«Елдіктің жеті тұғыры» қолдау тапты

Кеңеске Парламент Сенаты мен Мәжілісінің депутаттары, министр­ліктер мен зиялы қауым өкілдері, сарапшылар, Кеңес мүшелері қатысты. Кеңес төрағасы, Мәжіліс депутаты Жанарбек Әшімжан «жеті тұғырдың» маңыздылығына тоқталды.  «Елбасы бұл мәселелерді Президент болған күннен бастап үнемі көтеріп келеді. Тұңғыш Президенттің «Болашаққа бағдар: рухани жаңғыру» атты мақа­ласы негізінде «Рухани жаңғыру» мем­лекеттік бағдарламасы қабыл­данды. Бұл бағдарлама еліміз үшін бір сілкініс болды. Себебі әр адам руха­ни жаңғыруды өзінен бастау керек. Баланы шыр етіп дүниеге кел­ген күннен бастап дұрыс тәрбие беріп, ана тілін үйретіп, ұлттық құндылық­тарымызды санасына сіңіруіміз керек», деді Кеңес төрағасы.

Мемлекеттік сыйлықтың лау­реаты Әлібек Асқар еліміздің басты жетістіктерінің бірі ретінде шекараны толық заңдастырып алғаны­мыз­ды айтты. «Есін жиып, етегін қымтаған елдің ең бірінші қолға алатын басты мәселесі – шекара шебін бекемдеу болатыны анық. Бұл тұрғыда Елбасымыз Нұрсұлтан Назар­баев Тәуелсіздігіміздің алғаш­қы жылдарынан-ақ қимылдап, мем­лекеттік шекараны шегендеп, халық­аралық келісімшарттарды бекітіп алды. Сондықтан Қазақстанның шекара мәселесін шешудегі ең басты нәтижесі – болашақ ұрпаққа бейбіт және тұрақты шекараны қалдыру. Көрші елдермен қалыптасқан жақсы қарым-қатынасты одан әрі дамыту және ынтымақтастықты ұлғайту», деді ол.

Еуразия ұлттық университетінің проректоры, филология ғылымдары­ның докторы, профессор, академик Дихан Қамзабекұлы «Нұрсұлтан Әбішұлы «Мәңгілік ел» мұратын тұрлаулы етудің «жеті тұғырын» есімізге салды. Олар: тәуелсіздік, бірлік пен келісім, қасиетті жер, отбасы мен салт-дәстүр, ұлт мәдениеті, білім мен еңбек, прагматизм. Елбасы мұны «Елдіктің жеті тұғыры» деп атады. Әлбетте, бұл тұғырды тиянақ­тау мен тұлғаландыру – жаңа буын­ға аманат. Білім және ғылым сала­сы­ның алдында зор мемлекеттік және қо­ғам­дық міндеттер тұр. Мұны ке­зең-кезеңмен, жүйесімен орындауда на­мысты, жауапты азаматтар аянып қал­майды деп ойлаймыз», деді ғалым.

Сенатор Динар Нөкетаева «Ел­діктің жеті тұғыры» қағидат­тар жиынтығын қоғамдағы ауызбір­шілікті нығайтып, тұрақты даму үшін ауадай қажет құндылық деп атады. «Тәуелсіздік жылдарында 1,5 мыңнан астам жаңа мектеп салын­ды. Әлем стандарттарына сай келе­тін Назарбаев Университеті мен 21 Назарбаев зияткерлік мектебі құрылды. Тәуелсіздік жылдарында білім мен ғылымды одан әрі дамытудың берік іргетасы қаланды. «Болашақ» халықаралық стипендиясы Елбасы бастамасымен құрылып, 1993 жылдан бері жұмыс істеп келеді. Содан бері осы бірегей стипендия бойынша көптеген қазақстандық әлемнің үздік оқу орындарында білімін жетілдіруге мүмкіндік алды. Жалпы алғанда Елбасы санамалап өткен бұл құндылықтар әрбір жастың жетістікке жету, қоғамға пайдалы адам болып, өнім беру жолындағы басты қағидаларына айналуға тиіс», деді ол.

Мәжіліс депутаты Ләззат Рама­занова қағидаттар жиынтығында айтылған «Отбасы мен салт-дәстүр – қоғамның алтын діңгегі» бөлімі­не қатысты өз ойын ортаға салды. Қазақстанның ертеңгі келбеті қандай болатыны бүгінде әрбіріміздің отбасымызда тәрбиеленіп жатқан ұл-қыздарымызға байланысты деген ол, еліміздің әрбір ауданында Отбасын қолдау орталығын ашу керек деп есептейді.

Елбасының «Конституцияны қастерлеу, мемлекеттік тілді білу, ұлттық құндылықтарды қадірлеу – әр азаматтың парызы» деген сөзімен Нұр-Сұлтан қаласындағы Түрік этномәдени орталығының төрағасы, Miras республикалық қоғамдық кеңесінің мүшесі Әскер Пириев те толық келіседі. «Естеріңізде болса, 90-жылдардың басында әлем­нің көптеген елінде этносаралық, дін­ара­­лық қақтығыстар болды. Сол кезде Батыстың және Еуро­па­ның көп­теген саясаттанушылары, жазу­шы­лары, «философтары» шыны керек, Қазақстанның келеше­гіне күмәнмен қарады. Ал 1995 жылы Елбасымыздың бастамасымен Қазақ­стан халқы Ассамблеясы құ­рыл­ды. Оның мақсаты – жалпы қазақ­стандық этносаралық келісім моделін көрсету. Расында осы модель жаңағы айтылған түрлі гипотезаларға ғажап жауап болды деп есептеймін. Елба­сымыз «Қазақпен қазақ қазақша сөйлессін» деп айтып еді. Менің айтарым, қазақ пен қазақ қана емес, Қазақстанның әрбір азаматы бір-бірімен қазақша сөйлесуі керек және әрбір азаматымыз бұл менің елім, менің тілім дейтін заман келді», деді Ә.Пириев.

Aiqyn газетінің бас редакторы, Nur Otan партиясы жанындағы Miras республикалық қоғамдық кеңесі төрағасының орынбасары Нұрмұхамед Байғараев: «Бұл – Елбасы осыған дейін жариялаған «Болашаққа бағдар: руха­ни жаңғыру» мақаласы мен «Мәңгілік ел» ұлт­тық идеясының заңды логикалық жалғасы. Мұн­дағы соңғы алтауы ең алғашқы қағи­да Тәуел­сіздікті нығайтуға бағыт­талған деп ойлаймын. Өйткені Тәуел­сіздік жоқ жерде, жоғарыда айтыл­ған­дар­дың ешбірі болмайды. Ал қандай да бір халық, өзінің болашағы үшін сая­си шешім қабылдауда стратегиялық ба­ғыт-бағдарын белгілеуде еркін бол­маса, онда толыққанды мемлекет жай­лы сөз қозғау мүмкін емес», деді ол.

Қазақстан Республикасының ең­бек сіңірген қайраткері Айгүл Елші­баева Елбасының саясатындағы қазақ руханиятын жаңғырту үшін жасалып жатқан барлық іске ұлтын сүйетін әрбір азамат өз үлесін қосуы керек деп есептейді. Елбасы жария еткен қағидаттарға үн қосқан кәсіпкер Талғат Дүйсекеев  прагматизм прин­циптері бойынша еліміздегі әрбір адам өзінің мүмкіндіктері мен шама-шарқын мұқият ескеруге тиіс дегенді алға тартты. Ал тревел-блогер, аза­маттық журналист, Miras рес­пуб­­ли­калық қоғамдық кеңесінің мү­шесі Яков Федоров еліміздегі этнос­аралық бірлік пен келісімнің маңыз­дылығына тоқтала келе, қазақ мәде­ниеті, қазақ тілі біріктіру құралы болуға тиіс деп қадап айтты. Сонымен қатар осы жиында Алматы қаласы Miras аймақтық қоғамдық кеңесінің төрайы­мы Қарагөз Сүлейменова, Солтүс­тік Қазақстан облысы Miras аймақтық кеңесінің төрағасы Біржан Жалғасбаев, Шығыс Қазақстан облысы Miras аймақтық кеңесі­нің төрайымы Айгүл Байжанова сөз алып, «Елдіктің жеті тұғыры» қағи­даттар жиынтығына қатысты өз ойларын ортаға салды.