Мұғалімдерге. Химия пәні бойынша мұғалімдер арасындағы әлемдік байқауда үздік деп танылған Жігер Телеуханов қашықтан оқытудағы құпиясымен бөлісті. Оның ойынша, қашықтан оқыту ұстаздарға үлкен білім беру платформасын дайындауға мүмкіндік береді.
– Мектеп мұғалімдерімен бірігіп, мектебіміздің оқушыларына видеосабақтар түсіріп жатырмыз. Одан басқа, қазір өте жақсы таралып жатқан челлендж арқылы үйдегі бар мүмкіндікпен химиялық заттарды тексеруді бастадық. Мысалы, үйде сабын, сусабын, кір жуғыш заттар жасауға болады. Мұның бәрі химия болғанымен, 50 пайызы ғана мектеп бағдарламасын қамтиды, – дейді Жігер Телеуханов. Жігердің айтуынша, маңғыстаулық мұғалімдер стабилизатор, ароматизатор, эмульгатор, бояғыштардың зиянын Instagram әлеуметтік желісінде хештегпен белгілеп, өзара челлендж жасап, бір-біріне жіберуде. Оны әр оқушы түсінгені бойынша орындап, өз ойымен дискриптер арқылы жасауға тырысады.
– Қазіргі жастардың көбі әлеуметтік желілерді қолданады. Хештег арқылы белгілі бір мұғалімді белгілеп, осындай әдістеме арқылы оқушыларды оқыту қызық болып жатыр. Оқушылар өз қолдарымен ұстап көрген нәрсесін жақсырақ түсінетін болғандықтан, бұл жерде жаңа мазмұнға келе жатырмыз. Яғни бала баға үшін емес, өзі үшін оқу керек екенін түсінетін сәт туды, – дейді жас маман.
Үздік ұстаз әріптестерін креативті болуға, сондай-ақ әлеуметтік желілердің көмегімен баланы қызықтыратын әдістерді ойлап табуға шақырды.
Шығыс Қазақстан облысындағы ауыл мектебінің бірінде информатика пәнінен сабақ беретін мұғалім Мейіржан Темірбек әріптестеріне жаңа форматтағы оқытудың өнімділігі жоғары болуы үшін жаңа тақырыпты түсіндірумен шектелмей, баланы нәтижеге жұмыс істеуге үйретудің маңызды екенін айтады.
– Балаларға өз күнін жоспарлауды, сабақты орындағанда өзіне мақсат қойып, жоспар құруды және нәтижесін болжай білуді үйрету керек. Сабақты орындағанда оған көмектесуден бұрын мотивация беріп, «сенің қолыңнан келеді», «сен орындай аласың», «түсінбей қалсаң, ережелерді қайта оқы» немесе «мәтінді қайталап оқы» деген сынды кеңестер беру қажет. Ал оқу материалымен танысқанда балаға үнемі «Не білдің? Не үйрендің?» деген сұрақтар қойып, қызығушылық танытып отырған дұрыс. «Сенімен бірге мен де көп нәрсе білдім» десек, балаларымыз ынталана түседі. Біздің ауылымызда да интернет желісі нашар ұстайды, сондықтан оқушыларды мәжбүрлеп отырған жоқпыз. Әркім өз мүмкіндігінше жұмыс істейді. Өзім информатика пәнінің мұғалімі болғандықтан, қашықтан сабақ өткізу мәселесі қиынға түскен жоқ. Бір апта бұрын оқушылармен тікелей байланысқа шығып, түрлі білім беру платформаларының жұмысымен таныстық, – дейді М.Темірбек.
Оқушыларға. Қашықтан оқыту кезінде компьютермен жұмыс істеудің қарапайым қауіпсіздіктерін сақтау керек. Бұл туралы Білім және ғылым министрлігі телеграм каналында жариялады.
1. Компьютермен үздіксіз жұмыс істеудің үзіліссіз ұзақтығы: 1 сыныптарда 15 минут; 2-3 сыныптарда 20 минут; 4-5 сыныптарда 25 минут; 6-8 сыныптарда 30 минут; 9-11 сыныптарда 35 минуттан аспауы тиіс.
2. Сабақ барысында әр сағат сайын үзіліс жасауды ұмытпаңыз.
3. Шаршап-шалдықпау үшін үзіліс кезінде дене жаттығуларын жасаған жөн. Қимыл-қозғалыс күш-қуат сыйлайды.
4. Көзге арналған жаттығуларды назардан тыс қалдыруға болмайды. Көз жаттығуларын әрбір 20-25 минут жасау ұсынылады.
Бұл ережелер өте қарапайым болғанымен, адамға 90 пайыз ақпарат беретін көз жанарының қуатын сақтауға септеседі.
Ата-аналарға. Елордадағы №56 орта мектебінің педагог-психологы Айгүл Рахымжанқызы жаңа форматтағы білім берудің сапасын арттыру үшін ең бастысы ата-аналар тарапынан қашықтан білім алуға қатысты оң көзқарас қалыптастыру қажет екенін айтады. Өйткені ата-ананың ойы, көзқарасы, тіпті көңіл-күйі балаға әсер етеді, кей жағдайда белгілі бір ұғым, пікір қалыптастыруына ықпал етеді.
– Бала дұрыс білім алуы үшін алдымен күн тәртібін жасап алған жөн. Маман ретінде бұл форматтың кейбір балалар үшін өте пайдалы екенін айтқым келеді. Мысалы, мұғалім 40 минуттың ішінде 25 баланың мүмкіндігін байқай алмай, тек 15 баланың деңгейін анықтай алатын. Қазір мінезі тұйық балалар да өздерін көрсете алатын мүмкіндікке қол жеткізіп отыр. Осындайда ата-аналардың өз балаларына сенім артып, еркіндік беруі маңызды. Қашықтан білім алу форматы болашақта балаға оқығанын өмірде пайдалана алуына көмектеседі. Ата-аналардың эмоцияға шамадан тыс берілуі, балаларының біліміне деген күмәні оқушылардың өзін-өзі дұрыс көрсете алуына кедергі келтіреді. Сондықтан отбасында оқушыға қолдау білдіруі аса қажет. Сондай-ақ балалар үшін ән айту, би билеу, сурет салу сияқты физиологиялық жүктемелер де керек. Оны бала әке-шешесімен бірге жасағанды ерекше ұнатады, – дейді психолог-педагог. Оның ойынша, қауіпті дерттің көңілге қаяу түсіретін жағымсыз жаңалықтарын тыңдай бергеннен гөрі, ең дұрысы – отбасына ортақ, уақытты қызықты өткізудің жолдарын табу. Мәселен, отбасылық ерекше естеліктер, болашақтағы арман мен жоспар туралы айтуға болады. Ата-ана өздігінен, әлдекімнің ықпалынсыз, әрдайым итермелеп немесе бақылап отыруынсыз өз бетінше білім алу – осы заманның басты талабы екенін бала бойына, санасына сіңіргені абзал.
