СЕРТИФИКАТЫМЫЗ СЫРТТА МОЙЫНДАЛАТЫН БОЛАДЫ

Астанада мемлекеттік метрологиялық мекемелердің Еуразиялық ынтымақтастық комитетінің 20 мәжілісі болып өтті. Жыл сайын әр елде өтетін маңызды басқосу биыл еліміз елордасында өтіп отыр. КООМЕТ – аймақтық метроло­гия­лық ұйымы 1991 жылы еуразия­лық аймақтық елдерде өлшем бір­лі­гін қам­тамасыз ету мәселелерін тиім­ді ше­шу­ге, ұлттық экономика ын­тымақтас­ты­ғын дамытуға және ха­лықаралық сау­дада техникалық тос­қауылдарды жою­ға жәрдемдесу мақсатында құрылған болатын. Оған 18 ел, атап айтсақ, Ар­ме­ния, Әзір­бай­жан, Беларусь, Бол­га­рия, Гер­ма­ния, Грузия, Қазақстан, Қыр­ғыз­стан, КХДР, Куба, Литва, Мол­дова, Ресей, Румыния, Словакия, Тәжік­стан, Өзбекстан және Украина мүше. Бұл жолғы отырысқа АҚШ, Куба, Франция, Германия се­кілді елдер қатыса алмады. Оған Ис­лан­дияда оянған жанартау себепші болып отыр. Ал еліміз КООМЕТ ко­ми­­теті құрамына 1998 жылғы қара­ша­дан бастап мүше. Комитеттің бас­ты қыз­меттері эталондардың өзара сәй­кес­тігіне жетуге, өлшеуіш аспап­тарға және оларды метрологиялық бақылау әдістеріне қойылатын та­лап­тардың ұй­ға­рымдылығына, ұлт­тық өлшеу серти­фи­каттарының ба­ла­малылығын тану­ға, метрология­лық қызметтің жай-күйі туралы ақ­па­рат алмасуға, өзара ме­тро­ло­гия­лық қызмет көрсетуге жәрдем­де­суге бағытталған.  “КазИнМетр” РМК бас директоры Василий Михал­чен­ко­ның айтуынша, еліміздің ме­тро­ло­гия және стандарттаудың халық­ара­лық ұйымдарына мүшелікке енуі үл­кен мәртебе. Өйткені, Кедендік одақ­­тың құрылуы, одан әрі бірыңғай эко­но­микалық кеңістікке өтуге орай, отандық өнімдердің сапасы мен бә­се­кеге қабілеттілігі, олардың шетелдерде мойындалуы біз үшін маңызды. Сон­дықтан бүгінгі кезекті отырыс еліміз өлшеу құралдарының мүмкіндігін ха­лықаралық деңгейге жеткізуге жасал­ған тағы бір қадам, деді ол. Біздің өл­шеу мүмкіндіктері­міз енді әлем бой­ын­ша мойын­далатын болады. В.Ми­халченконың айтуынша, Қазақстан өлшем мен көлемнің халықаралық ұйымына 52-ші мүше болып еніп отыр. Әлемдік рынокқа шығатын өнімнің сапасын анықтайтын мұндай құрылымдарға қатысу олардың жо­лын­дағы кезекті кедергілерді жоюға мүм­кіндік береді. Сондай-ақ Қазақ­стан сапа сертифи­кат­тарының шетел­дерде де мойын­да­латын күні алыс емес көрінеді. Өйткені, сала бойынша Қазақстанда ғылыми мамандардың негізгі базасы қалыптасқан. КООМЕТ жұмысына қатысқан елдер өздерінің калибрлеу және өлшеу мүмкіндіктерін халықаралық деңгейде дәлелдеу мүмкіндігін алуда. Ал бұл кез келген қызмет саласында өл­шеу нә­ти­желеріне өзара сенім қа­лып­тас­ты­руға және халықаралық сау­да, ғылы­ми-техникалық ынтымақ­тас­тық пен нормативтік құжаттамаларды әзірлеуге қатысты өте үлкен уағда­лас­тықтар үшін техникалық базаны құ­руға әсер етеді. Венера ТҮГЕЛБАЙ.