Төтенше жағдайға дейін де гимназияда ақпараттық технологиялардың барлық мүмкіндіктерін кеңінен қолданып, білім алушылар өз бетімен сандық білім беру ресурстары арқылы білім алуға дағдыланған.
«Білім беру жүйесі көптеген өзгерістерге ұшырайды, біз қашықтан оқытудан көптеген жағымды тәжірибе алуымыз керек» деген Білім және ғылым министрі Асхат Аймағамбетовтің сөзіне зер салар болсақ, жаңа форматта білім беру тәжірибесі педагогтеріміздің білім қоржынын жаңа әдіс-тәсілдермен толықтырып, білім беру үрдісіне өзгеше қырдан қарап үйренуге мүмкіндік берді.
Төртінші тоқсанның басынан бастап қашықтан білім беру технологияларын пайдалана отырып, гимназия директоры Гаухар Манекееваның басшылығымен педагогтерге нұсқаулық беріліп, қашықтан оқытудың барлық талаптары мен жұмысты ұйымдастыру түрлері белгіленді. Гимназиядағы жоғары санатты, тәжірибелі педагогтер бейнедәріс, дәріс, мультимедиялық дәріс, телевизиялық дәріс, өзіндік жұмыстар, виртуалды зертханалық практикумдар, компьютерлік тестілеу жүйелері сияқты қашықтан білім беру технологияларын тиімді қолданып келеді.
Гимназиямызда бүгінде «Цифрлы мектеп» эксперименті нәтижесінде электронды ресурстар базасы жинақталған. Осы электронды оқулықтар мен мультимедиялық оқу бағдарламаларын, тренажерлер мен жобалық жұмыстарды педагогтер оқу үрдісінде еркін қолданады. Электронды журналдарда және күнделіктерде күнтізбелік-тақырыптық жоспарларды реттеп, веб-сайттарға, электронды кітапханаларға және т.б. сілтемелерді қолдана отырып, оқу материалдарын уақтылы жоспарлап құрастыруда.
Педагогтердің білім алушылармен тілдесуі мен кері байланысы – электронды хат, хабарлама, чаттар арқылы, ал консультациялар жеке немесе топтық бейнебайланыс түрінде телекоммуникациялық құралдардың көмегімен жүзеге асырылып жатыр. Барлық жұмыстар Кundelik.kz, Daryn.online, Bilimland, сондай-ақ Whatsapp, Telegram каналдары арқылы атқарылады.
Жаңа форматта жүргізілетін жұмыс түрлері міндетті түрде директордың оқу-тәрбие ісі жөніндегі орынбасарымен келісіледі. Жоспарланған жұмыс түрлері туралы кез келген ақпарат білім алушылар мен ата-аналарға электронды журналдар мен күнделіктер арқылы дер кезінде жеткізіледі.
Онлайн-сабақтар бекітілген оқу кестесіне сәйкес өткізіліп жатыр. Білім алушының өзіндік жұмысына бақылау жасалып, кері байланыс жүргізілуде. Үй тапсырмаларының көлемі белгіленген нормаларға сәйкес берілуде.
Гимназиямыздың тәжірибелі педагогтердің жасап жатқан жұмыстары мен пікірлеріне тоқтала кетсек. Бастауыш сынып мұғалімі Айнұр Жатақбаева: «Оқушылардың қызығушылықтары жақсы, бірақ олармен бетпе-бет кездескенге, әрине жетпейді. Баланың басынан сипап, арқасынан қағып, көзіне қарап сабақ беру – ерекше сезім. Оны қашықтан оқытуда сезіне алмайсың. Ата-аналар балаларымен бірге сабақ оқу барысында білім берудің қиыншылығын түсінді. Өз балаларын жаңа қырынан көріп, балаларының мүмкіндіктеріне көздерін жеткізді. Ұстаздың мойнында қанша үлкен жауапкершілік пен еңбек тұрғанын біле бастады» деп ойымен бөліссе, Әсем Смакова: «Елімізде белең алып жатқан қиындықтарға қарамай, заманға сай жаңашыл әдістердің керегін қолданып, шәкірттеріміздің тарыдай талабына үңіліп, кеудесіне таудай үміт ұялатып еңбек етіп жүрген Отанымыздың түкпір-түкпіріндегі әріптестерімнің еңбегі ерен деп ойлаймын. Оқушылар өздігінен білім алуға дағдыланғаны байқалып жатыр, білім сапасы орнықты деңгейде тұр деп есептеймін. Оқушылар саналы түрде «Білім өзім үшін керек» деп бар мүмкіндікті пайдаланып оқуда» деді.
Сол сияқты ұжымның барша педагогтері қашықтан оқытуда ешқандай мәселе жоғын айтып, білім сапасы тиісті деңгейде болады деген сенімде.
Қашықтан оқыту мен тәрбиелеу – сынып жетекшілеріне де оқушылар мен ата-аналарға да таңсық, жаңа тәжірибе. Сынып жетекшілері ата-аналарды қашықтан оқыту мен тәрбиелеу процесі, сабақ кестесіндегі өзгерістер мен кері байланыс жасау, оқу барысы мен оқу нәтижелері, білім алушыларға үйде жағдай жасау қажеттілігі туралы хабардар етіп отыр. Білім алушылар және олардың ата-аналарымен сұхбаттар, форумдар электронды журналдар мен күнделіктер жүйесінде және чаттар арқылы жасалады. «Ата-ана – мұғалім – оқушы» атты үштік арасындағы байланыс бұрынғыдан да нығая түсті. Ата-аналар ұстаздардың жұмысын жоғары бағалап, алғыстарын жариялауда. Қашықтан оқыту арқылы олар ұстаз жұмысының көптеген қырымен танысты. Сонымен қатар дарынды балалармен жұмыс төтенше жағдай кезінде де өз жалғасын табуда.
Сандуғаш БИЖАНОВА,
«Жаңа ғасыр» №175 гимназия директорының оқу-тәрбие ісі жөніндегі орынбасары
