Аймақтар • 03 Қазан, 2022

Бес өндіріс орны іске қосылады

152 рет көрсетілді

Түріктің әйгілі KOÇ Holding қаржылық-өндірістік конгломераты мен қазақстандық Orbis Kazakhstan компаниясы Сыр бойында қызанақ пастасын шығаратын зауыт салады. Облыс әкімінің орынбасары Мархабат Жайымбетов, KOÇ Holding өкілі Өзгур Бурак Ақкөл және Orbis Kazakhstan басшысы Сухраб Махмұдов Жаңақорған ауданына келіп, жаңа жобаның жай-күйін талқылады.

Өңір экономикасын әртарап­тандыру бағытындағы бастама үшін 30 гектар жер телімі белгі­ленді. Құны 13,5 млрд теңге бола­тын зауыттың жылына 24 мың тонна томат пастасын дайындауға мүмкіндігі бар. Жо­баны қос компания теңдей қаржыландырады, 2025 жылға дейін іске қосылуға тиіс зауытта 154 жұмыс орны ашылады.  

Облыс әкімінің орынбасары Мархабат Жайымбетов әкімдік тарапынан бастаманы қолдау шаралары жүргізілетінін айтып, жобаның өңір үшін маңыз­дылығына тоқталды. Кез­десу­де болашақ өндіріс орнын  инфра­құрылыммен жабдықтау, жобалық-сметалық құжаттама жасау мәселелері талқыланды.

Ауыл шаруашылығы ми­нистр­лігі, Қызылорда облы­сы­ның әкімдігі мен KOÇ Holding түрік компаниясы және отандық Orbis Kazakhstan компания­сының араларында атқарыла­тын шаралар мен мерзімдері көрсетіліп, төртжақты жол картасы әзірленіп, бекітілді.

Жалпы, облыстағы өңдеу өнеркәсібінің жекелеген салаларын дамытатын бағдарлама аясында аймақта құны 654 млрд теңге болатын 46 жоба қолға алынған. Бүгінде оның тоғызы қолданысқа берілді. Оның қатарында былтырдан бері жұмыс істеп келе жатқан керамзит, ас тұзы және күріш өңдеу өндірістері бар.  

Индустрияландыру бағдарла­ма­сына облыста белсенді қаты­сып келе жатқан өндіріс орнының бірі – «Аралтұз» компаниясы. Ком­пания осыған дейін жаңадан 3 испан цехын іске қосқан. Бұл еңбек өнімділігін екі есе арттырып, 200-ден аса адамды тұрақты жұ­мыспен қамтуға мүмкіндік берді. 

Осы жылдың ортасынан бері өңірде керамзит блоктары шығарыла бастады. Жаңа өндіріс орнының қолжетімді өнімі қазір бағасы аспандап тұрған кір­піш пен басқа да құрылыс материалдарына бәсекелес болып, тұтынушылардың таңдауы соған түсіп тұр.  

Арал ауданында іске қосыл­ған кварц құмын ба­йыту комбинатының негізгі тұтынушысы жылына 120 мың тоннадан астам кварц концентратын пайдаланатын шыны зауыты болады. Шыны зауыты демекші, жыл соңына дейін бұл нысанды да іске қосу жоспарлануда. Арнайы штаб құрылып, қыркүйек айында пеші қосылды, қазан айының соңында алғашқы шыны табақшасы шығарылуы керек.

Алдағы уақытта осы зауыт төңірегінде шағын, орта кәсіп­керлік белдеуін дамыту ойласты­ры­лып отыр. Оның аясында жа­ңа өнім түрлерін шығаратын 8 кә­сіп­орын ашу бағытында жұмыс жүргізілуде. Қазір шыны-тал­шықты-композиттік мате­риал­­дар, айна, смартфондармен план­шеттерге арналған ультра жұқа шыны дайындайтын 3 жоба бо­йынша жұмыс басталып кетті.

Бұдан бөлек, жыл соңына дейін Қармақшы ауданындағы құс фабрикасы, балықты терең өңдеу зауыты және Қазалы­дағы балық қалдықтарынан ұн өн­діру цехы іске қосылуы керек. Сырдария ауданындағы кү­ріш ақтау цехы мен Қызылорда қаласындағы құрғақ құры­лыс қоспалары зауыты да биыл қолданысқа берілетін өндіріс орындары қатарында тұр. Жалпы құны 3 млрд теңгеден асатын бұл 5 жобаға мемлекетік қолдау шарасы ретінде жер телімдері үлестірілген.

Бұлардың ішіндегі ірі жоба – «Қармақшы құс» ЖШС жылына 1 500 тонна құс етін өндіреді. Құны 2 млрд теңге болатын фабрикада 60 адам жұмыс істейді деп жоспарланып отыр. Өндірісі санаулы өңірдегі фабрикаға қажетті қондырғылар алдағы айда толық жеткізіледі.

Тау-кен металлургиясы – қойнауы қазынаға бай Сыр өңірінде кейінгі жылдары пайда болған сала. Облыс­та қазір «Шалқия» және «Баласауыс­қандық» кеніштерін игеру аясын кеңейту жобалары іске асырылып жатыр. Бұл үшін әлемдегі ірі 5 кеніш қатарындағы «Шалқия» кен орнын дамытудың жаңа стратегиясы әзірленді. Стратегияға сəйкес тау-кен бөлігі мен жерүсті кешендері бойынша түзетулер енгізіліп, тау-кен фабрикасы­­ның құрылысын жүргізетін мерді­гер мекемені анықтау процедуралары басталды. Фабрика іске қосылғанда жаңадан тағы бір мыңға жуық жұмыс орны ашылады. Өндіріс орны алғашқы жылы жылына 2 млн тонна кен өңдесе, 2026 жылдан бастап 4 млн тоннаға дейін ұлғаяды. Ванадий өндіретін «Баласауысқандық» кен орнындағы тағы бір жобаны шетелдік инвестор «Ферролоус ресорсиз ЛТД» жүзеге асырып жатыр. Жыл басынан бері кеніштен өндірілген 265 тонна аммоний метаванадаты Ұлыбритания, Швейцария, Аустрия елдеріне, 37 тонна ферромолибден Ресей мемлекетіне экспортталған.

 

Қызылорда облысы

Соңғы жаңалықтар

Мессидің халі «мүшкіл»

Спорт • Бүгін, 22:12

Үздіктер іріктеле бастады

Футбол • Бүгін, 22:10

Еуропадан жеңіспен оралды

Спорт • Бүгін, 22:09

Бейсен Құранбек турнирі

Қоғам • Бүгін, 22:07

Еріктінің еңбегі ерен

Қоғам • Бүгін, 22:04

Үйлі болған үлескер көп

Қоғам • Бүгін, 22:02

Жүректің көзі ашылса...

Қоғам • Бүгін, 22:00

Моңғолды мойындатқан Тұрар

Тарих • Бүгін, 21:51

Шертпе күйлер шеруі

Өнер • Бүгін, 21:49

Аққан жұлдыз ізімен

Таным • Бүгін, 21:46

Сахнаға адалдық

Өнер • Бүгін, 21:42

Доллар тағы қымбаттады

Қаржы • Бүгін, 16:13

Ұқсас жаңалықтар