Талдыкөл табиғи саябаққа айналады

Оқиға • 29 Шілде, 2020

Талдыкөл табиғи саябаққа айналады

14 рет көрсетілді

Елордадағы Талдыкөл маңын абаттандыру, көгалдандыру жөнінде осыған дейін де бірқатар жоба қарастырылған болатын. Оның ішінде Диснейленд орталығын құру сынды күллі астаналықтарды бейжай қалдырмаған ауқымды жобалар болды. Жуырда Нұр-Сұлтан қаласының сәулет, қала құрылысы және жер қатынастары басқармасы аталған көлдің маңынан ашылуы жоспарланып отырған табиғи парктің сызбасын жариялады.

Думан АНАШ

Жоба бойынша, рекреациялық аймақтың аумағы 5700 гектарды қамтиды. Саябақ қаланың оңтүстік-батысында – Қорғалжын шоссесі, Ш.Айтматов көшесі мен К-1 айналма жолы аралығында орналасады деп жоспарланып отыр. Тұжырымдамаға сәйкес, парк бірнеше аймаққа бөлінеді. Оның ішінде орман паркі, сулы-батпақты алқап, хайуанаттар паркі, сафари паркі және этнопарк қарастырылған. Сондай-ақ жобада визит орталық, қонақ үй мен мейрамханалар кешені, балалар мен спорттық алаңдар да көрсетілген.

Қазір жасыл аймақтың табиғи ғылыми негіздемесі жасалған. Парк Қызыл кітапқа енген құстар мен жануарлардың тіршілік ету ортасы ретіндегі табиғи қалпын сақтайды, сонымен бірге студенттерге, биологтарға, ихтиологтарға, орнитологтарға, экологтарға арналған айрықша білім орталығына айналады деп күтілуде.

Парк жұмысына Ұлыбританиядағы тәжірибе ретінде лондондық сулы-батпақты алқаптың үлгісі, Rainham Marshes табиғи паркі, Шервуд орманы мен Minsmere қорығының үлгісі пайдаланылмақ. Қаржы көзі – Ұлыбритания құстарын қорғау Королдік қоғамының биоалуантүрлілікті сақтау бағдарламасы бойынша бөлінген грант.

Айта кету керек, Талдыкөл көлі 1970-2015 жылдары су жинақтау-буландыру қызметін атқарды. Жергілікті дәрежедегі орнитологиялық маңызды аумақта маусымдық миграция кезінде құстардың 200-ге тарта түрін көруге болады, оның ішінде бұйра бірқазан, ақбас үйрек, сұңқылдақ аққу, аққұйрық субүркіт сияқты ерекше түрлері бар. Сондай-ақ көл аумағына тиесілі далалы аумақта өсімдіктердің 98 түрі тіркелген.