Референдум-2022 • 17 Мамыр, 2022

Ақпараттандырудың тиімді тәсілдері қолданылады

40 рет көрсетілді

Орталық референдум комиссиясының республикалық референдумды ұйымдастыру мен өткізу мәселелері жөніндегі отырысы өтті. Отырысқа Цифрлық даму, инновациялар және аэроғарыш өнеркәсібі министрлігі мен БАҚ өкілдері, ал бейнеконференция байланысы режімінде облыстардың, Нұр-Сұлтан, Алматы және Шымкент қалалары әкімдіктерінің аппарат басшылары және аумақтық референдум комиссияларының мүшелері қатысты.

Отырыс барысында жалпы­ха­лықтық референдумға дайындық барысы жан-жақты пысықталды. Атап айтқанда, жергілікті атқа­рушы органдардың дауыс беруге арналған учаскелерді мате­­риалдық-техникалық жарақ­тан­дыру, мүмкіндігі шектеулі адам­дардың құқықтарын қамта­масыз ету жөнінде жағдайлар жа­сау, референдум комиссия­сына республикалық референ­думға қатысуға құқығы бар аза­мат­тардың тізімдерін беру жөнінде жүргізген жұмыстары сөз болды. Сонымен қатар, референдум өткізу кезінде дауыс беруге арналған бюллетеньдердің санын белгілеу, дауыс беру және оның қорытындыларын шығару тәртібі жан-жақты талқыланды.

Осы мәселелер бойынша баяндаған облыстардың, Нұр-Сұлтан, Алматы және Шымкент қалалары әкімдіктерінің аппарат басшылары дауыс беруге арналған учаскелерді материалдық-тех­никалық жарақтандыру, мүм­кін­дігі шектеулі адамдардың құқықтарын қамтамасыз ету бо­йынша жағдайлар жасау жөнінде жүргізілген жұмыстар туралы хабарлады.

Орталық референдум комис­сиясының төрағасы Нұрлан Әбді­ров ел аумағында дауыс беруге ар­налған 10 013 учаске жұмыс істейтінін атап өтті. Сондай-ақ ол жергілікті атқарушы органдардың құзыреті аясындағы дауыс беру күнін ұйымдастыру жөніндегі барлық мәселелер міндетті түрде шешілуі қажеттігін және ерекше бақылауда болуы тиіс екенін атап өтті.

Комиссия хатшысы Мұхтар Ерман «Республикалық референдум туралы» Конституциялық заңның 27-бабына сәйкес дауыс беруге арналған бюллетеньдерді дайындау тәртібін Орталық референдум комиссиясы айқын­дайтынын хабарлады.

Конституциялық заңның нор­ма­ларына сүйене отырып, Орталық референдум комис­сиясының «2022 жылғы 5 мау­сымға тағайындалған респуб­ли­калық референдум өткізу ке­зінде дауыс беруге арналған бюл­ле­теньдердің санын белгі­леу туралы» қаулысы қабыл­данды. Конс­титуциялық заңда бел­гі­лен­ген тәртіппен республикалық рефе­­рендумға қатысуға құқығы бар азаматтардың тізімдері ре­фе­­рен­дум комиссиясына ұсы­ны­­лып, тиісті әкімнің қолы қойылды.

Облыстардың, Нұр-Сұлтан, Алматы, Шымкент қалалары әкім­діктерінің, республика бо­йынша жергілікті атқарушы ор­ган­дардың өкілдері ұсынған мәлі­мет­тер мен есептерге сәйкес тізім­дерге 11 722 536 азамат енгізілді.

Отырыс соңында Н.Әбдіров азаматтарды дауыс беру уақыты мен орны туралы кеңінен хабардар ету жөнінде жұмыс жүргізу қажеттігін алға тартты. «Бұл дәстүрлі түрде қолданылып отырған «дауыс беруге шақыру қағаздары» сияқты тәсілдерден бастап, Цифрлық даму, инновациялар және аэроғарыш өнеркәсібі министрлігінің заманауи гаджеттері мен SMS-хабарламаларын пайдалануға дейінгі ақпараттандырудың әртүрлі, ыңғайлы әрі тиімді тәсілдері болуы тиіс», деп атап өтті ол.

Н.Әбдіров алдағы респуб­ликалық референдумға қоғамдық бірлестіктер өкілдерінің, БАҚ өкілдерінің, шет мемлекеттерден байқаушылардың қатысу мәселелеріне, сондай-ақ учаскелік референдум комиссияларының мүшелерін дауыс беру күні алдында оқытуға, оның ішінде азаматтардың «Электрондық үкімет» порталында тіркелген жері бойынша мәліметтерді тексеру онлайн-сервисінің жұмысы бойынша оқытуға ерекше назар аудару қажеттігін атап өтті.

Сондай-ақ, Орталық референдум комиссиясының басшысы отырысқа қатысушыларды референдумға дайындық және оны өткізу мәселелері бойынша ОРК мүшелерінің өңірлерге инспекциялық сапарлары жос­парланып отырғаны туралы хабарлады. Атап айтқанда, халықты ақпараттандыру, учаскелердің дауыс беру күніне дайындығы және азаматтардың дауыс беруі үшін, оның ішінде дауыс беру кезінде мүгедектігі бар және ерекше қажеттіліктері бар азаматтар үшін қажетті жағдайлар жасау мәселелері қаралатын болады.

Отырыстың соңында БАҚ өкілдеріне арналған дәстүрлі брифинг өтті.

Соңғы жаңалықтар

ТүркПА-ның атауы өзгереді

Парламент • Кеше

Алматы жолдарын су басты

Аймақтар • Кеше

Ұқсас жаңалықтар