Сарыкемердің сәулеті артып келеді

Аталған жоба аясында ауыл­дар­дың сәулеті артып, тір­лі­гі тіктелді. Мәселен, Сары­ке­мер ауылының орталығындағы мәдениет үйінің іргетасы 1976 жылы қаланған екен. Салын­ға­нына қырық жылдан астам уақыт өтсе де, 2009 жылы ғана нысанның қасбетіне соңғы рет ағым­дағы жөндеу жұмыстары жүр­гізі­ліпті. Тіпті кейіннен ғима­рат­тың қасбетінің бояуы оңып, әктерінің түсіп қалғанын тұр­ғын­дар талай рет мәселе етіп көтерген. Нысанның алдыңғы алаңшасына 2004 жылы төселген тақтатастардың дені сынған, бү­лінген, кей жерлері ойылып кеткен болатын. Мұндағы жарық шамдар, тоқсаныншы жыл­дары салынған субұрқақтар мен орындықтар жарамсыз болып қалған еді. Енді, мемлекет қолдауының нәтижесінде аудан орталығындағы мәдениет үйін жаңғырту үшін жобалық құны 14 млн 664 мың теңгені құрайтын ауқымды жұмыс атқарылды. Әуелі нысанның қасбетіне әрлеу жұ­мыстары жүргізіліп, жаңар­тыл­ды. Ғимараттың алдыңғы алаңшасының ескі тақтатастары ауыстырылып, дәлізге ішкі әрлеу жұмыстары жүргізілген. Есік-терезелер жаңартылып, нысанның ал­дыңғы жағына жаңадан орын­­­­­дықтар қойылып, жарық шамдары қалпына келтірілді. Мә­де­­ниет үйінің алдына әл-Фара­би ескерткіші орнатылды. Со­ны­­мен қатар нысанның қа­рау­­­сыз жатқан оң жақ бөлі­гін­дегі алаңға демеушілердің көме­гімен 10 млн теңгеге бір­қатар жұмыс атқарылғаны да елге игілік болды. Бүгінде мұнда аллея ашылып, шыршалар егіліп, жаңадан автотұрақ са­лынған. Жаңа орындықтар қойы­лып, айналасының жарық­тан­дырылғаны да нысанға сән беріп тұр. Сонымен қатар аудан­дық орталықтандырылған кітапханалар жүйесінің кітап қорын сақтау бөлмесінің ескірген шатыры жөнделіп, қабырғалары тегіс­телген. Жоба аясында аудан­­­­дық тарихи-өлкетану му­зе­йі­нің ғимаратына 3 млн 372 мың теңгеге қосымша екі бөлме салынған. Аудан орталығындағы бірқатар балалар бақшаларына да күрделі жөндеу жұмыстарының жүргізілгенін айтқан ата-аналар мемлекеттің қолдауына дән ризашылығын білдіруде. 280 орындық «Балдырған» бала­бақ­шасы 1983 жылы пайдалануға берілген екен. Мұнда қазіргі уақытта 36 педагог, 34 кіші қыз­мет­кер жұмыс атқарады. 12 топта 300 бала тәрбиеленуде. 36 жылдан бері күрделі жөндеу көрмеген мекеме ескіргендіктен, «Ауыл – ел бесігі» жобасы аясында жалпы құны 41 млн 951,4 мың теңгеге «Балдырған» балабақшасына күрделі жөндеу жұмыстары жүр­гі­зіліпті. Сол сияқты 30 жылдан бері жөндеу көрмеген «Теремок» балабақшасына аталған жоба аясында жалпы құны 164 млн 475 мың теңгеге күрделі жөндеу жүргізілген. Ғимараттың шатыры түгел ауыстырылып, сырт­қы және ішкі қабырғалары тегіс жаңартылыпты. Бүгінде бала­бақшадағы 6 топта 140 бала тәр­бие­ленуде. Жалпы қыз­мет­кер­лер саны 46 адам, оның ішінде 22 педагог қызметкер бар.

 Сол сияқты Сарыкемер ауы­лын­дағы жазғы театрға 5 млн 908,7 мың теңгеге ағымдағы жөндеу жұ­мысы жүргізіліп, аудандық «Жастар ресурстық орталығына» жеке ғимарат ретінде беріліпті. Ауыл орталығында орналасқан Кеңес Одағының Батыры Ақәділ Суханбаев атындағы орталық саябаққа 5 млн 908,7 мың теңгеге жөндеу жұмыстары жүргізілген. «Саябаққа аспалы шамдар орнатылып, 2734 шаршы метр газон, 220 шаршы метр жерге тақтатас төселді. Жолдардың барлығының жиегіне 1100 шаршы метр жиек­­тас, 1500 шаршы метр жерге полиэтилен құбырлары тартылып, суару жүйесі іске қосылды. 100-ден аса қылқанжапырақты ағаштар және аққайыңның кө­шет­тері егілді. Балалар ойнайтын түрлі әткеншектер бой көтер­ді, саябаққа спорттық құрал-жабдық­тар, заманауи орындықтар мен қоқыс жәшіктері орнатыл­ды. Қазіргі таңда саябақ тұрғын­дар­дың жиі келетін сүйікті орнына айналған», дейді аудан әкімі Нұржан Нұржігітов.

Сондай-ақ аудандық халықты жұмыспен қамту орталығының ғимараты да 3 млн 449,5 мың теңгеге жаңғыртылса, «Ауыл – ел бесігі» жобасының аясында орталық аурухананың қабылдау бөлімшесі де ағымдағы жөндеуден өткен. Мұнда жалпы құны 7 млн 790 мың 357 теңгенің жұмыстары атқарылған. Ағымдағы жөндеу барысында жалпы 13 есік ауыс­тырылып, 160 шаршы метр еденге линолеум және 418 шаршы метр керамогранит плита тастары төселген. Бұдан өзге де атқарылған жұмыстар бар. Ғимараттың ота жасау бөлімшесіне де күрделі жөндеу жүргізілген. Ауылда Ғани Мұратбаев атындағы мектеп-гимназия бар. Мектеп жанынан 2012 жылы шағын футбол алаңшасы салынған. Мұнда былтырға дейін дейін күрделі жөндеу жұмыстары жүрмегендіктен, алаңшаның қор­шауы және торы, жасанды төсе­ніші, бояулары әбден тозып, жа­рамсыз жағдайға жеткен еді. Бұл олқылықтың да орыны «Ауыл – ел бесігі» бағдарламасы арқылы толып, өткен жылы күрделі жөн­деу жұмыстарына 12 млн 358 мың теңге қаражат бөлініпті. Бүгінде бұл толығымен игерілген. Алаңшаға қоршау жүргізіліп, жасанды төсеніш төселсе, қоршаудың торы ауыстырылып, тіректер сыр­лан­ған. Қазіргі таңда толық пай­далануға берілген футбол ала­ңын­да ауыл жастары спортпен айна­лысады.

Сарыкемер ауылынан 2001 жылы Ж.Үшкемпіров атындағы №1 балалар-жасөспірімдер спорт мектебі ашылған болатын. Алайда ғимараттың шатырынан су ағып, сыртқы қабырғаларының сылағы түсіп, кірпіштері үгітіле бастаған. «Ауыл – ел бесігі» бағдарламасы аясында 22 млн 382 мың 479 теңгеге ішінара күрделі жөндеу жұмыстары жүргізіліпті. Бүгінде нысан жоғары деңгейде жұмыс істеп тұр. Тұрғындардың дені негі­зі­нен ауылдағы көптеген нысан­ның қайта жөнделіп, ел игілігіне беріл­ге­ніне ризашылық білдіруде. Сол сияқты, Сарыкемер ауы­лын­дағы №2 балалар-жасөс­пі­рім­дер спорт мектебінің орталық ста­дионында орналасқан баскет­бол алаңшасы 1993 жылы салын­ғанымен, құрылысы аяқ­талмаған екен. «Ауыл – ел бесігі» жобасы аясында баскетбол алаң­ша­­сының ретке келтірілгені де жас­тарға қуаныш. Көптен бері тұр­ғын­дардың мәселесіне айналып келген ауыл ішіндегі жолдар да жөндеуден өтіп, көшелер жарық­тан­дырылған. Енді облыстық ма­ңы­зы бар «Тараз – Сарыкемер – Түймекент – Ақшолақ» авто­жо­лының 3,4 – 14,4 шақырым ара­лығын қайта жаңғырту жұ­мыс­тары қолға алынуда. Жобаның жалпы құны 2 млн 533,7 мың теңгені құрайды. Жобаны жүзеге асыру 2019-2020 жылдарға жоспарла­нып­ты.

Сондай-ақ Сарыкемер және Бәйтерек ауылдарындағы көше шамдарының ауыстырылып, тіректері жаңғыртылғаны да көпшілік үшін қуаныш. Жоба аясында 100-ден астам көше­ге 348 млн 587 теңгенің жұ­мыс­тары жүргізілген. Ауыл хал­­қы­ның тұрмысын көтеруге бағыт­талған ауқымды жоба шеңберінде биыл 7 жоба іске асады. Оның ішінде Қостөбе орта мектебіне қосымша спорт зал, акт зал, асхана және үш сынып бөлмесін салу, Байзақ ауылында спорттық сауықтыру кешенін салу, №1мек­теп-гимназияның оқу корпусын күрделі жөндеуден өткізу, Н.Киікбаев атындағы мектеп-гим­назияның шатырына күрделі жөндеу жүргізу және өзге де нысандарды жөндеу жұмыстары бар. Аталған жобалардың жалпы құны 972 млн 689 мың теңгені құрайды. «Жалпы, «Ауыл – ел бесігі» жобасы аясында атқарылған, ағым­дағы жылы жоспарланып отыр­ған жобалар ауқымды, жобалардың игілігін ел көруде», дейді Нұржан Нұржігітов.

Жамбыл облысы