Елімізде қолға алынған шараларға көп қаражат жұмсалып жатыр. Әсіресе әлеуметтік қорғау мен бизнесті қолдау мемлекеттік бюджетке үлкен салмақ салуда. Ал мұнай бағасының түсуі мен теңгенің құнсыздануы, өндірістің тоқтауы бюджетке түсімді азайтуда. Осылайша індетпен күрестің қиындығын көріп жатырмыз. Алғашқыда халық жарыса азық-түлік сатып алып, бағасының көтерілуіне, тапшылықтың туындауына түрткі болғаны да рас. Бұл жердегі ең қорқыныштысы – басқа елдердің азық-түлік тауарларын сыртқа шығаруға шектеу қоюына, көктемгі егіс жұмыстары өз деңгейінде жүргізілмеуіне байланысты күзге қарай ауылшаруашылық ресурсының азайып, бағаның шарықтап кетуі, азық-түлік дағдарысының туындау қаупі. Бұл әрине алдын ала қауіптену, сақтану ғана.
Қазақстанда физиологиялық нормаларға сәйкес, нан өнімдері нормасы – 109 кг, ет – 78,4 кг, сүт – 301 кг, жұмыртқа – 265 дана, балық – 14 кг, картоп – 100 кг, көкөніс және бақша өнімдері – 149 кг, жеміс-жидек – 132 кг, өсімдік майы – 12, қант нормасы 33 кг болып бекітілген. Статистика комитетінің 2018 жылғы деректеріне сәйкес халық нан (+31 кг) мен қантты (+12,8 кг) нормадан көп пайдаланған, бұл – кедейшіліктің белгісі. Басқа көрсеткіштер физиологиялық нормадан төмен. Статистикалық деректердің өзінде ауытқу болатынын ескерсек, республика бойынша азық-түлік қауіпсіздігінің орындалмай жатқанын көруге болады.
Бір мысалды талдайық. Жақында әлеуметтік желіні шулатқан қырыққабат проблемасынан көпшілік хабардар. Физиологиялық норма бойынша әр адам жылына орта есеппен 24 кг қырыққабат пайдалануға тиіс. Оны 18 млн 632169 адамға көбейтсек, 447 мың 172 тонна болады. Республикада бұл дақылдың егіс көлемі – 11756 га. Орта есеппен гектарынан 30 тоннадан өнім алынғанда, ол 352 мың 680 тоннаны құрайды екен, яғни қырыққабатың өзімізге әлі де 94,5 мың тоннасы жетпісейді. Осындай жағдайда Ауыл шаруашылығы министрлігінің Ресейге сату үшін 50 мың тоннаға квота бергені түсініксіз. Яғни қолдан тапшылық тудыру деген сөз.
Осындай қадамдардың салдарынан өткен жылы қырыққабат Қарағанды облысында 70,7%-ға, республика бойынша 34%-ға қымбаттап кеткен болатын. Сондықтан шетелге өнім сатып, қалталарын толтыруды ойлағандардың өзімізді азық-түлікпен толық қамтамасыз етіп отырмыз деуі шындыққа жанаспайды. Ауыл шаруашылығы министрлігінің желіні шулатқандардың жетегінде кете беруіне болмайды.
Аграрлық саладағы мұндай жағдай ауыл шаруашылығының жетістіктері тек макроэкономикалық көрсеткіштер, еңбек өнімділігі арқылы баяндалуында, Үкіметтің беріп жатқан қаржылай көмегін насихаттау, мысқалдап болса да мал басының өсімін, егіс көлемін көрсетуінде болды. Сондықтан статистикалық көрсеткіштерді әсірелеп қойып, бұрынғыша жұмыс істей беру министрлер мен әкімдерге тиімді еді. Халықтың ішкі өндірістен қанша тағам пайдаланып жатқанын ешкім есептеген жоқ, аграрлық саясаттағы басымдық өнімді экспортқа шығару болды.
Соңғы жылдары бұл саланы Қазақстан экономикасының локомотиві ретінде дамыту туралы аз айтылған жоқ, талай бағдарлама жасалып, қыруар қаржы жұмсалды. Бірақ өзгеріс шамалы. Көп жылдар бойы азық-түлік қауіпсіздігінің қамтамасыз етілмеуі отандық тауарлар импорт көлемінің көлеңкесінде болып, ол дүкен сөрелерінен онша байқалмады. Бұл саясат қазіргі жағдайда жақсылыққа апармайтыны сөзсіз. Бүгінгі таңда Қазақстанда індетпен күресу жұмыстарымен қатар, ел экономикасына терең реформа қажет, бірақ оған уақыт тар. Осындай жағдайда, қатар келген қос қиындықтан құтқаратын бір ғана жол бар, ол – аграрлық саланы реформалау. Менің ойымша, жаңа аграрлық саясат жариялап, ауыл экономикасын дамытуды шындап қолға алу қажет. Жаңа аграрлық саясаттың ерекшелігі – оның қосымша қаражат талап етпеуі, тек бөлінген ресурстарды тиімді пайдалану керек. Ауыл шаруашылығы өнімдерін пайдалану ішкі нарыққа бағытталады, басты міндет – әрбір азаматты жылына орта есеппен алғанда тағамның 10 түрімен физиологиялық нормаға сәйкес қамтамасыз ету.
Екіншіден, мемлекет экономиканы реттеу функциясын тиімді пайдалану, жергілікті жердегі атқарушы органдардың әкімшілік ресурсын іске қосу, талапты басқаша қою қажет.
Үшіншіден, аграрлық саланы реформалау жұмысына Ауыл шаруашылығы министрлігімен бірге басқа да министрліктер мен ведомстволардың қатысқаны, жұмыстың кешенді және жүйелі түрде жүргізілгені жөн.
Жоғарыдағы аталған мәселелерді орындау үшін «Жол картасы» ретінде бірнеше қадам жасау керек деп ойлаймын. Мәселен, барлық аудандар мен облыстарда «Ауыл шаруашылығы өнімдерінің өндірісі мен тұтыну балансын» жасауды шұғыл қолға алу қажет. Баланс негізінде Экономика министрінің 2016 жылдың 9 желтоқсанындағы №503 «Ғылыми негізде жасалған тағам өнімдерін пайдаланудың физиологиялық нормалары туралы» бұйрығына сәйкес 64 тағамның 10 топтамасы бойынша жергілікті жерде өндірілетін және экспортталатын азық-түліктің көлемі анықталуға тиіс.
Қазақстан аумағында орналасқан барлық ауыл шаруашылығы тауарлары мен шикізат өндірушілер, алдымен өздері орналасқан аудан мен облыс қажеттілігіне жұмыс істейді, екінші кезекте облысаралық азық-түлікпен алмасу процесіне қатысады, тек сонан кейін ғана артық өнімді экспортқа шығаруға мүмкіндіктері болады. Сондықтан туындайтын бірінші талап, әр ауылдық округ, аудан мен облыстың өзін өзі физиологиялық нормаға сәйкес халықты азық-түліктің 64 түрімен қамтамасыз етуі. Артық өніммен облысаралық деңгейде бір-бірінің қажетін өтеуге болады. Ел ішінде пайдаланудан артық өндірілген немесе сыртқы саудаға арнайы егілген өнім ғана қазақстандық бренд ретінде экспортқа шығарылады (ұн, қазы-қарта, қымыз, құрт-ірімшік тағы басқа). Экспортқа негізінен терең өңделген өнімдер бағытталады, ал шикізат түріндегі өнімдерге (бидай, күріш т.б. дәнді дақылдар мен көкөніс, ірі қара, қой-ешкілер) кеден салығы көтеріледі және оларға қайтарымсыз қаржы берілмейді.
Жаңа аграрлық саясаттың басты бағыты – ішкі сұранысқа сәйкес ауылшаруашылық өнімдерін өндіруді әртараптандыру. Бұл орайда, бұрынғы ұмыт қалған егін сұрыптарын аудандастыру, тиімді әдіспен мал өсіру, тағы басқа жұмыстар қолға алынса артық болмас еді. Ауыл шаруашылығы өнімдерін өндіру жұмыстарын қаржыландыру азық-түлік қауіпсіздігін сақтау үшін тек қажетті өнімдерге мемлекеттік тапсырыс ретінде беріледі.
Мемлекеттік субсидия беруге жаңаша көзқарас керек, әсіресе дәнді дақылдарды қаржыландыруды азайтқан жөн. Субсидия әскерді тамақтандыруға, мемлекеттің азық қорына, мектептегі тамақтандыру, қарттар үйі және басқа әлеуметтік нысандарға қажетті азық өндіруге ғана берілгені жөн. Сонымен қатар шаруа қожалықтарының тауарларын дүкен сөрелеріне дейін әкелетін қызметтерге эксперимент ретінде қаржы бөлуді қарастыруға болады. Сонда ғана ортадағы делдалдар мен алыпсатарлардың жолын кесуге мүмкіндік туады. Басқа жағдайда өндірушілерді қаржылық қолдаулар тек қайтарымдық принципімен жүргізіледі. Мысалы, форвардтық келісімдер, екінші деңгейдегі банк пен микрокредиттік мекемелердің несиелері, техника алуға лизинг, ислам банкингі жүйесін пайдалану, биржаларды дамытып фъючерлік келісімшарттар жасау, егін егу мен жинау кезінде, жем-шөп дайындау, агротехникалық шаралар өткізуге мемлекеттік тапсырыс орындаушыларына арзандатылған жанар-жағармай беру.
«Қазагро ҰБХ» АҚ мен оның салалық мекемелері мемлекет қаржысын үйлестірумен айналысатыны белгілі. Сондықтан олар қаржыны ірі жобаларға салып, оның көпшілігі тиімсіз болып жатқаны белгілі. Өйткені Үкіметтің бұған дейінгі талабы – халық пайдаланатын өнім шығарудан бұрын, бюджет ақшасын толық жұмсау болды, сондықтан бұл делдал құрылымның басты жұмысы қаражатты игеру еді. «Қазагро» холдингінің қызметін реформалау туралы тапсырмалар орындалмады. Сондықтан әсіре орталықтандырылған монополиялық сала жүргізген реттеу жұмыстарын жергілікті атқарушы органдарға беру керек деп санаймын. «Қазагро» мен оның еншілес компанияларының жартысын қысқартып, оған тән емес қызметін облыстардағы әлеуметтік-кәсіпкерлік корпорациялар мен өзін өзі қаржыландыратын әртүрлі коммуналдық кәсіпорындарға берген дұрыс.
Мал шаруашылығын дамытуда алыс елдерден өте қымбатқа түсетін тірі мал сатып әкелудің орнына асыл тұқымды мал өсіруді қолға алып, тауарлы фермадағы мал басын қолмен ұрықтандыру арқылы көбейту қажет. Ауыл шаруашылығы министрлігінің мал басын шетелге сатуға тыйым салуын қолдай отырып, оның тиімді өсу жолы – жайылымдық ет өндіруге бетбұрыс жасайтын уақыт келді.
Тағы бір айта кетерлік мәселе, әр ауданда шаруашылық негіздегі коммуналдық мекемелер құруды қарастыру қажет. Мысалы «Талғарагросервис», «Қарасайагросервис» сынды мекемелер құрылса, олардың басты қызметі тауар өндірушілерге сервистік қызмет көрсету болады, яғни маркетинг, техникалық, ветеринарлық, өсімдік қорғау, қолмен ұрықтандыру, логистикалық қызмет көрсетеді.
Еліміздегі үш мегаполис пен басқа қалаларда бау-бақша серіктестіктері бар, сондықтан үлкен елді мекендерде үй шаруашылығы мен бау-бақшаны дамыту да ерекше маңызға ие. Бұл орайда, бірінші кезекте карантин жағдайында тұқым мен құрал-жабдықтар дүкендері, көшет сататын базарлар жұмыс істеулері тиіс.
Бүгінгі таңда ауыл жастарын мал шаруашылығына тарту қиындап кетті. Сондықтан жайылымдық мал шаруашылығы мен мал бордақылау кешендеріне жастарды қамту үшін бригадалық формалар мен вахталық қызмет түрлерін енгізсе, артық болмас еді.
Еліміздегі ірі жер иеленушілердің көпшілігі жерді дұрыс пайдаланбайтыны да өзекті мәселе. Сол себепті ауылшаруашылық мақсаттағы жерлерге мониторинг жүргізіп, бос жатқан жерлерді қайтадан айналымға енгізу қажет.
Қазақстан халқының жартысына жуығын ауыл тұрғындары құрайды, олар шығаратын азық-түлік өнімдерін бүкіл ел пайдаланады. Сол себепті ауыл экономикасын өркендетуді тек Ауыл шаруашылығы министрлігіне артып қою қателік деп санаймын. Оған көптеген министрліктер мен ведомстволар араласуы керек.
Ауыл шаруашылығы мен азық-түлік қауіпсіздігі проблемасымен жиырма жыл көлемінде айналысып келемін. Менің тарапымнан айтылып отырған ұсыныс бір күннің ішінде бәрін өзгертіп, жаңаша жұмыс істеу деген сөз емес. Бұрынғыдай егін егіледі, мал бағылады, бірақ талап пен өлшем өзгереді. Бекітілген тағам себетіндегі төменгі норма қала береді, ол әлеуметтік қолдау есептерінде пайдаланылады. Ал физиологиялық норма ауыл шаруашылығы өндірісін ұлғайтуға, тағам өнімдерін көбейтуге бастайтын жол болар еді. Жергілікті жерлер өздеріне тиімді өнім шығарса, мол өнім алу үшін ізденсе, жаңа технологияларды пайдаланса олардың жұмысы нәтижелі болары сөзсіз. Мемлекет тек реттеу жұмыстарымен және ғылыми, сервистік көмек көрсетумен, қайтарымды қаржы бөлумен айналысады. Бұрынғыдай ауыл шаруашылығының әр саласын кезекпен өркендету саясаты болмайды, барлық сала, барлық өңір жұмысқа бірдей тартылады, жұмыс орны көбейіп, халықтың әл-ауқаты көтеріледі.
Бүгінгі таңда елімізді екі бірдей әлемдік дағдарыстың салқыны шарпып отыр. Ал үшінші дағдарыс – азық-түлік дағдарысына жол беруге болмайды. Оның алдын алатын басты құрал – мемлекеттік тиімді саясат, ауыл экономикасын реттейтін құрал.
Атамұрат ШӘМЕНОВ,
экономика ғылымдарының докторы