Шиелі ауданындағы аядай ғана Аққұмшықта дүниеге келген Әбілқасым Сәрсенбаев Алматыдағы Н.В.Гоголь атындағы көркемсурет училищесін бітіріп, аудандық пионерлер үйінде жас суретшілер мектебін ашып, шәкірттер талабын ұштапты. Ауылда жүрсе де бүкілодақтық шығармашылық жастар симпозиумына қатысып, республикалық «Жігер» фестивалінің бірнеше дүркін лауреаты атанады. Ол тұста өнер адамының шығармашылығын шыңдауына жасалған жағдай да бөлек еді ғой.
Сексенінші жылдардың ортасында қазіргі Т.Жүргенов атындағы Қазақ ұлттық өнер академиясының дизайн факультетін бітіріп, осы оқу орнында қалған суретші шығармашылығының өзегі туған жер болды. Еліміз бен өзге мемлекеттерде қойылған картиналарының ішінде «Аққұмшықтағы ақ үйім», «Аққұмшықтағы құдық», «Аққұмшықтағы ауыл» атты туындыларының орны бөлек еді. Туындыларына туған жерін арқау еткен өнер иесі былтыр дүниеден озды.
Көрмеде қылқалам шеберінің туыстары мен белгілі суретші, мүсінші Амангелді Кененбайұлы естелік айтып, облыстық мәдениет және спорт басқармасы басшысының орынбасары Ерділда Нұртазаұлы лебізін білдірді.
Әйгілі қайраткер, түркі әлемінің толымды тұлғасы Мұстафа Шоқай жолымен тоғыз мемлекетке барып, көрме ұйымдастырған суретшінің соңғы туындылары «Ұлт тұлғасы – Мұстафа Шоқай» және «Мұстафа Шоқай – суретші көзімен» атты екі бірдей кітап-альбом еді. Шоқай туған топырақ Наршоқыдан бастап Парижге дейін сапарлаған суретшінің бұл еңбектерінде қайраткердің графикалық суреттері, портреттері топтастырылған.
Қазіргі сурет өнерінің болашағына алаңдап, кескіндеме, мүсін, қолөнер туралы басылым болса, осы күнгі фотографиядан көшіретін суретшілер мен шын суреткердің айырмасын жұрт байқар еді деп армандаған қылқалам шебері осы салада толымды еңбек етті.
Осы маусым айында С.Айтбаев атындағы көркемсурет галереясына Алматы қаласынан суретшінің 200 картинасы мен графикалық суреті әкелініп, галерея қоры қайталанбас туындылармен толыққан. Бүгінгі көрмеге солардың 100-ден астамы қойылды.
ҚЫЗЫЛОРДА
