Саясат • 08 Қазан, 2021

Еркін ақпарат және тәжірибе алмасу алаңы

73 рет көрсетілді

Саяси қуғын-сүргін құрбандарын толық ақтау жөніндегі Мемлекеттік комиссияның жобалық кеңсесі Алматы облысының әкімдігімен бірге елордада Қазақстанға күштеп жер аударылған және арнайы қоныс аударылған халықтарға қатысты ақпаратты жинау мен өңдеу тақырыбында семинар өткізді.

Саяси қуғын-сүргін құрбандарын толық ақтау мәселесімен айналысып жатқан ғалымдар елімізге күштеп жер аударылған және арнайы қоныс аударылғандарды зерттеу мәселесіне қатысты тәжірибелерін ортаға салды. Жетекші ғалымдар арасында тәжірибе және ақпарат алмасу мақ­сатында ұйым­дас­тырылған кезекті респуб­ликалық тақы­рыптық семинарға барлық өңірлік комис­сиялардың жұмыс топ­тары­ның өкілдерімен қатар, мемлекеттік қыз­мет­керлер, ғалымдар, қоғам қайраткерлері, сарапшылар мен еріктілер қатысты.

Жиынның тізгінін ұстаған Саяси қу­ғын-сүргін құрбандарын толық ақтау жө­ніндегі мемлекеттік комиссияның мүшесі, мемлекеттік комиссияның қызметін қолдау жөніндегі жобалық кеңсенің жетекшісі Сабыр Қасымов Мемлекеттік комиссия зерттеп жатқан саяси қуғын-сүргін құр­бан­дарының басқа категорияларымен са­лыстырғанда бұл тақырып ең көп зерт­телген мәселе екенін атап өтті. Қазақ­станда бұл тақырыпқа көп көңіл бөлін­ген. Диссертациялар қорғалып, кітап­тар, мақалалар, құрбан болғандардың есте­ліктері, олардың ұрпақтары жайлы жарық көрген материалдар саны көп.

Сабыр Қасымовтың айтуынша, Қазақ­стан большевиктік-сталиндік билік жүр­гізген саясатта қазақ халқының жартысы қаза тапқан саяси және әлеуметтік сынаққа арналған полигон ғана емес, Қазақстан большевиктер билігі үшін қауіпті деп саналған басқа халықтар мен әлеуметтік топтар жер аударатын полигонға айналған.

Жобалық кеңсенің жетекшісі өз сөзінде Қазақстан заңнамалық құжаттарында сая­си қуғын-сүргін құрбандарының бұл санаты да ақталуға жататынын атап көрсеткенін хабарлады. Алайда тәжірибе көрсеткендей, бұл санаттағы құрбандар толығымен ақталмаған. Сол себепті, Президенттің саяси қуғын-сүргін құрбандарын толық ақтау туралы Жарлығына сәйкес мемлекеттік комиссия тиісті зерттеу жұмысын атқаруды бастап кеткен. Негізі қаланып, белгілі бір нәтижелер де шыға бастаған.

Өңірлік комиссиялардың жұмыс топ­тарының өкілдері әр аймақ бойынша зерттеу барысын таныстырып, нәтижелер мен алдағы жұмысты баяндап берді. Сондай-ақ кедергілер мен бірқатар ұсынысты да қатысушылар назарына ұсынды.

Қарағанды облысы бойынша зерттеу жүргізген Е.А.Бөкетов атындағы мем­ле­кеттік университеттің профессоры, комис­сия мүшесі Рымбек Жұмашев Қараған­дыда орналасқан Қарлаг еңбекпен түзету ла­герінде сақталған 39 мыңнан астам құжат­тың зерттеліп жатқанын мәлімдеді. Ғалым Қазақстанға жер аударылған­дар­дың барлығы шахталар, өнеркәсіптер мен ауыл­дарда еңбек күші ретінде орналасты­рыл­ғанын баяндап берді. Сондай-ақ Қарағанды облысына қоныстандырылған халықтар туралы мәліметтер Мәскеу мұрағаттарынан сұратылып, сарапталып жатыр екен.

Саяси қуғын-сүргін құрбандарын толық ақтау жөніндегі Мемлекеттік комиссияның 4-ші жұмыс тобының мүшесі Ләззат Шот­пақова семинар барысында барлық өңірдегі әріптестерінің мәліметін мұқият тыңдап, пайдалы тұстарын түртіп алып отырғанын айтты. Бірнеше сағат бойы осы тақырыпты зерттеу барысында табылған материалдарды тыңдап, ой бөліскен әріптестер өзара тиімді тәжірибе алмасты. Ләззат Шотпақова әдетте мұрағаттағы ашық қордағы материалдармен қатар Қазақстан халқы Ассамблеясында сақталған мәліметтерге де тиісті назар аударып, тереңірек зерттелуі керек екенін баса айтты.

Осылайша, саяси қуғын-сүргін құр­бан­дарын толық ақтау бағытында жасалып жатқан жұмыстар туралы айтып өткен ғалымдар әріптестерімен еркін ақпарат пен тәжірибе алмасуға мүмкіндік алды.

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар