Жуырда Кардиология және ішкі аурулар ҒЗИ-да Ресейдің жетекші МЕДСИ Premuim компаниясының профессоры, медицина ғылымдарының докторы Петр Щербаковтың қатысуымен гастроэнтерологтер мен эндоскопист дәрігерлер үшін шеберлік дәрісі өтті. Сондай-ақ шеберлік сағатында ащы ішекті зерттеудің «алтын стандарты» саналатын Smart Capsule бейнекапсулалық эндоскопияның тұсауы кесілді.
«2014 жылдан бастап институтта Қазақстанда тұңғыш рет бейнекапсулалық эндоскопия жасалынатындықтан, осы бірегей зерттеуді жүргізуде тәжірибе жинақталды. Бейнекапсулалық эндоскопия – бұл гастро және колоноскопияның дәстүрлі әдістеріне қолжетімсіз жіңішке ішек аумағын көруге мүмкіндік беретін капсуланың көмегімен асқазан-ішек жолдарын зерттеудің заманауи әдісі. Зерттеудің ерекшелігі –
ішек толығымен тексеріледі. Пациент жайсыздықты сезінбейді, зерттеу жүргізу үшін наркоз жасаудың қажеттілігі жоқ. Процедура ешқандай ауыртпалықсыз өтеді. Бейнекапсула бір рет қана қолданылатындықтан, пациенттің жұқтыру мүмкіндігін болдырмайды. Зерттеуді амбулаториялық жағдайда да, сондай-ақ стационар жағдайында да жүргізуге болады», деді институттың басқарма төрайымы, профессор Роза Қуанышбекова.
MEDSI Premuim клиникасы директорының орынбасары Петр Щербаков заманауи капсулалар жасанды интеллект жүйесімен жабдықталғанын, кескін сапасы да айтарлықтай жақсарғанын атады. Сондай-ақ ол қазақстандық мамандар – эндоскопистердің дайындығы жақсы екеніне де тоқталды.
«Әр маман өз білімін үнемі жаңартып, жаңа дағдыларды игеріп, медицина саласындағы инновациялар туралы хабардар болуға тиіс. Дәрігерлеріміз пациенттердің сапалы, дер кезінде және білікті медициналық көмек алуы үшін үнемі машықтарын жетілдіріп, шеберлік дәрістерге, семинарларға қатысып, тәжірибе алмасып отырады», дейді Роза Тохтанәлиқызы.
Клиниканың эндоскопия және интервенциялық гастроэнтерология бөлімшесінің меңгерушісі Владислав Зелинский Smart Capsule бейнекапсулалық эндоскопия қалай қолданылатынын төмендегідей түсіндірді. Асқазан-ішек жолдарын процедураға дайындағаннан кейін, зерттеу жүргізген күні пациенттің беліне жазып отыратын қондырғы ілінеді. Пациент әдеттегі таблетка секілді капсуланы жұтады. Капсула табиғи түрде асқазан-ішек жолымен қозғалады, орнатылған камера суретке түсіреді, барлық ақпарат жазып отыратын құрылғыға жіберіледі. Әдетте, алынған жазбаның ұзақтығы 14-15 сағатты құрайды. Эндоскопист дәрігер алынған мәліметтерді талдап, қорытынды береді. Капсула біраз уақыттан кейін ағзадан өзі табиғи жолмен шығады.
«Кеше біз зерттеуге кірісіп кеттік. Бүгін мәскеулік әріптеспен бірге алгоритмдердің көмегімен пациенттің бейне және фото суреттерімен жұмыс істейтін боламыз, алынған деректерді зерттеп, қорытындысын береміз», дейді дәрігер.
Зерттеудің осы әдісі темір жетіспеушілігі анемиясы салдарынан жіңішке ішектен қан кету, жасырын қанға нәжістің оң нәтижесінің болуы, жіңішке ішектің қабынып ауруы, оның ішінде Крон ауруына және жіңішке ішек ісігіне күдік туындаған жағдайда, тұқым қуалайтын полипоздары бар пациенттерге, іштің түсініксіз ауруы мен басқа да белгісіз этиологияда, жылдам салмақ жоғалту жағдайында көрсетілетінін айта кеткен жөн. Бейнекапсула ащы ішекті мейлінше мұқият зерттейді.
Капсулалық эндоскопия жіңішке ішек ауруларын диагностикалаудың «алтын стандарты» десек те болады.
