Экология • 04 Тамыз, 2020

Дұбығалы көліндегі демалушылар жағалауда күніне 1 тонна қоқыс қалдырады

11 рет көрсетілді

Қазіргі уақытта Мемлекет басшысының тапсырмасы бойынша, ел аумағының көрікті жерлеріндегі демалыс орындарында заңсыз қоқыс орындарын анықтау мен оны жою бойынша кешенді жұмыс жүргізілуде. Өткен аптада Шығыс Қазақстан облысының экология департаменті мен экологиялық қауіпсіздік орталығының мамандары рекреациялық аймақтардағы рұқсат етілмеген қоқыс орындарын анықтау мен оны жою бойынша тексерулер жүргізіп, кезекті рейдті өңірдегі тамаша табиғат мүйістерінің бірі саналатын Дұбығалы көліне жүргізді.

Шығыс өңірінде бұдан бұ­рын Бұқтырма су қоймасының жаға­лауына рейд жасалған болатын. Содан соң бұл іс-шара мемлекеттік қызметкерлер, қоғам белсенділері мен еріктілер арасында кеңінен қолдауға ие бола түскендей. Айта­лық, Дұбығалы көліне жүргі­зілген тексеру барысына Ұлан ауда­нының атқарушы органдары, полиция және коммуналдық қызметі, экологиялық құрылым, кәсіпкерлік өкілдерінен құралған 24 адам қатысты.

Демалыс аймағын қарау барысында қатысушылар көл ма­ңа­йында абаттандырылған жаға­жай­дың жоқтығын, қатты тұр­мыс­тық қалдықтарды жинауға ар­нал­ған контейнерлердің мүл­де қарас­тырылмағанын және бірқа­тар заң­сыз қоқыс алаңдары анық­тал­ғанын атап өтті.

Таврия ауылдық округі әкімі орынбасарының айтуынша, әкім­діктің күшімен апта сайын тазалық жұмыстары жүргізіліп, жағалау аумағынан 5-6 тонна көлемінде қоқыс шығарылады, сонымен бірге демалушыларға әртүрлі түсіндіру жұмыстары жүргізіліп, жадынамалар таратылып тұрады.

– Алайда бұл ретте біздің әлеуе­тіміз бен қаржымыз жеткі­ліксіз деп ойлаймын. Есептеуімізше, көлге бір демалыс күні келушілердің өзі 1 мың адамды құрайды. Егер бір адам күніне 1,1 кило қоқыс қал­дыратын болса, жағалауда күн­де­лікті 1 тоннадан астам қоқыс пай­да болады, – дейді Экологиялық қауіпсіздік орталығының маманы Елена Полянцева.

Сондай-ақ аудан әкімдігі мен демалушылардың тағы бір өткір мәселесі бар. Бұл аталған демалыс орнында ұялы байланыстың жоқтығы. Яғни бұл мәселе төтенше жағдай кезінде демалушыларға жоғары тәуекел тудырып қана қой­май, ауданның бюджетінің қам­тамасыз етуде қиындық әкеледі. Интернеттің жоқтығы кәсіпкерлер тарапынан туристік бизнестен тү­сетін кірістерін жасыруға мүмкін­дік береді, сонымен бірге полиция қызметкерлерінің оқиға орнында хаттама толтыруын қиындатады.

Қоқыс орындарының мәселесін күрделендіріп тұрған мәселенің бірі – рекреациялық аймақтағы жердің айтарлықтай бөлігі сатып алынған және мақсатты түрде пай­­даланыла бермейді. Көптеген жеке­леген аумақтардың жағдайы сын көтермейді, көріктендірілмек тұрмақ бей-берекет қоқыс төгетін орынға айналып кеткен. Заң бойын­ша жер телімінің иесі өзіне тиесілі аумақты жеке қаражаты есебінен тазалап тұруы қажет.

Ұлан ауданы кәсіпкерлік ж­ә­не ауыл шаруашылығы бөлімі өкі­­лінің сөзінше, 2015 жылдан бері аудандағы барлық жер учас­­келеріне ауқымды түгендеу жұ­мыстары жүргізіліп, оның барысында қайтарылып алынған 8 жер телімі Орман қорына тап­сы­рылған. Одан өзге қазір Дұ­бы­­ғалы көліне баратын жаңа жол­­дың құрылысына жобалық-сме­талық құжаттама жасалып, мем­лекеттік сараптамадан өтуде. Сондай-ақ жағалауды көріктендіру жұмыстары құрылысына арналған сызба әзірленді, онда мүгедектердің демалысына арналған жағдай қа­растырылған. 2021 жылы құ­ры­лыс­қа қажетті бюджет қаражатын бөлуге өтінім беру жоспарланып отыр.

– Шығыс Қазақстан облысының қоғамдық кеңесінде экологтар мен кәсіпкерлер, қоғамдық және рухани келісім бойынша сарапшылық жұмыс тобы өкілдерінің қатысуы­мен өткен отырыста өңір басшы­сына демалыс аймағындағы 20 жыл бойы мақсатты түрде пайдала­ныл­маған жер телімдерін қайтарып алуға ықпал етуі үшін өтініш жа­зуға шешім қабылданды, – дей­ді облыстық Қоғамдық кеңестің қо­ғамдық және рухани келісім бойын­ша сарапшылық жұмыс тобының жетекшісі Геннадий Пуссеп.

Айта кету керек, рейдке қа­тысу­шылар хат жазумен ғана шек­теліп қалмақ емес. Экологтар мен қоғам белсенділері экосенбілік өткізіп, жағалаудағы қоқыстың бір бөлігін тазалады. Экология де­партаментінің мамандары жер­гілікті атқарушы органдар мен полиция қызметіне рұқсат етілмеген қоқыс орындарын жою және жергілікті тұрғындар мен демалушылар арасында алдын алу және түсіндіру жұмыстарын күшейту туралы ұсынымдарын жеткізді.

Қоғам белсенділері мұндай рейд­терді тамыз айында өңір­дің басқа да аумақтарында өткі­зіле­тінін, оған қатысуға ниет білдір­ген ұйымдар мен мекемелерді қол­дайтындарын атап өтті. Депар­тамент қызметкерлері сонымен бірге заңсыз қоқыс орындары анық­талған жағдайда Call ор­талықтың 87759524900 нөміріндегі WhatsApp-қа қоқыс орнының фото және видео материалдарын жолдап, орналасқан аумағын хабар­лауға болатынын жеткізді.

Соңғы жаңалықтар

Мұрағаттар мұң шағады

Әдебиет • Бүгін, 19:50

Тарихи нысандар жаңғыртылуда

Қазақстан • Бүгін, 13:05

"Balapan" телеарнасына - 10 жыл

Қазақстан • Бүгін, 11:00

Бүгін – Еңбек күні

Қазақстан • Бүгін, 09:20

Шектен шыққан ахуал жоқ

Аймақтар • Кеше

Атырауда егіз ұл аман-есен табылды

Аймақтар • 25 Қыркүйек, 2020

Ұқсас жаңалықтар