– Мұнай өндіру көлемі 2025 жылға қарай 28 пайызға артып, 60 млн тоннаға жетеді. Бұған «Теңіз» кен орнындағы «Келешек кеңейту» жобасы арқылы жылына мұнай көлемін 12 млн тоннаға арттыру, «қара алтын» өндіруді жылына 2 млн тоннаға ұлғайтатын «Қашаған» кенішіндегі кешенді іс-шаралар мүмкіндік беруі тиіс. Сондай-ақ мұнай-газ химиясы саласын дамыту мақсатында арнайы экономикалық аймақта жалпы құны 6,1 трлн теңгені құрайтын төрт жаңа жоба жүзеге асырылады, – дейді Махамбет Досмұхамбетов.
Әкімнің айтуынша, осындай іргелі істер атқарылғалы отырған Атырауда биылғы бес айда бюджетке аударылған салық көлемі 559 млрд теңгені құраған. Оның ішінде республикалық бюджетке 384 млрд теңге салық аударылса, Ұлттық қорға 357 млрд теңге түсіпті. Жыл басынан бері негізгі капиталға 1 трлн 15 млрд теңгенің инвестициясы салыныпты. Енді мұндай инвестиция жыл соңына дейін 3,8 трлн теңгені құрайтыны күтіліп отыр.
– Өнеркәсіп өнімінің көлемі бес айда 3,2 трлн теңгеге жетті. Осы кезеңде 19,5 млн тонна мұнай, 10,2 млрд текше метр ілеспе газ өндірілді. Сондай-ақ кәсіпкерлікті қолдау картасы аясында 837 млрд теңгенің бес жобасын жүзеге асырып, 560 жұмыс орнын ашу жоспарланды, – дейді облыс әкімі.
Махамбет Досмұхамбетов өңір тұрғындарын жиі мазалайтын түйінді мәселелерге де тоқталды. Әсіресе атыраулықтарды экологиялық ахуал алаңдатады. Осы орайда былтыр Атырау қаласының аумағынан тіркелмеген 484 қоқыс орны жойылған. Ал биылғы жыл басынан бері ғарыштық мониторинг арқылы шаһар аумағынан тағы да 94 заңсыз қоқыс орны анықталыпты. Оның 39-ы жойылып, 42-сінде тазалау жұмыстары жүргізілуде. Ал қалған 13 қоқыс орнының иелері анықтау қолға алынған.
– Президенттің 2025 жылға дейін орман алқабында жаппай тал егу мен елді мекендерді көгалдандыруға қатысты тапсырмасына орай ауқымды жұмыс басталды. Биыл 700 мыңға жуық екпе, 50 мыңға жуық көшеттер егілді. Алдағы бес жылда облыстағы орман қорының аумағына 7 млн көшет, ал елді мекендерге 540 мың тал егу жоспарланып отыр. Өңірдегі «Теңізшевройл», NCOC, Атырау мұнай өңдеу зауыты және «Ембімұнайгаз» сынды ірі мұнай-газ кәсіпорындарымен көгалдандыруға қатысты меморандум жасалды. Бұл кәсіпорындар алдағы күзде арнайы бөлінген аумақты көгалдандыруды бастайды, – деді әкім.
Атырау қаласының тұрғындарын атмосфералық ауа сапасы алаңдатады. Бұл – ондаған жыл бойы тұрғын үйлер мен кәсіпорындардың кәріздік суларын тазарту қондырғыларының болмауынан туындаған мәселе. Аталған түйінді мәселені оң шешу үшін 2021-2025 жылдарды қамтитын кешенді іс-шаралар қабылданды. Соның ішінде биыл қаланың сол жақ бөлігіндегі жаңа кәріздік-тазарту имаратын іске қосылады.
Тағы бір мәселе – әлеуметтік маңызы бар азық-түліктің бағаны реттеу. Әкімнің мәліметінше, 1 млрд 100 млн теңгеден асатын тауарлық-қаржылық тұрақтандыру қоры қалыптастырылды.
– Былтырғы күзде көкөніс өнімдерінің бағасын тұрақтандыру үшін құрылған қорда 260 тонна картоп болды. Сәуірге дейін тұрақтандыру қоры арқылы бағаны реттелді, – дейді М.Досмұхамбетов. – Қазір маусымаралық кезең болғандықтан, сәбіз бен картоп бағасы көтерілді. Қазір оңтүстік өңірден және Ресейдің көршілес облыстарынан картоп жеткізу іс-шарасы қабылданып, баға төмендеді. Мәселен, бір апта бұрын картоп бағасы 400 теңге болса, қазір 310 теңгеден саудалануда. Енді апта сайын баға төмендейді. Өйткені өзге өңірлерден, Ресейдің көршілес облыстарынан картоп жеткізіледі. Оған қоса жергілікті өнім де шығады.
Өңірдегі Жайық, Ойыл, Жем, Сағыз өзендеріндегі су көлемінің азаюы да ең өзекті мәселеге айналып отыр. Әкімнің пікірінше, әсіресе Жайық өзеніндегі ахуал – мемлекетаралық мәселе.
– Жайық өзеніндегі орташа жылдық ағын – 9,5 млрд текше метр су. Соңғы жылдары Жайықтың суы азайып, 3,5 млрд текше метрге жетті. Ал биыл өзенге келген су бұрынғыдан біршама көбейіп, 5 млрд текше метрді құрады. Ал Мұғалжар тауынан бастау алатын Ойыл, Жем өзендеріне су келмей қалды. Осыған орай Ақтөбе облысының басшыларымен ақылдастық. Арнайы топ Ойыл өзенінің бойында қандай бөгеттер барын зерттеді. Жем өзеніндегі ахуалға байланысты осындай топ зерттеу жүргізеді. Бұл өзендердегі қазіргі ахуалға қардың аз түсуі, құрғақшылық секілді табиғи құбылыстар әсер етіп отыр, – дейді М.Досмұхамбетов.
Атырау облысы
