Білім • 29 Қазан, 2021

Қазақстандық делегация Тәжікстандағы ТМД мұғалімдерінің VI съезіне қатысуда

Білім және ғылым бірінші вице-министрі Шолпан Каринова бастаған қазақстандық делегация Душанбе қаласында өтіп жатқан ТМД-ға қатысушы мемлекеттердің мұғалімдері мен білім беру саласының қызметкерлерінің VI съезіне қатысуда, деп хабарлайды Egemen.kz Ы.Алтынсарин атындағы Ұлттық білім академиясының баспасөз қызметіне сілтеме жасап.

Жанболат Кенжеғұл

Делегация құрамында барған Ы.Алтынсарин атындағы Ұлттық білім академиясының президенті Ғани Бейсембаев «Ынтымақтастық көкжиегі – болашаққа бастар жол» тақырыбында баяндама жасады. Ол пандемия кезінде цифрлық білім берудегі шетелдік және отандық тәжірибелер мен Қазақстанда оқушылардың біліміндегі олқылықтардың орнын толтыру бойынша жүргізіліп жатқан шаралар, сондай-ақ білім алушылардың бойында заманауи дағдыларды қалыптастыру үшін мектеп бағдарламасына енгізілген «Жаһандық құзіреттіліктер» курсы туралы мәлімдеді.

Оның айтуынша, қазіргі уақытта «Цифрлы мұғалім» жобасын енгізу және оқу процесінде VR/AR-технологияларды пайдалану бойынша зерттеулер жүргізілуде.

Сонымен қатар Академия білім беру жүйесін дамытудың өзекті проблемалары, атап айтқанда оқушылардың білім сапасын арттыру, білім беру мазмұнының сабақтастығын қамтамасыз ету, инновациялық инфрақұрылым және т.б. бойынша зерттеулерді жалғастыруда.

Халықаралық съезге ТМД елдерінің білім министрліктері мен ұйымдарының басшылары, білім саласының қызметкерлері қатысты.

Айта кетсек, 2022 жылы ТМД-ға қатысушы мемлекеттердің мұғалімдері мен білім беру саласы қызметкерлерінің VII съезі Қазақстанда өтеді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз