Өткен күннен сабақ алуды қажет деп есептейтін Мемлекет басшысы биылғы қаңтарда Қазақстанның ішкі және сыртқы жауларының тәуелсіздігімізге үлкен қауіп-қатер төндіргенін ашық айтты. Бейбіт шеруге шыққандарды пайдаланып, ниеті мен мақсаты бөлек адамдар елде төңкеріс жасауды көздеді, бірнеше қалада ғимараттарды қиратып, өртеді және көптеген сауда орталығын тонады. Небір арандатушылық әрекеттер жасады. Алайда елдігімізге сызат түскен жоқ. Халқымыз мызғымас бірлігі мен ынтымағын сақтап қалды.
Қ.Тоқаев бұл Жолдауда кешенді жаңғырту бағдарламасын ұсынды. Ата Заңымызға елеулі түзетулер енгізілетін болды. Соның ішінде лауазымды тұлғалардың өз құзыретін асыра пайдалануға жол бермеу мақсатындағы бастамасы халықтың көңілінен шығып отыр. Конституцияның 40-бабының 2-тармағында: «Республиканың Президенті – халық пен мемлекеттік билік бірлігінің, Конституцияның мызғымастығының, адам және азамат құқықтары мен бостандықтарының нышаны әрі кепілі», деп жазылған.
Президент өз қызметі кезінде тыныш өмірді қамтамасыз етіп, халықтың бірдей мүмкіндікке ие болуына кепілдік беретінін айта келіп: «Президенттің жақын туыстарына саяси мемлекеттік қызметші болуға және квазимемлекеттік секторда басшылық лауазымдарды иеленуге заң жүзінде тыйым салынады», деді Қасым-Жомарт Тоқаев. Бұл барлық деңгейдегі басшыларға үлгі болуға тиіс.
Мемлекет басшысы өзінің бастамалары жұртшылықтың өтініштері, сондай-ақ Парламент депутаттары, Конституциялық кеңес, Орталық сайлау комиссиясы, Жоғарғы сот және беделді сарапшылардың ұсынымдары негізінде қалыптастырылғанын ескертіп өтті. Сонымен қатар Ұлттық қоғамдық сенім кеңесінде көкейкесті мәселелер талқыланып, ортақ тұжырымдар жасалғанын жеткізді. Енді аталған кеңестің орнына халықтық негізде Ұлттық құрылтай құрылатын болды. Ол еліміздегі ең өзекті мәселелерді шешудің жолдарын қарастырып, нақты ұсыныстар беретін болады.
Президент көтерген өкілді билік тармағын қайта құру да заман талабы. Парламенттің қос палатасының құрамы өзгереді. Сонымен қатар қоғамдағы рөлі нығая түседі. Жұртшылықтың билікке деген сенімін нығайту мақсатында жергілікті мәслихаттардың да өкілеттігі артады. Бұл өңірлердің саяси-экономикалық, әлеуметтік дамуына оң ықпал етеді.
«Партияда жоқ азаматтар Мәжіліске ғана емес, жергілікті өкілді органдарға да сайлана алмайтын болды. Мұны ашық мойындауымыз керек. Соның салдарынан халықтың сайлау науқанына қызығушылығы күрт төмендеді», деп қоғамдағы орын алған кемшіліктерді анық көрсеткен Мемлекет басшысы сайлау жүйесін жетілдірудің жолдарын атады. Сайлаушылардың мүддесі ұлттық және өңірлік деңгейде толық көрініс табуы үшін Мәжілістің депутаттық корпусының 70 пайызын пропорционалдық, 30 пайызын мажоритарлық тәсілмен жасақтау керектігін алға тартты. Қасым-Жомарт Кемелұлының бұл ұсынысы да қазір халықтан толық қолдау тауып отыр.
Барлық партияны дамытуды ұсынды. Бәріне тең мүмкіндік беру мақсатында тиісті заңдарға түзету енгізіледі. Осыған орай жауапты органдарға нақты тапсырмалар берілді.
Абай, Ұлытау және Жетісу деп аталатын жаңа үш облыстың құрылатыны отандастарымызға ерекше қуаныш сыйлаған жаңалық болды. Мұның бәрі сол өңірлерді өркендету үшін жасалып отырған қадам. Мұндай мысалды Түркістан облысының орталығы болған Түркістан қаласынан көріп отырмыз. Сонымен қатар ішкі көші-қон мәселесін реттеуді көздейді.
Бүгінгі таңда қаржы тұрақтылығын сақтаудың маңызы зор. Осы ретте Президент дағдарысты болдырмау үшін оның алдын алатын қажетті іс-шараларға тоқталды. Үкіметтің бұл істе өте қырағылық танытып, кешенді жұмыстарды жүзеге асыруы тиіс екенін айтты. Өйткені ұлттық валютаның құнсызданып кетпеуі және экономикалық өсімнің сақталуы – басты міндеттердің бірі.
Алдағы уақытта азық-түлік өнімдерінің бағасы шарықтап кетсе, ол да халыққа ауыр тиеді. Көктемде егін егу науқаны басталады. Бұл біздің Қазақстан үшін маңызды кезең. Солтүстік облыстарда, әсіресе Қостанай өңірінде астықтан мол өнім алып келе жатқанымыз белгілі. Мемлекет басшысы көктемгі егін егу науқанын сапалы өткізуге баса назар аударды. Диқан қауымын қажетті жанар-жағармаймен, техникамен, тұқым және тыңайтқышпен қамту ісін жолға қойғанымыз абзал. Үкімет пен әкімдіктерге осы жұмыстарды жүйелі жүргізуді тапсырды. Қ.К.Тоқаевтың «фермерлер қауымдастығымен бірлесіп, агроөнеркәсіп кешенін мемлекеттік қолдау тәсілдерін қайта қарау керек», деген сөзі шаруа қожалықтарына үлкен үміт сыйлап отыр.
Өйткені астық өндіру бір адамның не шаруа қожалығының жеке ісі емес. Астық – елдің байлығы, халықтың ырыздығы! Қазақстанда егін жақсы шықса, халық ештеңеден тарықпайтыны анық. Астығы мол елде аштық болмайды!
Біздің Президентіміз ел азаматтарының ертең емес, бүгін бақытты өмір сүргенін қалайтынын, өзі үшін елдің амандығы мен жеріміздің тұтастығынан асқан құндылық жоқ екенін мәлімдеді. Өсіп-өркендеген Жаңа Қазақстанды құруға күш салып жатқан Мемлекет басшысының бастамаларын толық қолдаймыз және кешенді бағдарламалардың толық жүзеге асуы үшін барша қазақстандықтар атсалысады деген сенімдемін.
Тоқтарбай ҚАДАМБАЕВ,
қоғам қайраткері
Қостанай
