Сол кезде Баянауыл совхозының комсомол ұйымының жетекшісі қызметін атқаратын Әсет Жармағамбетовке Қожанасыр рөлін ойнау жүктелді. Алғашқы мерекеде де осы рөлді сәтті алып шыққан әуесқой актер бұл жолы да ерекше дайындалды. Өткір әзілдерін, ұтымды қалжыңдарын, астарлы сөздерін әзірледі.
Әне-міне дегенше орталық алаңда үлкен думан басталады. Жауапты рөлге бекітілген актер алаңға баруға ерте қамданады. Бірақ...
Сол «бірағын» «Қожекеңнің» өз аузынан тыңдайық:
«Сол жылы біз тұңғышымызды күтіп жүрген едік. Наурыз мерекесі тойланар күні, таңғы сағат 7-лер шамасында жұбайым Айгүлдің толғағы басталды. Сасқанымнан, «Наурыз мерекесі өтіп алсын. Шыдай тұр!» деппін. Бірақ үйдегі анам сезіп қойып, келінін тездетіп перзентханаға жеткізу керектігін айтты. Мен анам мен жарымды перзетханаға апарып тастадым да, орталық алаңға қайтып келдім».
Алаңға орала сала Әсет Уахитұлы өз рөліне беріле кірісіп кетеді. Барын салып, жиналған қауымның көңілін көтереді. Қожекең «Өзіміздің күнделікті өмірімізді, өз поселкемізде орын алып отырған кейбір кемшіліктер мен келеңсіз көріністерді тілге тиек етеді».
Мереке әбден қызған шақта, сағат 11.00 шамасында, «Сүйінші!» хабар жетіп, дүниеге атұстар келгені белгілі болады. Шараның ұйымдастырушысы, әрі қазылар алқасының төрағасы Қайрат Әбенов ақсақал микрофон арқылы хабарлап, «Қожанасырдың тұңғышы дүниеге келді!», деп халықтан сүйінші сұрайды. Қыран-топан күлкіге батып, мәз-мейрам болып тұрған қауым, барлығы сценарий бойынша шығар деп ойлап, алғашқы бетте түсіне де, сене де қоймайды. Бірақ, Қайрат Мұзапарұлы сөзді «Қожекеңнің» өзіне беріп, халықты сендіреді. Сол кезде жиналған қауым: «Батырдың бауы берік болсын! Осындай мерекеде дүниеге келген сәбиге «Наурызбай» деп ат қояйық» дейді алақандарын шапалақтап. Мерекеге жиналған жұрттың алдында жасы жүзге келген ағаш шебері Қарабек ақсақал жас сәбиге бата береді.
Тұңғышы дүние есігін ашқан азамат шаттықтан шалқып тұрып, көпшіліктің алдында қайта сөз алады. Алғысын жаудырады. Бірақ, жұбайымен бірге перзентханаға барған анасының, тұңғыш немересін өзі қарсы алған аяулы әженің сол топтың ортасына келгенін де білмей қалады. Аяулы ана, ардақты әже қуаныштан қанаттанып, қалың қауымға алып-ұшып жеткені сол екен.
«Мен көңілім көтеріліп, қуанышым тасып «Тұңғышымның есімі сіздердің қалауларыңызбен Наурызбай болсын! Балама айтқан тілектеріңіз қабыл болсын!», дедім. Бұл сәттің барлығын үнсіз ғана тамашалап тұрған анам «Бұған бала қайдан келіпті!» деп ренжіп қалыпты. Сөйтсем, қазақы жөн-жоралғы, салт бойынша тұңғыш бала атасы мен мен әжесіне тиесілі екен ғой. Менің бұл әрекетіме анам көпке дейін ренжіп жүрді. Мен де өзімнің білместігіме қысылып жүрдім», дейді Әсет Уахитұлы.
Осындай керемет жағдайда өмір есігін ашқан Наурызбайды 1993 жылы өткен Наурыз мерекесінде сол кездегі мәдениет бөлімінің басшысы Асқар Лекеров арнайы құттықтап, шапан жауыпты.
«Көп тілеуі – көл» дегендей сол кездегі қуаныш үстінде айтылған халықтың тілегі қабыл болып, батасы дарып, Наурызбай елі мен жерінің мақтанышына айналды. Баянауылдағы Зейтін Ақышев атындағы мектепте, сосын Павлодар қаласындағы Ыбырай Алтынсарин атындағы №3 гимназияда үздік оқыды. «Болашақ» бағдарламасымен Англияның Манчестер университетінде білім алды. Ол бүгінде шет елде алған білімі мен жинаған тәжірибесін туған елінің дамуына жұмсап келеді. Отанына адал азамат, отбасына қорған отағасы қазіргі уақытта Павлодар қаласында қызмет істейді.
Еламан ҚАБДІЛӘШІМ
Павлодар облысы,
Баянауыл ауданы