Мекеме таратқан хабарламада былай деп жазылған: «Осы жылдың 6 қазанында Қарағанды қаласындағы ҚАЖ-да кішкентай қыз баланы зорлады деген күдікпен қамауда отырған ер адамның мүрдесі табылды. Шақырылған жедел медициналық көмек бригадасы өлімді растады. Өлімнің алдын ала себебі – суицид. Тексеру барысында қайтыс болғанның денесінде қандай да бір зақымның белгілері анықталған жоқ...».
Еске салар болсақ, биылғы 23 шілдеде Сәтбаев қаласында елді елең еткізген қылмыстық оқиға болған еді. Кеншілердің шағын қаласындағы көпқабатты үйлердің біріндегі аулада жүрген бес жасар қыз бала кешке қарай ұшты-күйлі жоғалып кеткен болатын. Бұл суыт хабардан құлақтанған қала жұрты тәртіп сақшыларымен бірге қаланы тінтіп, іздеуге атсалысқан еді. Жоғалған бала екі-үш сағаттан кейін әлгі үйдегі пәтерлердің бірінен табылды. Сөйтсе, кішкентай қызды азғын еркек аузын скотчтап, үйде тығып ұстап отырған екен...
Осы хабарды ести салысымен ашу-ызаға бой алдырған бір топ тұрғын күдіктіні қолдарына беруді талап етіп, полиция қызметкерлерімен қақтығысуға дейін барған. Бұл турасында «Egemen Qazaqstan» газетінде толығырақ жазылды да («Сәтбаевтағы сорақылық», №141, 27.07.20 ж.).
Сонымен, бес жастағы бейкүнә сәбидің обалына қалған, қала халқын дүрбелеңге салған азғынды ажал оғы осылайша абақтыда қамауда отырған жерінде тапты...
Ал екінші жаңалыққа келсек, әлеуметтік желілерде әзілкеш Тұрсынбек Қабатовтың атындағы темір тұлпардың Қарағанды облысының аумағында, нақтырақ айтсақ Нұра ауданындағы Ахмет ауылының маңында адам қағып өлтіргені туралы ақпарат желдей есті. Жаңалық енді жарқ еткенімен, бұл оқиға өзі бұдан бір жыл бұрын, яғни 2019 жылдың 13 қазанында болған екен. Сол күні кешке Теміртау – Нұра – Нұр-Сұлтан трассасында жол талғамайтын «Лексус» маркалы көлігі жоғары жылдамдықпен келіп адам қаққан. Жапа шегуші 34 жастағы Ерлан Омарқұлов оқиға болған жерде тілге келмей кетіпті. Кейін белгілі болғандай, аталған көлік Тұрсынбек Қабатовтікі болып шығады. Ал оны жүргізген 25 жастағы әзірге есімі белгісіз жас жігіт екен.
Бүгінде жалғыз ұлынан айырылған Дәджан Омарқұлованың құқық қорғаушыларға деген өкпесі қара қазандай. Ол кісінің айтуынша, тергеушілер болған оқиғаны әділ, деректерді әдейілеп бұрмалаған. Мәселен, Д.Омарқұлова прокурорға жазған шағымында тергеушінің істі жапа шегуші тараптың қатысуынсыз жүргізгенін, сондай-ақ оның прокурордың келісімінсіз айғақ заттарды жойып жібергенін мәлім етеді.
Ал қылмыстық істің өзіне келер болсақ, тергеушінің ұйғарымымен қылмыс құрамы жоқ деген уәжбен тоқтатылған екен. Яғни бар кінә жапа шегуші марқұмға аударылып, апат жасаған күдікті жүргізуші жазадан құтылып кеткен. Тергеу материалдарына сенсек, қаза болған азаматтың қанынан алкогольді ішімдіктің белгілері анықталды деген дерек бар. Ал джипті тізгіндеген 25 жастағы жігіт оқиға болардан бұрын жүргізуші куәлігінен айырылған екен.
Қазіргі таңда бұл оқиғаға қатысты қылмыстық істі прокуратура қайтарып алып, облыстық полиция департаментінің басқа тергеушісіне жіберді. Енді марқұмның анасының ғана емес, жаңа тергеушінің де белгілі әртіске қатысты бірқатар сұрақ туындауы мүмкін. Мәселен, жапа шегушінің анасы Тұрсынбек Қабатовтың өзінің заңды автокөлігін жүргізуші куәлігінен айырылған адамға бергені үшін осы уақытқа дейін не себептен жауапкершілікке тартылмай келгеніне наразы.
Айтпақшы, осы әңгіме әлеуметтік желіде көтеріле бастағанда әзілкеш Қабатов эфирге шығып, болған оқиғаға өз мүддесі тұрғысынан түсінік берді. «Мен ол жігітке «қолыңмен істегеніңді мойныңмен көтер, мен араласпаймын» деп айттым. Біреулер «Тұрсынбек ақша берді» деді. Мен ешкімге xабарласқан емеспін. Бұл іске араласқан жоқпын. Маған қойған сұрақтарға жауап бердім. Мен оның куәлігі жоғын білмеймін. Сондықтан айтарым: қазір әртүрлі ақпарат тарап жатыр, иә, мен оның басында болмасам да, көлік сенікі ғой деп кінә тағып жатқандар болса, мен кешірім сұраймын. Бірақ мен ол көліктің ішінде болған емеспін. Сіздерге айтарым осы», деп ақталды әртіс.
Қалай болған күнде де, жұрттың назарын аударған бұл оқиғалардың немен аяқталғанын алдағы уақытта назарда ұстайтын боламыз.
Қарағанды облысы
