Әсіресе жеке сектор тұрғысынан алғанда тың серпін бермек. Мәселен кадрлық резервке енген жастардың 30 пайызға жуығы жеке секторда, халықаралық компанияларда жұмыс істеген немесе әлі күнге дейін сонда жұмыс істейді. Алда-жалда олар мемлекеттік қызметке келіп жатса, тәжірибесі мен біліктілігін еліміздің ертеңіне жұмсап, халқымыздың болашағы жолында тер төкпек.
Ал жастарға келсек, бағдарламаның оларға да пайдалы екені анық. Яғни біз жеке идеяларымызды ұсынып, тәжірибемізбен бөлісуге зор мүмкіндік алдық. Сондай-ақ бастаманы «әлеуметтік лифт» ретінде де қарастыруға болады. Жоғары лауазымға жету үшін мемлекеттік қызметте еңбек өтілі қажет. Ал кадрлық резерв арқылы бірден басқарушылық лауазымға тағайындалуға жағдай жасалған. Осы арқылы салаға қандай да бір өзгеріс енгізуге мүмкіндік туады. Бұл резервке енген жастардың алдағы жұмыс мансабына оң ықпал ететіні анық.
Президенттің кадрлық резервіне сынақ барысы алты кезеңнен тұрды. Оның төртеуі онлайн режімде жүргізілді. Екеуінде сарапшылармен бетпе-бет кездесіп, әңгімелестік. Бұл – бұрын-соңды болмаған тәжірибе деп ойлаймын. Өйткені Мемлекеттік басқару академиясы, сондай-ақ Talantiz, SHL деген дүниежүзіне мәлім компаниялардың жинаған әдістемесін пайдаланып, осындай объективті түрде бағалау өте тиімді болғаны анық. Сынақ кезінде мен үшін SHL тарапынан әзірленген сұрақтар оңайға соққан жоқ. Өйткені оларға мұқият әзірлену қажет. Сонымен қатар бір минут ішінде сұраққа жауап беру де жеңіл тапсырма емес. Алайда осындай қиындыққа қарамастан, бәрін сәтті тапсырып шықтым.
Өткен аптада резервке енген жастар Мемлекет басшысы Қасым-Жомарт Тоқаевпен кездесті. Аталған жиыннан көп нәрсе түйіп шықтым. Мәселен Президентіміз «Бүгінгі жас буынның, соның ішінде сіздер де билікке келетін уақыт алыс емес. Сіздер мемлекетті басқару тізгінін алуға дайын болып, тиісті білім мен білікті меңгерулеріңіз қажет. Жастарымыз ел дамуының жаңа тарихи кезеңіне дайын болуы керек. Білім мен білік өршілдіктен биік тұруы тиіс. Жаңару үдерісі – ішкі саясаттағы басым бағыттардың бірі. Кадр резервін жасақтау жұмыстары мұнымен тоқтап қалмайды, жалғаса береді. Оның қатарына ынталы және лайықты жастар кіреді. Алдағы кезеңде ХХІ ғасырдың табысты мемлекетін құруға дайын кәсіпкерлердің, ғалымдардың, мәдениет қайраткерлерінің, инноваторлардың және басқа да талантты жастардың жаңа буынына белсенді қолдау көрсетеміз. Түрлі салаға жауапкершілікті алудан, қалыптан тыс және тиімді шешімдер қабылдаудан қорықпайтын жаңа формациядағы басқарушылар тобы қажет», деді.
Мемлекет басшысының сөзінен түйгенім, Президенттің кадрлық резерві жобасы бір реттік қана жоба емес. Жалпы бүкіл саяси жүйені, мемлекеттік қызметті өзгертетін жобалардың легі ғана. Ондай өзгерістер әлі де болады. Бұл – өзгерістердің басы ғана. Сондықтан осындай өзгерістердің болғанын, реформалар жасауды қолдаймын. Өйткені резервке енген жастардың әрқайсы өз салаларында қандай да бір идеялар мен өзгерістер енгізуге септігін тигізеді.
Жалпы, замандастарыма айтатын кеңесім бар. Осындай «әлеуметтік лифті» саналатын жобалардың саны жылдан-жылға артып келеді. Яғни жастарда қазіргі заманда өте көп мүмкіндік бар. Соларды жіберіп алмауға кеңес беремін. Кез келген жобаға қатысып, өз күшіңізді сынағыңыз келсе, біліктілігіңіз бен біліміңізді байқап көруді көздесеңіз, жобаларға міндетті түрде қатысу керек. Мұндай қадам сізге жақсы әсер тигізетіні анық. Тіпті іріктеуден өте алмасаңыз да, көкжиегіңіз кеңейеді.
Мемлекет басшысы жастармен кездесуінде «Абайдың «Толық адам» тұжырымы өміріміздің кез келген саласында, мемлекетті басқару мен білім жүйесінде, бизнес пен отбасы институттарында негізгі тұғырға айналуы керек. Мұның бәрі интеллектуалды ұлт қалыптастыру үшін қажет. Абайды өз заманындағы іскерліктің ұйытқысы деуге болады. Біз елдік мүддеге қатысты әрбір ісімізде ұлы ақынның еңбектеріне жүгінуіміз керек. Бұл – жаңғыру жолындағы аса маңызды қадам. Халқымыз, әсіресе, жас буын Абайдың сара жолын жалғауға баса мән беруі тиіс» деп атап көрсетті. Ендеше, адам капиталын дамытуға арналған осындай мүмкіндіктердің жасалғаны өте маңызды әрі жақсы үрдіс.
Олжас СӘКЕНОВ,
Президенттік жастар кадр резерві мүшесі, BTS Education компаниясының консультанты
