Осы мақсатта өңірге арнайы келген Қазақстан Республикасы Кәсіподақтар федерациясының төрағасы Сатыбалды Дәулеталин, Өзбекстан Республикасы Жизақ облысы кәсіподақтар кеңесінің төрағасы Нусуратулла Пардаев, Түркістан облысы әкімінің орынбасары Сәкен Қалқаманов және федерацияның ұйым басшылары «Өргебас» және Фирдоуси ауылдарына барып, су апаты зардаптарын жою ісіндегі атқарылған жұмыстардың барысымен, «Достық», «Жеңіс», «Жаңа тұрмыс» елді мекендерінде салынып жатқан тұрғын үйлердің құрылысымен танысты. Мырзакент кентінде жергілікті тұрғындармен және су апатынан зардап шеккен елді мекендердегі жалпы орта мектептердің басшыларымен кездесті.
Тұрғындармен кездесуде Сатыбалды Дәулеталин Мақтаарал ауданының тұрғындары берекені көктен емес, қажырлы еңбектен тілеген тынымсыз еңбекқор жандар екенін атап өтті. «Мұқтаж жанмен өз жылуын бөлісу дәстүрі қазақ халқының қанында бар. Сондықтан да, біз осындамыз. Кәсіподақтар елмен бірге, тағдыр тоңдырған мақтааралдықтарға жылумен келдік. Осындай қажетті іс-шараларды жедел түрде қарастырып, жүзеге асырған Президент пен Үкіметке өз ризашылығымды білдіргім келеді. Өз кезегінде, әріптесіміз – Өзбекстан Кәсіподақтар федерациясымен ортақ келісім бойынша Мақтаарал ауданы елді мекендері тұрғындарын қолдау мақсатында бірлесіп, 66 млн теңгенің көмегін көрсету туралы шешім қабылдадық. Біз төрт орта білім беретін мектепке интерактивті компьютерлік сыныптардың толық жабдығын тапсырамыз», деді С.Дәулеталин. Сондай-ақ ол Аманжолов, Мүсірепов, Фирдоуси атындағы орта білім беретін және «Нұрлы жол» елді мекеніндегі мектептердің директорларына 25 ноутбук, 25 парта мен 50 орындық, 2 принтер, бір-бірден мультимедиалық тақта табыс етті. Сонымен қатар су тасқынынан зардап шеккен елді мекендердің 100 тұрғынына федерацияға қарасты «Көктем», «Меркі», «Манкент», «Жаңақорған», «Щучинск» шипажайларына жолдама берілді. Тегін жолдамалар зейнеткерлерге, мұғалімдерге, сондай-ақ көпбалалы және аз қамтылған отбасыларға табыс етіледі.
Апаттан зардап шеккен ауданның мұғалімдеріне Республикалық білім және ғылым қызметкерлері салалық кәсіподағы тарапынан да елеулі қолдау көрсетіліп, 365 білім саласы кәсіподақ мүшесіне материалдық көмек ретінде 35 мың теңгеден берілді. Жалпы, Кәсіподақтар федерациясының мүшелік ұйымдары 50 млн теңгенің көмегін көрсетті. Өз кезегінде Өзбекстаннан «Достық керуенін» бастап келген, Жизақ облыстық кәсіподақтар кеңесінің төрағасы, Өзбекстан Сенатының депутаты Нусуратулла Пардаев бауырластық әрі көршілік қарым-қатынас қазақ және өзбек халқының қатынастарының негізі болатынын атап өтті. «Бүгін таңертең Қазақстан – Өзбекстан шекарасынан біздің «Достық керуені» өтті. Біз де Қазақстан Кәсіподақтар федерациясы сияқты бауырлас халықтың басына түскен осы қиындықта бейтарап қала алмадық және қазақстандық әріптестеріміздің зардап шеккендерге қайырымдылық көмек көрсету акциясына қосылдық», деді өзбекстандық делегацияның басшысы. Өзбекстан кәсіподақтары жалпы сомасы 16 млн теңге көлемінде гуманитарлық көмек алып келген. Оның ішінде алғашқы қажеттілік тауарлары, құрылыс материалдары, төсек-орын жабдықтары мен азық-түлік бар.
Ауданға бармас бұрын Қазақстан Кәсіподақтар федерациясының төрағасы Сатыбалды Дәулеталин Түркістан облысының әкімі Өмірзақ Шөкеевпен кездескен болатын. Кездесу барысында облыс әкімі Кәсіподақтар федерациясына қиын да күрделі жағдайға тап болған адамдарға қамқорлық танытып, қолдау көрсеткендері үшін алғыс айтты. Сондай-ақ тараптар өткен жылы қазанда қол қойылған Меморандум аясында әлеуметтік әріптестердің өзара байланысының алдағы жоспарларын талқылады. ҚРКФ төрағасының ақпараты бойынша, өкінішке қарай, республика бойынша өндірістік жарақат фактілерінің өсімі байқалуда. Мысалы, жылдың басынан бергі бес ай ішінде еліміздің кәсіпорындарындағы жұмыс орындарында алынған жарақаттар салдарынан 552 адам зардап шексе, 65 адам қаза болған. С.Дәулеталиннің дерегінше, соның ішінде Түркістан облысында өндірісте 29 жазатайым жағдай орын алған, 34 адам зардап шегіп, 5 адам қаза болды. Көп жағдайда бұл жазатайым оқиғалар өндірістік кеңестер мен еңбек қауіпсіздігі және еңбекті қорғау жөніндегі техникалық инспекторлар жоқ кәсіпорындарда орын алған.
Өз кезегінде облыс әкімі көрсетілген мәселелердің өзектілігін атап өтті. Тараптар жуық арада әлеуметтік әріптестік және әлеуметтік-еңбек қатынастарын реттеу жөніндегі үшжақты комиссия қарауына еңбек саласына қатысты барлық өзекті мәселелерді шығаруға келісті.
Түркістан облысы
