Аймақтар • 24 Тамыз, 2021

Инна атқарған игі істер

268 рет
көрсетілді
10 мин
оқу үшін

«Қазақстанның 100 жаңа есімі» жобасы жеңімпаздарының өткен өмір өткелдері мен бағындырған биік белестеріне зер салып көрген адам табыстың табан астында келмейтініне көз жеткізе түседі. Бүгінде іргелі шаруашылықты бас­қарып, еліміздің экономи­ка­лық-әлеуметтік дамуына елеулі үлес қосып жүрген Инна Кор­нее­ваның тағдыры да қа­йыс­пас қайсар мінез бен табан­ды ең­бектің қоспасынан өрілген.

Инна атқарған игі істер

Инна Робертовна осыдан төрт-бес жыл бұрын ғана күнұзақ қазан-ошақтың айналасынан ұзамайтын қарапайым үй шаруасындағы әйел еді. Диқаншылығын дүйім облыс біле­тін әйгілі Корнеевтер әулетіне ке­лін боп түскеніне де біраз жыл өткен. Үйге келімді-кетімді қонақ көп. Сол кісілердің ас-суын әзірлеп береді. Мұ­ның сыртында бала тәрбиесімен айна­лысады. Денисов ауданындағы Свер­длов елді мекеніне орналасқан «Колос» ЖШС-ін басқаратын әкелі-ба­лалы екі Александр да таңның аты­­сынан күннің батысына дейін үй көрмейді. Бірі қайын атасы, бірі құ­дай қосқан қосағы – екеуі де күні бойы алқапта жүреді. Инна сырттағы шар­уаға бас қатырмайтын. Әйел адам үшін отбасының берекесін қорып, үйде шаруа басты атасы мен ерін күтіп, төр­де­гі бесігін тербетіп отырғаннан асқан бақыт бар ма? Өмір осылайша бір қалыппен өтіп жатты. Осы бір алаң­сыз күндерімен қош айтысып, өзі­нің де ат жалын тартып мініп, үлкен шаруа­шы­лықтың тізгінін ұстауға тура келе­ті­нін Инна ол кезде қайдан білсін...

Құдай бір айналдырғанды шыр айнал­дырады деген рас, алдымен ір­гелі шаруа­шылықтың негізін қалаған қ­айын­атасы Александр Анатольевич қай­тыс болды. Енді есін жия бергенде жұбайы Александр Александрович жарық дүниемен мезгілсіз қош айтысып кете барды.

Әкесі қайтыс болғаннан кейін Алек­сандр етті мал басын көбейтуге күш салған. Ауылға бұрын-соңды Де­ни­сов ауданында болмаған абердин-ангус сиырларын алып келген. Арғы тегі Шотландиядан тараған асыл тұ­қым­ды жануарлар қазір Свердловтан он шақты шақырым қашықта жатқан Ақсай ауылындағы фермада өсіп-өніп жатыр. Ақсай – бұрынғы кеңшардың бөлімшесі. Тұрғындар көшіп кеткен соң, мұндағы жартылай бұзылып, ырсиған қаңқасы ғана қалған алып сиыр қораларының орнын қазір мал тұ­ра­­тын бірнеше кең ғимараты, бұзау­лар­ға арналған ангары, айналасы ат шаптырым бордақылау алаңы, жабық жемдеу қорасы бар заманауи кешен басқан. Қаладан кездестіретін кең са­райға бергісіз малшылар үйі де осында. Кешеннің ішінде бірнеше құдық бар. Су малшылар тұратын үйге де, мал тұратын қораға да осы құдықтардан келіп тұр.

Александрдың мезгілсіз қазасы Ин­наның қабырғасын қаусатып-ақ кетті. Жалғыз ұлын құшақтап асқар таудай ер азаматының артында аңырап, қайғыдан қан жұтып қалған жесір әйелдің осынау опасыз дүниені бір сәт­те-ақ тәрк етіп тастап кеткісі келген кездері де болған.

– Александр қайтқанда ұзақ күй­зе­ліске түстім. Өзім үй шаруа­сын­­дағы әйел­мін, соңғы жылдары ғана жол­да­­сыма анда-санда көмек­те­се бас­та­ған­мын. Ол мені аудан орта­лы­ғы­на кейбір құжаттарды тіркеуге, тиісті ме­­ке­мелердің біріне бір қағаздарды апа­­рып беруге, банкке құжат апаруға жұ­м­сап тұратын. Шаруашылықты бас­қа­ру ісіне араласпайтынмын. Бірақ біз­­дің серіктестікке қарасты жанар­май орталығы, асхана сияқты құры­лым­дардың бәрінде 1-2 жылдан жұ­мыс істедім. Мұндағы адамдардың бәрін танимын. Сондықтан көп ойланып жатпастан, серіктестікті басқару ісіне кірісіп кеттім. Өйткені мен еңсе тік­темесем, шаруашылық тоқтап қа­ла­ды. Жұмысшыларға жұмыс керек, ж­а­лақы алу керек. «Колос» – осы ауыл­ды ұстап тұрған жалғыз шаруа­шы­­лық. Сондықтан серіктестік тараса, ауыл да тарап кетеді. Нағыз қиын ке­зеңде күйректікке салынып жата бер­сем, жолдасым жолға қойып кеткен кәсіпорын да, ауыл да бірте-бірте ыды­рап кетеді. Осылайша, өзіме үлкен жауап­кершілік жүктелгенін түсіндім. Бойымды жинап алып, дереу жұмысқа кірісіп кеттім, - деді Инна Робертовна.

Свердлов ауылында шіркеу тұр­ғы­­зып, ескі мектепті қайта қал­пы­на келтірген де осы «Колос» серік­тес­­тігі. Инна да қарап қалған жоқ, шар­уа­шылықты басқаруды қолға ал­ған­нан кейін 2019 жылы бір жазда ауыл жастарына үлкен стадион са­­лып берді. Бұл стадионда жыл са­йын Александр Корнеевті еске алу тур­­нирі өтіп тұрады. Кәсіпкер ауыл спортын дамыту мақсатында кіш­кен­тай балаларды спортқа баулитын бапкер алғызған. Қазір ауыл бала­лары бірнеше спорт түрінен жат­ты­ғу жасап жүр. Ауылда бала аз. Соған қарамастан, Свердлов жастары аудан­дық жарыстарда жеңіске жетіп жүр. Таяу­да Инна ауыл көшелеріне жарық орнат­ты. Мұның сыртында, стадион мен шіркеудің күтімін де өз мойнына алып отыр.

– «Колос» серіктестігін құру, үлкен шар­уашылықты қалыптастырып, да­мы­ту жолында мен үшін екі бірдей аяу­лы адам өмірінің соңына дейін күш-жігерін сарп етті. 2013 жылы Александр Анатольевич, 2017 жылы Саша қайтыс болды. Сондықтан менің олар­дың ісін әрі қарай жалғастырмай, орта жолда тоқтатып тастауға хақым бол­мады. Қазір ұлым ер жетіп келеді. Оның осы серіктестіктің тізгініне ие бола­тын күн де алыс емес деп үміт­те­немін. Мен – әке мен баланың ара­сындағы ұрпақ сабақтастығы үзі­ліп қала жаздаған кезде дәнекерлік мін­детімді атқаруға келген аралық буын ғанамын. Ең қиын кезеңде осы ауыл­дағы көпшілік тұрғындардың, жер­гілікті мамандардың қолдауына сүйен­дім. Сондықтан біздің ауылды тұр­ғындардың бәріне ортақ мақсатқа жұ­мылған үлкен отбасы десем болады, – деді серіктестік басшысы.

Бүгінде Инна Корнеева басқаратын серік­тестік асыл тұқымды мал шаруа­шы­лығын дамыту бойынша селек­ция­лық жұмыстар жүргізумен айналыса­ды.

Кәсіпкер былтыр фермаға күн­нен қуат алатын құрылғы орнатқан. Айтуынша, жасыл технологияны пай­да­­лана бастағалы ферманың шы­ғыны да айтарлықтай азайған.

– Біріншіден, шаруашылығымыз шалғай жерде орналасқандықтан, бізге күн көзінен қуат алатын батарея­ларды пайдаланудан басқа амал жоқ. Өйткені электр желісі алыс, бағана ор­на­тып, желі тарту аса қымбатқа түседі. Біз фермадағы құдықтардан төрт жыл бойы генератор арқылы су тар­тып келдік. Бұл да көп шығынды керек етеді. Тек су алу үшін жылына 15 тонна солярка шығындайтынбыз. Жанармайдың қазіргі бағасымен есеп­те­сек, бұған аз ақша кетпейді. Гене­ра­торлар күні-түні гүрілдеп тұрады, бұл да бір ыңғайсыздық туғызатын жағ­дай. Сосын бірінен соң бірі сына береді, оны үнемі жөндеп отыру керек. Бір генератордың өзі екі млн теңге тұрады, оны жөндеу үшін де біраз ақша керек. Енді міне күн панельдерін орнатқанымызға үш жыл өтті. Осы үш жылдың ішінде күннен қуат алатын заманауи құрылғы өзін өзі ақтап шықты. Мұның сыртында, күн батареялары беретін электр қуаты тегін, ол үшін ақша шығындаудың қажеті жоқ, тек жылына бір-екі рет аккумуляторларды жаңалап қоямыз. Бұған кететін шығын дизелді генераторға кететін шығынмен салыстырғанда көк тиын боп қалады, - деді И.Корнеева.

Биылғы қуаңшылық Денисов ауда­ны­на да ауыр тиді. Бұл өңірде қар ерігеннен кейін екі ай бойы бір тамшы жаңбыр тамбады. Ең алғашқы жауын шілдеде ғана жауды.

– Ол жауын пайдасын да, зиянын да келтірді десек болады. Қазір біз егінді бірден орып ала алмай жатырмыз. Өйткені шілденің соңындағы ақ жауыннан кейін бидайдың сабағы әлі жасыл болып тұр. Сондықтан, алдымен, сабақты жығып алып, кепкен соң ғана дәнін жинап жатырмыз. Бұл да жанармай шығынын екі есе арттырады. Соған қарамастан, «Колос» ЖШС-де жұмыс істейтін 126 адамның үйіне жемшөп, сабан сияқты қысқы мал азығын тегін түсіріп бердік, – деді кәсіпкер.

Инна Корнеева биыл «Қазақстанның 100 жаңа есімі» жобасының жеңімпазы атанды.

«Айтулы жобада жеңіске жеткенім – ең алдымен, кезінде маған үлкен қолдау көрсеткен ауылдастарымның еңбе­гінің нәтижесі деп білемін. Бүгін­де ауылда жақсы өмір сүруге болады. Сондықтан, әсіресе, шалғай елді ме­кендерді көркейтуге күш жұмсау керек. Өйткені ауыл шаруашылығы – бүтін экономикамыздың ажырамас ең маңызды бөлігі. Ауыл құлдыраса, экономика да тығырыққа тіреледі», дейді жоба жеңімпазы.

Қостанай облысы