![Адал еңбек ер атандырады](/media/2022/04/07/8741.jpg)
Еңбек адамын қадірлеу қай заманда да басты қағидат болып қала бермек. Бұл жағынан алғанда кеңестік кезеңнің жақсы дәстүрінен өнеге алған дұрыс. Ол уақытта шыны керек, шопан, механизатор, сауыншы, токарь, т.б. қарапайым еңбек адамдары жоғары марапаттарға ие болып, партия съездеріне делегат болып қатысатын. Бұл қай заманға да қажет, керек тәжірибе екені сөзсіз. Осы тұрғыдан алғанда, мал шаруашылығында қол жеткізген аса үздік көрсеткіштері үшін ең жоғары наградаға – «Социалистік Еңбек Ері» атағына ие болған Мария Аябаеваның өмірі, еңбек жолы, елге қызмет ету қағидаты – жастарымызға әрдайым үлгі-өнеге.
Мария Көденқызы бұрынғы Талдықорған облысының Гвардия ауданындағы Развильное (Жаңалық) ауылында дүниеге келген. Әкесі Көден Қарымсақұлы 1941 жылы майданға аттанып, Воронеж түбінде ерлікпен қаза тапқан. Анасы Мүлгісін 25 жасында қосағынан айырылып, жарына берген өмірлік сертін адал орындап, еңбекке араласып, ұл-қызын жеткізген. Егін салған, шөп шапқан, мал бағып, бала өсіріп, таңның атысынан күннің батысына дейін тыным таппаған. Анасының жанкештілігін көріп өскен Мария еңбекқор болмай қайтсын.
1956 жыл Мария Көденқызының өміріндегі ең ерекше жылдардың бірі болды. Дәл осы жылы Мария Қызайбай Аябаевпен отау құрып, жаңа өмір жолын бірге бастады. Атақты Арқарлы өңіріндегі Панфилов атындағы колхоз – кіндігі кесіліп, кір жуған, қасиетті атамекені. Кейіннен бұл шаруашылық «Қызылжар» кеңшарына қосылып, 1974 жылы «Арқарлы» атанған. Үлкен ұжымжар еді.
Марияның мал өргізіп, отар-отар қой бағып, еңбек көрігін қыздырған жері Арқарлы адыры аталады. Түгін тартсаң, майы шығатын, малға жайлы, шөбі шүйген, суы мөлдір, ауасы таза мекенде қол үзбестен еңбек еткен-ді. Қыстауы – Қызылқұдық. Марияның шүмектеп аққан маңдай тері сіңген қасиетті жер ғой. Кезінде жұрт оны «Мария базы, Мария қорасы» деп атайтын. Еңбегін бағалағаны ғой.
Мал бағу айтқанға ғана оңай. Әйтпесе бейнеті көп, ауыртпалығы мол, жылдың қай маусымы болсын, қиындығы шаш етектен келетін тынымсыз, босаңсуды кешіре алмайды шопанның тірлігі дегеніңіз. Демалыс жоқтың қасы. Оны айтасыз, малдың жайын терең білу керек, жем-шөбін әзірлеп, қорасын жылы ұстап, шұрайлы жайылым іздеу, көктеуі мен күздеуін жаңылыспай тап басып танып, қыстағы қоңын көзден таса қылмау – әркімнің қолынан келе бермес кәсіби шеберлік, зеректік, әркімнің бойына біте бермес қасиет. Әйтпесе деймін-ау, мал баққанның бәрі Еңбек Ері болмай ма?
Өзінің өмірлік тәжірибесін атақты Мария апамыз былайша сыр ғып шерткен: «Мал – баққандікі», – дейді біздің кейінгі шопандар мақалдай сөйлеп. Сол рас. Міне, бір боз саулық екі қошақан бізді түске дейін әуре етті. Ал бір отардағы 700-800 саулыққа, оның соңынан ерген 1 400-ден астам қозысына ие болып көр. Осының баршасының қиындығы тіпті шаш етектен келеді емес пе?! Бірақ қоғам игілігі, ел байлығы – баққан өз малың. Атқарған еңбегің сені баянды бақытқа жеткізіп, шексіз қуанышқа бөлейді. Ал абыройлы, атақты шопан болу үшін төзімділік, еңбексүйгіштік, шыдамдылық, табандылық керек! Сонда ғана мал өседі, төл көбейеді, отар ортаймайды».
Мария Көденқызы өткен ғасырдың 1960-1970 жылдары аудандық Кеңеске екі рет, облыстық Кеңеске екі рет депутат, Қазақстан Компартиясы XIII, XIV, XV, XVI съездеріне, Кеңес Одағы Коммунистік партиясының XXVI съезіне делегат болып сайланған. Еңбектегі ерлігі үшін Еңбек Қызыл Ту орденіне ие болып, 1985 жылы «Социалистік Еңбек Ері» атағы беріліп, «Ленин» орденімен, «Орақ пен балға» алтын медалімен марапатталған. Сондай-ақ КСРО Мемлекеттік сыйлығының лауреаты.
Адамның атын еңбек шығарады. Бақыт деген киелі ұғым да түсінген жанға адал еңбек, маңдай термен келеді. Мария Көденқызы өзінің бар бақытын мамандығынан, бейнелеп айтқанда, қойшының құтты таяғынан тапқанын айтып та, жазып та кеткен екен.
Бірде Кербұлақ ауданындағы Сарыбастау орта мектебінің оқушыларымен кездесуінде атақты шопанға балалар «Бақыт дегенді қалай түсінесіз?» деген сауал қояды. Сонда ол: «Егер ұлы Отанға, өзің туған ардақты елге неғұрлым көп еңбек сіңірсең, бақыт деген сол. Дүниеде өзің сүйген ісіңмен айналысып, сол кәсіптің (ол мейлі қандай мамандық болсын) бүге-шігесін, қыр-сырын жетік меңгерсең, сол мамандықтың шырқау шыңына шықсаң, сол бақыт» деп жауап береді.
Халқымыз еңбектің қадірін жете білген. Сондықтан да адал еңбек етіп, маңдай терін төгіп, үлкен жетістікке жеткен жандар туралы ғибратты сөздерді көп айтқан. Жастарға олардың толағай табыстарын үлгі екен. «Еңбек ер атандырады» деген даналық сөз содан қалса керек. Өз басым Социалистік Еңбек Ері, өз дәуірінің мақтанышы болған, атақты шопан Мария Аябаеваның өміржолына қарап, халық даналығына бірауыз сөзімді қосып, «Адал еңбек ер атандырады» дегім келеді. Бұған кейіпкеріміздің өнегелі өмірі – нақты дәлел.
Мария Көденқызының өмірден өткеніне алты жылға жуықтапты. «Орнында бар оңалар» демекші, Еңбек Ерінің ғибратты жолын бүгінде ұрпақтары жалғастырып келеді. Мария мен Қызайбайдың балалары Алтын, Алтынкүл, Қуаныш және Мөлдірден тараған немере-шөберелер ардақты ата-апасының аттарын мақтанышпен айтып, өнегесін өз өмірлерінің бағдаршамындай берік ұстанады.
Жақында Сарыбастау ауылында ауыл тұрғындары, аудан, ауыл, мектеп басшылығы ұйытқы болып, Сарыбастау орта мектебінде Еңбек Ері Мария Аябаеваның атында музей ашып, оның жетістіктері мен еңбек жолынан көрме ұйымдастырды. «Өлі риза болмай, тірі байымас» дегендей, алтын жұлдызды апамыздың рухына Құран бағышталып, ата дәстүріне сай ас берілді.
Келешекте игілікті іс-шара жалғасын тауып, Мария Аябаеваның ардақты есімі ауылындағы Сарыбастау орта мектебіне беріліп жатса, нұр үстіне нұр болар еді. Ұсынысқа ауыл әкімі бастап, мектеп ұжымы қоштап, аудан әкімшілігі де үлкен қолдау білдіріпті. Бастама Алматы облыстық және республикалық арнайы комиссиядан қолдау табатынына сенеміз.
Тағы бір ұсынысымыз, ауыл ғана емес, аудан, тіпті облыс көлемінде еңбекте, әсіресе мал шаруашылығында жақсы жетістіктерге қол жеткізген жастарды көтермелеу мақсатында жыл сайын Мария Аябаева атындағы сыйлық тағайындалса дейміз. Ауыл, аудан, облыс көлемінде орталық бір көшеге Еңбек Ерінің аты беріліп жатса, қанеки! Еңбек адамына деген ол да үлкен құрмет әрі жастарға үлгі-өнеге болмас па?!
Иә, аядай ауылы Арқарлының атын алаш жұртына адал еңбегі арқылы танытқан Еңбек Ері Мария Аябаеваға лайықты құрмет көрсету – ауыл, аудан және облыс басшылары үшін үлкен сын әрі абыройлы міндет. Өйткені өткенге құрмет ертеңге тағылым екені белгілі.
Нұрлан ҚАЛҚА,
ақын, Халықаралық «Алаш» әдеби сыйлығының лауреаты