Зағиптардың екінші үйі...

1970 жылы шағын ғана ғи­маратта ашылған кітапхана­мыз осы уақыт ішінде тек алға жылжып, заманауи жабдықтармен қамтылып, көптеген ауыз толтырып айта алатын жетістіктерге қол жеткізіп отыр. Атап айтсақ, керекті кітап қоры, дыбыстық (аудио) таспалар, LED-экранды теледидар, зағиптарды оқытып, үйрететін компьютерлер мұнда жеткілікті.Республика бо­йынша осындай кітапханалар арасында тұңғыш рет бізде Сoworkinq-орталығы ашылды.

Кітапханада зағип жандар үшін әртүрлі іс-шаралар ұйымдастырылады. Ол мей­рамдарға, мерейлі тойларға қарсы өткізіледі. Өз мүмкін­діктеріне қарай осы санаттағы азаматтардың жартысынан көбі кітапхананың оқырмандары.«Ол қалайша?» деген сұрақтың туындауы орынды. Өйткені зағип жандар кітапханаға тек іс-шаралар­ға қатысу үшін ғана емес,өздері­нің қуаныштарымен, қайғы-мұңдарымен бөлісуге де келеді. Бұл бір жағынан адамдардың бір-бірі мен жақын араласып, бір отбасы мүшелеріндей боп кеткендігімен де байланысты.Бұл жерде кітапханашылардың еңбегі зор. Олар әрқашан келушілерді қуана қарсы алып, кішіпейілдік, инабаттылық танытады. Ерекше жандарға қамқор болып, баурап алады.

Осы мекемеде жұмыс істей­тін жаны жайсаң, көңілдері ашық қызметкерлердің еңбе­гінің оңай емес екенін айтып өткім келеді. Жоғарыда айт­қан іс-шараларды өткізу үшін, оныңдайындығына қан­ша уақыт талап ететінін біреу біл­се, біреу білмейді. Ал осының бәрі көзі көрмейтін және нашар көретін азаматтар үшін жасалады. Олардың жанын түсіну екінің бірінің қолынан келе бермейді. Сондықтан, бұл кітапханамызда, тек өз ісінің шебері, зағип жандарға жаны ашитын адамдар еңбек етеді.

Осындай ұжымның жұмы­сын ұйым­дастырып, қызмет­кер­лерінің қалтқысыз еңбек етуі кітапхана басшысы Жамал Кенжебекова бастаған Ләззат Қуантаева, Людмила Арта­монова, Әсем Нұрғалиева, Ай­нагүл Қожаханова секіл­ді мамандарға тікелей байла­ныс­ты. Осы іскер адамдардан тәлім-тәрбие алған кітапхана­шыларда өздеріне жүктелген жауапкершілік биігінен табылу­да. Қазақ соқырлар қоғамы­ның Пав­лодар филиалы кітапха­на­мен көптеген шараларды бірле­сіп өткізеді. Өйткені мақсат­ы­мыз және жоспарларымыз бір.

Балкен ИБРАЕВА

Павлодар