Техникалық қосылу газ тарату желілерінің жеке үйлер мен ғимараттарды газға қосуға дайын екендігін көрсетті. Басқа тұтынушыларды қосу рәсімі қосу-жөндеу жұмыстары аяқталғаннан кейін жалғасады. Қазіргі уақытта Железнодорожный тұрғын үй алабында газбен жабдықтау, тарату желілерінің 96 пайызы салынды. ЖЭО-1/2, тұрғын үй алаптарында үйлерге желілерді тікелей бұру бойынша жұмыстар жүргізілуде.
– Елорда күні қарсаңында ерекше қуанышты жағдайды атап өткен жөн. Бізге көгілдір отын келді. Пеш жағып көрген жандар ғана бізді түсінеді. Қыста аспанымыз түтіннен көрінбейтін. Енді бәрі өзгереді. Көктал тұрғындары – негізінен қарт адамдар. Енді оларға әлдеқайда жеңіл болады, көмір сатып алудың қажеті жоқ, – деді Көктал-1 шағын ауданының тұрғыны Галина Антонюк.
Железнодорожный тұрғыны Сәуле Жүнісова Елбасына аталған тарихи жоба үшін алғыс айтты.
«Табиғи отынға қосылу – біз үшін ұмытылмас оқиға. Бұл барлық жайлылықты қамтамасыз етеді», деді ол.
Елорда әкімі Алтай Көлгінов биылғы жылыту маусымында газ тарату желілері жеке сектордағы 8 мың үйге тартылатынын атап өтті.
«Газдандыру – тұңғыш Президентіміздің тарихи жобасы. «Бес әлеуметтік бастаманың» бірі. Елордаға өткен жылы 1 мың шақырым магистралды газ құбыры тартылды. Газдандыру Мемлекет басшысының бақылауында. Биыл 8 мың жеке үйге газ тарату желілерін салуды жоспарлап отырмыз. Астана күні қарсаңында алғашқы әлеуметтік нысандар мен үйлер газға қосылды. Көктал 1, 2, Агроқалашық, Промышленный, Железнодорожный және Оңтүстік-шығыс ауданында ағымдағы жылыту маусымында бірінші кезеңде газ жүргізіледі. Сондай-ақ ЖЭО-1/2 газға ауыстырылады», деді қала әкімі.
Әкімдік қала тұрғындары үшін тегін есептеуіштер орнатуды қарастыруда. Тұрғындарға газ тарату желілеріне қосылу үшін пеш дайындау қажет. Өндірістік сектор мен тұрғын үй алаптарын газдандыру 3 кезеңде жүргізіледі. Екінші кезеңде Мичурин, Интернациональный, Күйгенжар (1-2 ПК), Тельман (3-ПК), Пригородный, Garden Village және Family Village (4-ПК) тұрғын алаптарына өткізіледі. Үшінші кезекте Ильинка (1-2-ші ПК), Шұбар (3-ші ПК), Өндіріс (4-ші ПК) тұрғын алаптары газдандырылатын болады. Іске асыру мерзімі 2020-2023 жылдарға жоспарланған. Елорданы газдандыру қалаға зиянды қалдықтарды 6 есеге, қатты заттарды 40 мың тоннаға дейін азайтуға мүмкіндік береді.
НҰР-СҰЛТАН
