Конференцияда сөз сөйлеген Huawei компаниясының басқарма төрағасы Го Пин кәсіпорындардың және үкіметтердің басқару жүйелерін жетілдірудегі, сондай-ақ «ақылды» кәсіпорындар, ғимараттар және қалалар құрудағы озық тәжірибелері туралы айтты. Оның сөзіне қарағанда, қытайлық компания өзінің серіктестерімен бірлесіп кәсіпорындарға цифрландырудың көмегімен бизнесті дамытуға, ал үкіметтерге басқару сапасын арттыруға көмектесіп, ақпараттық-коммуникациялық технологияларды енгізуде.
– Үкіметтер мен кәсіпорындар цифрлы форматта жұмыс істеуге көшіп, жасанды интеллектіні меңгерген сайын ақпараттық-коммуникациялық технологиялардың алдында теңдесі жоқ зор мүмкіндіктер ашыла түседі, – деді ол.
Бұлтты сервис саласында Huawei бүгінгі таңда әлемнің 23 аймағын қамтып, 1,5 млн-нан астам әзірлеушіні қатарына тартқанын айта кету керек.
Сондай-ақ конференцияда Шэньчжэнь қаласының мэрі Чэнь Жугуй сөз сөйледі. Бұл қала бүгінгі таңда әлемнің «ақылды» орталықтарының біріне арналу бағытында жұмыс істеп жатқанын айта кету керек. Кремний аңғарының баламасы ретінде Қытайда қолға алынған «Үлкен шығанақ» жобасы да осы қаланы қамтиды.
– «Үлкен шығанақ» жобасы туғызған мүмкіндіктерді Гуандун, Гонконг және Макаомен қатар Шэньчжэнь аймағы да барынша пайдалануға тырысады. Huawei компаниясының және басқа озық технологиялардың артықшылықтарын қолданудың, сонымен қатар «ақылды» ғимараттарды салудың нәтижесінде біздің қаламыз күннен-күнге «ақылды» болып келе жатыр. 5G технологиясы ұсынған мүмкіндіктерді біз барынша қолдаймыз, 5G-ді түрлі салаларға белсенді енгіземіз, өнеркәсіптік интернетті дамытамыз. Сонымен қатар шағын және орта бизнестегі кәсіпорындардың цифрлы түрленуіне қолдау көрсетеміз. Біз технологиялардың өмірді жақсартатын, қалаларды барынша қарқынды дамытатын әлеуеті бар екеніне сенеміз, – деді ол.
Отыз жылдан астам тарихы бар Huawei ақпараттық-коммуникациялық технологиялар саласындағы әлемдік алпауыттардың бірі екені белгілі. 194 мыңнан астам қызметкері бар компания әлем бойынша 170-тен астам елдегі 3 млрд-дан астам адамға «ақылды» құрылғы мен цифрлы инфрақұрылым ұсыну сынды қызмет көрсетеді.
