Инвесторларға арналған жолкөрсеткіш

Экономика • 27 Қараша, 2020

Инвесторларға арналған жолкөрсеткіш

38 рет көрсетілді

Жуырда Президент жанындағы шетелдік инвесторлар кеңесінің кездесуінде коронавирус пандемиясы кезінде еліміздегі экономикалық және инвестициялық белсенділікті қалпына келтіру жөніндегі шаралар егжей-тегжейлі қаралғаны белгілі.

Арнұр АСҚАР

Жуырда Президент тапсырмаларын орындау және Фармөнеркәсіпті дамытудың кешенді жоспарын іске асыру мақсатында «СҚ-Фармация» Kazakh Invest-пен бірлесіп әлеуетті инвесторларға арналған INVESTMENT GUIDE BOOK жолкөрсеткішін дайындады. Жолкөрсеткіштің міндеті – «Бір терезе» қағидаты бойынша ірі дәрі-дәрмек брендтері бар елдерге қаптамадан бастап өндірістің толық цикліне дейін кіру алаңын қамтамасыз ету.

INVESTMENT GUIDE BOOK қолда бар инвестициялық артықшылықтар туралы ақпарат беру, отандық және шетелдік инвесторлар үшін рәсімдердің ашықтығы мен айқындығын қамтамасыз ету мақсатында әзірленді. Оның міндеті инвесторларға инвестициялық жобаны іске асырудың барлық кезеңдерінде қолдау көрсету, туындайтын мәселелерді уақтылы шешу. Ол «Бір терезе» қағидаты бойынша инвесторлардың мемлекетпен байланысуының ортақ нүктесіне айналуға тиіс.

Жолкөрсеткіштің «Отандық өндірушілерден дәрілік заттар мен медициналық бұйымдар сатып алу рәсімдері» бөлімінде дәрі-дәрмектерді, медициналық бұйымдарды және медициналық техниканы жеткізудің ұзақ мерзімді шарттарын жасасу тәртібі, келісімшарт өндірісі бойынша сатып алу тәртібі, шарттар жасасу өлшемшарттары және конкурстық комиссияның құрамы егжей-тегжейлі сипатталған.

Сондай-ақ дәрі-дәрмекпен қамтамасыз ету, бағаларды реттеу мәселелерін, дәрілік заттар мен медициналық бұйымдарды сатып алу қағидаларын және тиісті фармацевтикалық дағдыларды реттеуші нормативтік-құқықтық актілердің барлық тізбесі жасалды.

Ақпараттық-талдау блогында Қазақстанның фармацевтикалық нарығының құрылымы және «СҚ-Фармация» жұмысының соңғы 10 жылдағы ұзақ мерзімді шарттар шеңберінде сатып алуды талдау ұсынылған. Сондай-ақ құжатқа «Бәйтерек» холдингінің, Qazindustry, «Астана» ХҚО-ның қаржылық және инвестициялық институттары түріндегі мемлекеттік қолдаудың қолданыстағы шаралары енгізілген.

2025 жылға қарай Қазақстан өз фармөндірісінің үлесін 50%-ға дейін арттыруды көздеп отыр. Қазіргі уақытта жергілікті нарықтағы отандық өндірушілердің үлесі 17%-ды құрайды. Бұдан басқа, медициналық жабдықтар мен шығыс материалдарының өндірісі белсенді дамитын болады. Бұл салалар инвестиция үшін ашық болады әрі жобаларға мемлекет тарапынан толық қолдау табатын болады.

Жуырда Үкімет фармацевтикалық өнеркәсіпті дамытудың 2025 жылға дейінгі кешенді жоспарын қабылдағаны белгілі. Оған сәйкес жеке фармацевтикалық өндіріс үлесін 50%-ға дейін арттыру және 30-дан астам ірі фармацевтикалық өндірісті іске қосу жоспарлануда.

«СҚ-Фармация» – дәрі-дәрмектердің бірыңғай дистрибьюторы. Компания тегін медициналық көмектің кепілдік берілген көлемі шеңберінде дәрілік заттарды сатып алуды жүзеге асырады. Сондай-ақ дәрі-дәрмектерді сақтау, мемлекеттік медициналық мекемелерге логистика процестерін ұйымдастыру жұмыстарымен де айналысады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз