Қазақстан • 28 Маусым, 2022

Иса ақынның сүйіншіге берген домбырасы

37 рет көрсетілді

Иса Байзақов Павлодар облысы, Ертіс ауданы, Үлгілі ауылында туған. Қазақ поэзиясында айрықша орын алатын Исаның актерлік, әншілік, домбырашылық өнерінің сыртында оның ақындық өнері бір төбе. Оның «Құралай сұлу», «Қойшының ертегісі», «Алтай аясында», «Кавказ», «Қырмызы-Жанай», «Ақбөпе» сияқты поэмалары өзінің көркемдігімен де, адамгершілік асыл қасиеттерді паш ететін идеялық қуатымен де қазақ әдебиетінде айрықша мәртебелі орынға ие.

Түркістан облысы, Бәйдібек ауданы  сәулет-көркем музейін­де ерекше дарын иесі Иса Бай­зақовтың домбырасы сақ­талған. Ақынның домбырасы қарт Қаратаудың қойнауындағы Бәйдібек ауданына қалай келді?

Сонау сұрапыл соғыс жылдарында шежірелі Шаян өңіріне ақын Иса Байзақов келеді. Сұм соғыс еңсесін езген ел ақын­ды құшақ жая қарсы алады. Жай­барақат тіршіліктің астан-кестенін шығарған соғыстың ауыр, бейнетті тіршілігінен, аза­маттарынан айырылып қа­мық­қан қалың жұрт ақынның жыр-дастандарын таңға дейін тыңдап бір серпіліп қалады.

Ақын ауылдарды аралап, көпшілікті ән-жырымен  рухтандырып жүргенде Батыстағы  әскерлерімізден «1943 жылдың 2 ақпанында Дон майданының әскерлері Сталинград түбінде қоршауға алынған неміс армиясын толық талқандады» де­ген жақсы жаңалық жетеді.  Со­ғыстың әрбір сәтін қалт жібермей,«Бәрі де майдан үшін!» деп  ауыр бейнетті ар­қа­лап жүрген ауылдағылар бұл жеңіске шат-шадыман қуа­ныпты. Қазақ табалдырық аттаған әр қонағын кұт санаған емес пе? Ауыл тұрғындары да Иса ақынды құт көріп, сүйін­ші сұрайды. Дарқан көңілді ауылдағылармен қоса қуанған ақын сүйіншіге өзінің қимас серігі домбырасын берген екен. Мұндай мәрттікті күтпеген жұртшылық ақынға «жар дегенде жалғыз домбыраңыздан қалай айырамыз» деп қынжылыпты. Сонда  «Уа, көпшілік, ізетке найза бойламас, мен сүйіншілеген елге шын көңілмен бердім домбырамды» деп ағынан жарылған екен ақын.

Соғыс аяқталып бұл оқиға да ұмыт болады. Иса ақынның домбырасы да ел жадынан шы­ғып кетеді. Арада біраз жылдар өткен соң, осы оқиғадан хабары бар Ақтас ауылының  тұрғыны Орынтай Атабеков өзінің нағашысынан ақынның домбырасын алып келіп, музейге өткізеді.

Бүгінде Иса ақынның домбырасы музей төрінен орын алған құнды жәдігерлердің бірі.

 

Эльмира ЖАМАШОВА,

Сәулет-көркем музейінің қызметкері

 

Түркістан облысы,

Бәйдібек ауданы

Соңғы жаңалықтар

«Айқайдың» астары

Өнер • Кеше

Байрон ұйығы

Әдебиет • Кеше

Күн гүлі

Таным • Кеше

Ұқсас жаңалықтар