Облыстағы егін жинау науқанын қорытындылаған «Алтын дән» салтанатты іс-шарасында облыс әкімі Нұрлыбек Нәлібаев еңбеккерлерді марапаттап, шаруалардың еңбегіне жоғары баға берді.
– Еліміздің күрішке деген қажеттілігінің 90 пайызын біздің облыс диқандары өтеп келеді. Жыл сайын 100 мың тонна көлемінде экспортқа шығатын өнімге шет елдерден де сұраныс жоғары. Егіс науқаны басталар тұстағы су тапшылығы талайды дүдәмәлге түсіргені рас. Алайда Мемлекет басшысы Сырдария өзенінің жоғары ағысында орналасқан мемлекеттер арасындағы келіссөздер тиімділігіне баса назар аударып, соның нәтижесінде су көлемі былтырғыдан көбейді. Бұл ретте диқандардың ұсыныс-тілектері ескеріліп, күріш алқабы 78 600 гектар көлемінде қалдырылды.
Күрделі жағдайға қарамастан күріштің әр гектарынан 70 центнерден аса өнім алған «Ақтөбе и К», «Жаңажол», «Абзал и К», «Мағжан и К», «Ақжарма и К», «Ақжарма – 1» жауапкершілігі шектеулі серіктестіктерін ерекше атап өтуге болады. Сондай-ақ күріштің әр гектарынан 90-100 центнерден өнім алған диқандарымызды мақтан тұтамыз.
Қамбамыз дәнге, қорамыз малға толып, халқымыздың құт-берекесі арта берсін, – деді облыс әкімі.
Су тапшылығына байланысты облыстағы күріш көлемін азайту туралы пікірлер арагідік болса да айтылып қалады. Бірақ бұл – өңірдегі негізгі саланың дамуын кідірістетіп, салада жұмыс істеп жүрген мыңдаған адамды нәпақасынан айыру деген сөз. Күріш егілмеген алқаптың сор басып, ештеңеге жарамсыз болып қалатыны тағы бар. Тұқым мен тыңайтқыш қат болып, техника талан-таражға түскен тоқсаныншы жылдар тәжірибесі осыған көзімізді жеткізді. Дегенмен, әлемдегі су ресурстары тапшылығы көзқарасымызды өзгертуі керек. Мұның алғашқы қадамы су үнемдеу технологиясын енгізіп, күріштен басқа дақылдарды тамшылатып, жаңбырлатып суару көлемін ұлғайту болып отыр.
Биыл қазалылықтар 87 гектар жерге егілген жүгеріні жаңбырлатып суарып, тың тәжірибені қолға алды. Облыста алғаш рет түрік компаниясымен бірлесіп 13,8 млрд теңге болатын қызанақ пастасын өндіретін зауыт салынады. Өндіріс жылына 24 мың тонна қызанақ пастасын шығарады. Оған қажетті өнім де жаңа технология арқылы өсіріледі.
Осы жылы өңір шаруаларының бақша өнімдерін егуіне де мүмкіндік жасалды. Облыс әкімінің тапсырмасына сәйкес ірі шаруашылықтар ауылдарға 10-15 гектардан жер дайындап, 6 802 отбасы 1 833 гектарға дән тастады.
Диқандар мерейін асырған салтанатты іс-шарада ауыл шаруашылығы саласына елеулі үлес қосқан Жарылқасын Шәрiпов пен Имамзада Шағыртаевқа «Қызылорда облысының құрметтi азаматы» атағы табыс етілді. Бірқатар сала қызметкері облыс әкімінің құрмет грамотасы, Ауыл шаруашылығы министрлігінің «Еңбек ардагері» медалі мен «Ауыл шаруашылығы саласының үздігі» төсбелгісімен марапатталды.
Топ жарған озаттар қатарында «Мағжан и К» ЖШС үздік еңбеккерлеріне «Lada Vesta», «Жаңажол», «Ақжарма и К» қожалықтары шаруаларына «Lada Granta» автокөліктерінің кілті табысталды. «Таң ЛТД» ЖШС мен «Ақжар» шаруа қожалығының озаттары «Chevrolet» автокөлігін тізгіндеді.
Аудандар арасында «Ауыл шаруашылығы өнімдерін өңдеу саласы» аталымы бойынша Қазалы ауданы марапатталса, «Мал шаруашылығы» саласы бойынша Арал ауданы үздік шықты. «Егін шаруашылығы» аталымында Шиелі ауданы жеңімпаз болып, «Агроөнеркәсіп кешенін дамытуда ең жоғарғы көрсеткіштерге қол жеткізген үздік аудан» атағы Сырдария ауданына бұйырды. Сахна төріне шыққан озат шопан, диқан, комбайншы, агроном, бригадирлерге көп алдында құрмет көрсетілді.
Салтанатты жиынды жергілікті өнерпаздар жалғастырып, дала еңбеккерлерінің құрметіне мерекелік концерт қойылды.
«Алтын дән – 2022» мерекесі аясында облыс орталығында ауыл шаруашылығы жәрмеңкесі ұйымдастырылып, аудандар мен Қызылорда қаласының шаруалары тұрғындарға өз өнімдерін базардан 15-20 пайыз арзан бағада ұсынды.
Облыс әкімі сауда қатарларын аралап, халықпен пікірлесті. Облыста дәстүрлі түрде ұйымдастырылатын мұндай шаралардың азық-түлік бағасын ұстап тұруға тигізер септігі мол. Ала жаздай атыз жаңалаған еңбекші жұрттың маңдай терінің өтеуіне айналған жәрмеңкеге асыққан жұрттың қатары қалың болды. Әсіресе Аралдың балығы мен Жалағаштың ақжарманы, Сырдарияның бал татыған қауыны мен Жаңақорғанның брендіне айнала бастаған қарбызы демде алушысын тапты. Қазалының кәмпитін, Қармақшының шұбат-қымызын, Шиелінің картобын көптеп алып жатқандар байқалды. Қызылорда қаласының шаруалары бұл жолы ет өнімдерін жеткізді.
Облыс орталығында жүйелі өтетін жәрмеңкелерде Қызылорда қаласы мен аудандарының тұрақты орындары бар. Бұл жолы «Тағзым алаңындағы» Қызылорда қаласының сауда қатарларына 80 жүк көлігімен 300 тоннаға жуық өнім әкелінді. Журба көшесінің бойында қармақшылық шаруа қожалықтары өз өнімдерін ұсынып, 74 жүк көлігімен әкелінген 240 тоннаға жуық өнім сатылды.
Титов қыстағына жалағаштық кәсіпкерлер 85 жүк көлігімен 250 тонна ауыл шаруашылығы өнімдерін жеткізді. Мұнда картоп, жуадан бөлек, асқабақ пен бақша өнімдерін базар бағасынан арзанға алған тұрғындар риза болысты.
Жанқожа батыр көшесінің бойына Сырдария ауданынан 87 көлікке тиелген азық-түлік тауарлары апарылды. Алпыс тоннадан астам күріш, дәл осы көлемде картоп, 45 тонна сәбіз, 40 тонна пияз, 90 тонна қауын мен қарбыз, 25 тонна асқабақ және 30 бас тоқты жеткізілді.
С.Торайғыров көшесіне аралдық шаруалар 60 жүк көлігімен 170 тоннаға жуық азық-түлік жеткізді. Теңізді ауданның кәсіпкерлері облыс орталығы тұрғындарына мұздатылған балық өнімдері, ас тұзы, ет, құрт, ірімшік, 500 литр шұбат пен 60 бас қой әкелді.
Қазалылық еңбеккерлер жәрмеңкеге 70 жүк көлігімен 150 тоннаға жуық өнім алып келді. Аудан өнерпаздары жәрмеңкеге жеткен жұртшылыққа әсерлі көңіл күй сыйлап, тоқшылық тойын думанға бөледі.
Астана даңғылының бойында жаңақорғандық шаруалар жәрмеңке жайды. 82 жүк көлігімен жеткізілген 300 тонна өнім арзан бағада саудаланды. Ал Шиелі ауданы диқандары 260 тоннадай ауыл шаруашылығы өнімдерін сатты.
Облыс әкімі қала мен аудан әкімдеріне және ауыл шаруашылығы басқармасының басшысына азық-түлік бағасын төмендетуге мүмкіндік беретін жәрмеңкелерді жыл соңына дейін әр апта сайын тұрақты түрде ұйымдастыруды тапсырды.
Республика күніне орай «Алтын дән – 2022» мерекесі аясында атшабарда аламан бәйге өтті. Дода биыл ұлттық ат спортының 4 түрінен ұйымдастырылып отыр. Оған жергілікті атсейістер баптаған жүйріктерден бөлек еліміздің бірнеше облысынан арнайы келген азаматтар сәйгүлігін қосты.
Бес шақырымдық тай жарыс пен 11 шақырымға созылған құнан бәйгенің жүлделері жергілікті жүйріктерге бұйырды. Топ бәйгеде жамбылдық шабандоз Асылжан Назар мінген сәйгүлік көмбеге бұрын жетті.
Аламан бәйге жүлдесі жалағаштық Ержан Әлиханға бұйырды. Шабандозға 4 млн теңгенің сертификаты табысталды.
Жомарт күздегі еңбек мерекесі Сыр бойында осындай салтанатпен атап өтілді.
ҚЫЗЫЛОРДА
