Жалпы, біздің облыс жөніндегі мағлұматтарға Қасым-Жомарт Кемелұлының өте қанық екенін байқадық. Ертіс-Баян өңірінде туып, кейін тұтас Алаш еліне қызмет еткен тарихи тұлғалар мен мәдениет қайраткерлерін, отандық ғылым мен білім салаларына өлшеусіз үлес қосқан ғалымдарымызды тізбектеп, Мәшһүр Жүсіп, Мұса Шорманов, Көпеев, Қаныш Сәтбаев секілді біртуар перзенттеріміздің барша Қазақ елі үшін мақтаныш екенін жеткізді. Мұны естігенде ерекше қуанып, мерейіміз көтеріліп қалды.
Павлодар облысын дамытудың басымдықтары туралы айтқанда бес негізгі бағытымызды айқындап бергеніне куә болдық. Олар – индустриялық-инновациялық әлеуетті нығайту, экологиялық мәселелерді шешу, сумен қамтамасыз ету мәселесі, өңірдің инфрақұрылымын дамыту, креативті индустрия мен туризмді дамыту. Бұл басымдықтардың қай-қайсысын болмасын жүзеге асыру түптің түбінде сапалы білім беруге, отансүйгіш жас ұрпақты қалыптастыру мәселелеріне барып тірелетіні айқын. Осы ретте Президент биылғы Жолдауында жариялаған «Жайлы мектеп» ұлттық жобасы аясында Павлодар облысында алдағы 3 жылда 10 мектеп салынатынын айтып, заманға сай оқу ордаларында білім игерген жұрттың мерейі үстем болатынына тағы бір мәрте мән берді. Олардың құрылысын сапалы жүргізу – өзімізге сын.
Бәрімізге белгілі, көктемде қар ерісе, жазғы мезгілде жаңбыр жауса Павлодар қаласының көшелері суға көлкіп, кішігірім Венецияға айналып шыға келеді. Шаһарда нөсер кәрізі жүйесінің жоқтығы тұрғындарды қиындыққа тіреп отыр. Жылдар бойына сағызша созылған мәселені шешуді Президент Үкіметке жүктеді. Білуімізше, жаңбыр суына арналған кәріз жүйесінің жобасы дайын көрінеді. Оның құрылысы әуелі солтүстік-батыс бөлігінде жүргізіліп, Екінші Павлодар шағын ауданын қамтиды. Одан соң екінші кезеңде солтүстік-батыс аумақта жүргізіліп, Зеленстройдың дренаждық жүйесін өміршең етеді. Соңынан қаламыздың өзге бөліктері де қосылады деп күтілуде. Осы жұмыстар келесі жылы басталып кететіні бізді айрықша қуантты. Себебі күн жылы мезгілде көлкіген судан көшелерімізде көлік кептелісі орын алып, жер үйлерді су басатыны бар. Бұл машақаттан таяудағы жылдарда құтылатынымыз анық.
Әр жаз сайын мазамызды алатын шыбын-шіркейге қарсы күрестің де жергілікті халықтың көңілінен шықпай отырғанын Президентіміз жақсы біледі екен. Мына Ертіс бойын жайлаған көп елді мекендер, соның ішінде Павлодар, Ақсу қалалары мен бірнеше аудан жұртшылығы жәндіктерден қатты зиян шегіп келеді. Оларды жоюға миллиардтаған теңге қаражат бөлінгенімен, нәтижесін ел көре алмауда. Мемлекет басшысы осы мәселені реттеуді, оған ғылыми әдіс-тәсілдерді енгізіп, шетелдік тәжірибені тартудың уақыты жеткендігін айтты. Расында, біздің өңірде шыбын-шіркейге қарсы күрес шаралары тек биологиялық және химиялық өңдеумен ғана шектеліп келе жатыр.
Бұдан басқа облыс орталығының іргесіндегі Былқылдақ көлінде жиналып қалған сынапты қауіпсіз етудің жолдарын іздестіруге, үлкен зауыттарға заманға сай сүзгілер орнатуға қатысты тапсырмалар беріп, Екібастұздағы көмір кеніштерінен шыққан үйінділер мен электр стансаларындағы күл төгетін орындардың мәселесін шешуге айрықша көңіл бөлгені Президентімізді өңірдегі экологиялық түйткілдер айрықша алаңдататынын аңғартса керек. Өндіріс пен қоршаған орта арасындағы теңгерімнің сақталуын қамтамасыз ету өте көп қаражатты қажет ететінін жақсы түсінеміз. Осы орайда Қасым-Жомарт Тоқаевтың кездесуде белгілеген нақты міндеттері мен ұсыныстары жергілікті алпауыт кәсіпорындардың басшыларын ойландырады деп есептейміз.
Ерке Ертістің жағасында отырып ауызсуға жарымаған ауылдар жайында әңгіме қозғаудың өзі ыңғайсыз. Кезінде Ертіс ауданында – Беловод, Май ауданында Май топтық су құбыры жүйелері жақсы жұмыс істеп, жергілікті жұртты сапалы ауызсумен тұрақты қамтыды. Тоқырау кезеңінде олардың барлығы құрдымға кеткенімен, соңғы жылдары біртіндеп қалпына келтіріліп жатқанын байқаймыз. Алайда ауылға барғанда көп тұрғындар жаңадан салынған сумен қамту жүйелерінің дұрыс жүргізілмегеніне, мердігерлер құрылысты сапасыз тапсыратынына жиі шағымданады. Осындай кемшіліктерді облыс басшылығы мен жауапты органдар дер уақытында анықтап, Үкіметке жеткізбей шешіп тастап отыруы керек деп санаймын. Негізі соңғы жылдары ауыл халқының тіршілік нәріне қолжетімділігі айтарлықтай өскенімен, кейбір жүргізілген жобалардың шикілігі көңілге қаяу түсіреді.
Ауылда туып-өскендіктен, қалада тұрсақ та елдің жағдайына алаңдап отырамыз. Қазір, міне, шаруалар ала жаздай еңбегінің жемісін көретін шақ. Өкінішке қарай, көп жерде ауылшаруашылық өнімдерінің бағасын делдалдар тым көтеріп жіберетіні, өзіміздің көкөнісіміз бен картобымыз өңделмей, сыртқа арзан бағаға тонналап сатылып кететіні қынжылтады. Өңірге өңдеу өнеркәсіптері ауадай қажет. Осы мәселелердің түйінін тарқатуға Қасым-Жомарт Кемелұлы көңіл бөлсе екен деген тілегіміз бар.
Кездесу соңында алдағы президенттік сайлаудың әділ әрі ашық өтетініне Мемлекет басшысы ретінде кепілдік бере келіп, елімізде жүргізіліп жатқан реформалардың әлеуметтік негізін қалыптастыратын қоғамдық-саяси күштердің ірі коалициясының атынан сайлауға қатысқаным дұрыс болады деп түйіндегені де Президентіміздің кемел ойлай білетіндігін дәлелдесе керек. Меніңше, туған халқының жағдайымен санасқан ел басшысы бір ғана саяси күштің, бір ғана партияның бағыт-бағдарымен жүрмеуі керек. Сондықтан өз басым Қасым-Жомарт Тоқаевтың бұл ұстанымын, оның біздің облысқа қатысты айтқан басымдықтары мен тапсырмаларын толық қолдайтынымды айтқым келеді.
Ғалымбек ЖҰМАТОВ,
жазушы, «Құрмет» орденінің иегері
Павлодар облысы
