысты Қазыбек би он төрт жасында елін даудан, жерін жаудан қорғап, шаршы топта қаймықпай сөз бастапты. Үш жүздің басын қосқан Абылай хан жиырма жасында жауына жайдақ шауып, ұлы ерлік жасағаны есімізге түседі. Одан беріде, «Қараңғы қазақ көгіне, өрмелеп шығып күн болған» Сұлтанмахмұт, «Мен жастарға сенемін» деген Мағжан да Алаштың ақ таңын аяулы ақын-жүрегімен жастық шақтарында жырлаған. Тағылымды тарихымызды зерделеген Шоқан да отызға жетпей-ақ орасан зор еңбек атқарыпты. Мұндай мысалдар өте көп.
Ойлап қарасақ, кемеңгер бабаларымыз осынау өнегелі істерін дәл қазіргі біздің жасымызда-ақ жасаған! Бабалар ізін жалғаған бүгінгі жас буын «мен мемлекет үшін қандай іс атқардым?» деген сұраққа толғанар болса, келешегіміздің кемел болары сөзсіз. Сондықтан Жастар жылын қорытындылағанда, әр адам бұл жыл маған не берді деп емес, мен елге не бердім деп есеп беруі тиіс сияқты. Десек те, Жастар жылы осымен тәмамдалды деу – ағаттық. Елдің болашағы – жалынды жас ұрпақ десек, әлеуетімізді арттырып, абыройымызды асқақтатар алдағы әр жылды – жастар жылы деп есептеймін.
Айдар Мұхамбетов,
Л.Н.Гумилев атындағы Еуразия ұлттық университетінің студенті:
Қазір студенттерге берілетін мемлекеттік шәкіртақы 20 мың теңгенің айналасында. Жаңа жылдан бастап, Президенттің тапсырмасымен айына 25 мың теңгедей төленетін болды. Оқуым тегін, жатақханамен қамтылсам да, 20 мың теңге бірде жетсе, бірде жетпей қалатыны белгілі. Ай сайын шотымызға ақша салып отырған ата-аналарымыз үшін 5 мың теңгенің өзі үлкен көмек. Жыл сайын тамақ пен киім-кешек құны тұрақты қымбаттап отырғанын ескерсек, Үкімет біз секілді ақшасын негізінен тамақтану мен киінуге жұмсайтын жастарды кезекті рет демеп отыр. Анау айтқандай көп қаражат болмағанымен, символикалық жағынан бұл мемлекеттің жастарды, соның ішінде студенттерді ұмытпайтынын көрсеткендей. Жастар жылы аясында тек көпшілік мерекелік шаралар мен форумдар ұйымдастырылып қана қоймай, жастардың өздері үшін пайдалы шешімнің қабылданғанына ризашылығымызды жасырмаймыз. Менің ойымша, Президенттің тапсырмасы студенттерге мемлекет тарапынан материалдық көмекті көбейтуге бастама болуы керек. «Ер тоқымы алтыннан жасалса да, шәкіртке көмектес» дегендей, жастардың терең білімді және жан-жақты болып қалыптасуы үшін оларға көрсетілген көмек ешқашан артық болмайды.
Бижан САДЫБЕКОВ,
Шымкент қаласы бойынша Жастар ресурстық орталығы «Қоғаммен байланыс және ақпараттық талдау» бөлімінің басшысы:
2019 жыл – жастар үшін жағымды болды деп айтуға толық негіз бар. Тұңғыш Президент – Елбасы Нұрсұлтан Назарбаевтың бастамасымен Жастар жылы жарияланып, Үкімет оны жүзеге асырудың Жол картасын қабылдаған еді. Соған сәйкес, жастарды қолжетімді баспанамен қамтамасыз ету, білім алу, жұмыспен қамту, бизнесті дамыту, жас отбасын қолдау сынды шаралар қарастырылды.
Қазіргі таңда Шымкент қаласында 264 мыңнан аса жас бар. Олар жалпы қала халқының 26 пайызын құрайды. Жастар саясатын үйлестіру мақсатында Жастар ресурстық орталығы жан-жақты қолдау білдіріп, олардың бастамаларын жүзеге асыру бағытында қызмет көрсетеді.
Орталықта мемлекеттік бағдарламаларды насихаттау, түсіндіру жұмыстары жүргізіліп келеді. Атап айтар болсақ, жұмыссыз жастарға қолдау көрсету және өз кәсібін ашуға мүмкіндік беретін «Жас кәсіпкер», «Бастау бизнес», қысқа мерзімді кәсіптік оқыту жобалары бар. Сонымен қатар еңбек өтілі жоқ ЖОО түлектері үшін қолға алынып жатқан «Жастар тәжірибесі» және қоғамдық жұмыс пен әлеуметтік жұмысқа арналған жобалар да маңызға ие.
Осылайша Жастар жылы шырайлы Шымкент шаһарының жастары үшін жағымды жаңалықтармен аяқталды. Мемлекет басшысының Жарлығы бойынша келер жыл Волонтер жылы деп жарияланды. Бұл саланың да жастарға қатысы бар екенін ескерсек, 2020 жылдан күтер жаңалығымыз көп.
Жастар жылының жабылу салтанатында Президент Қасым-Жомарт Тоқаевтың өз қолынан Алғыс хат алдым. Бұл – еңбегімнің бағалануы ғана емес, маған артылған үлкен сенім деп есептеймін. Ел үшін еңбек етуді жалғастыра беремін.
Бекзат СМАҒҰЛОВ,
«Дарын» сыйлығының лауреаты:
Жастар еліміздің ертеңі, ұлтымыздың болашағы, мемлекетіміздің мәртебесі екені белгілі. Ата-бабамыз «Ерім дейтін ел болмаса, елім деген ер қайдан болсын?» деп айтып кетті. Қазіргі таңда Қазақстанда ерім дейтін ел де, елім дейтін ер де бар. Бұған мысал 2019 жылдың Жастар жылы деп жариялануы. Осы кезеңде өскелең ұрпақты қолдау үшін көптеген жұмыс атқарылды. Жастардың жағдайын жасау үшін нақты шаралар қабылданды.
Таяуда «Дарын» сыйлығын иелендім. 1991 жылдан бері беріліп келе жатқан бұл сыйлық өнер және мәдениет қайраткерлерін марапаттауға, оларды құрметтеуге арналды. Бұған дейін еліміздің елеулі, халқымыздың қалаулы көптеген азаматы осы марапатқа ие болды. Соның қатарынан көрінгеніме өте қуаныштымын. Әрине, бұл жүлде ғана емес, маған артылған үлкен жауапкершілік деп білемін. Алдағы уақытта бойдағы бүкіл қарым-қабілетімді елімнің дамуына, мәдениетіне, әдебиетіне, өнеріне арнап, өз үлесімді қосу үшін тер төгуді жалғастыра беремін.
Тәуелсіздік күнінің қарсаңында өткен Жастар жылының жабылу салтанатының маңызы ерекше. Мұндай шаралар еліміздің түкпір-түкпіріндегі жастарды таныстырады. Бұл бірлікке, ынтымаққа бастайды. Ортақ жобалар жасап, ел дамуына үлес қосуға мүмкіндік береді.
