Бұл шығарма қазақ сахнасында алғаш рет қазақ тілінде қойылып отыр. Туындыны қазақшаға аударған – Мемлекеттік сыйлықтың лауреаты, ақын Гүлнар Салықбай. Ал қоюшы-режиссері – Ерназар Жаңатілек.
Жаңа қойылымның шымылдығын ашқан театр директоры, Қазақстанның еңбек сіңірген қайраткері Асхат Маемиров «Өлі жандар» спектаклі театр ұжымының жетінші премьерасы екенін атап өтті. «Осыдан тура жүз жыл бұрын, Н.Гогольдің атақты «Өлі жандар» поэмасына М.Булгаков инсценировка жасады. Ақ өлеңмен жазылған поэманы театр тілінде сөйлеткен болатын. Ал енді М.Булгаковтың «Өлі жандары» қазақ сахнасы кеңістігінде тұңғыш рет қазақша сөйлегелі тұр. Сонымен қатар биыл үлкен әлемдік әдебиеттің классигі болып есептелетін М.Булгаковтың 130 жылдығы. Сондықтан да адамзатқа ортақ әйгілі әдеби драмаларды қалдырған ұлы драматургке деген біздің жастарымыздың тағзымы деп есептесек болады», деді А.Максимұлы.
«Өлі жaндap» пьесасы адамдардың өмір сүруге деген құштарлығын ашатын туынды. Сондай-ақ қоғамның өзекті мәселелерін көтеріп, оларға өзіндік шешім де айтады. Мәселен, сыбайлас жемқорлық. Ол өз кезегінде, мемлекетті құлдыратып, жетістіктерді жоққа шығарып, адамдардың рухани өміріне қауіп төндіретін індет. Бұл – барша адамзатқа ортақ шындық. Туындыда өзекті мәселелер ащы әзілмен, ойлы күлкімен айтылып, көрерменді шынайылық, адалдық әлемінің тереңіне бойлатады.
Айта кетейік, бұл – театрдың жас режиссері Ерназар Жаңатілектің екінші қойылымы. Ол бұған дейін Ф.Достоевскийдің «Ұлдар» спектаклін қойған болатын. Премьераның дайындалу барысы туралы айтқан режиссер, жаңаша жанрдың ерекшелігіне тоқталды. «Траги-фарс жанрында көбінесе актердің ойынында, сахна декорациясында, музыкада еркіндік бар. Яғни сюжет заманауи фарс түрінде ойналады. Ал спектакльді дайындауға бір жарым айдай уақыт кетті. Мұндағы басты идея – бас кейіпкер Чичиковтің салдары ауыр соққан қателерін көрсеткіміз келді. Жалпы, бұл қойылымда жағымсыз кейіпкер жоқ: бәрінің өзіндік жақсылы-жаманды қасиеттері бар», деді ол.
Премьераны тамашалаған Парламент Мәжілісінің депутаты, ақын Мақпал Мыса театр жастарының ізденімпаздығы, жаңашылдығы, бұл шығармаға креативті оймен барулары көрерменге өте жоғары әсер қалдырғанын айтты. «Негізі, шығарманың түпнұсқасын оқып қарағанда әсері бөлек болады. Оны қойылым арқылы көру тіптен басқа атмосфера береді. Театр өнерінің ерекшелігі де сол шығар, рухыңды қозғайды, ерекше әсерде боласың. М.Булгаковтың жалпы шығармалары өте ерекше. Астарлы оймен жеткізеді. Көрермендерге жалпы ашық нәрсе айтпайды. Көрермен өзі ой түюі керек. Қойылымда маған жастардың шынымен де таланттары қатты әсер етті», деді ақын.
Чичиков рөлін – Асылхан Төлепов пен Аман Ғұмаров, Маниловты – Абзал Арапов, Михаил Семенович Собакевичті – Азамат Болатов, Плюшкинді – Ақәділ Иманғали, Ноздревті – Қазыбек Есқара, Настасья Петровна Коробочканы – Мақпал Дүйсен, Илья Ильичті – Шалқар Мұралтай, Полицеймейстерді – Саламат Мұқашев, Қамқоршылық кеңесінің хатшысын – Талғат Кеңес, Мавраны – Альфия Хайзуллиева, Мижуевті – Әлихан Әлішер, Петрушканы – Еламан Иманбаев, Селифанды Аққанат Қуандық сомдады.
