Ұлттық экономика министрі Әлібек Қуантыровтың хабарламасында есепті кезеңде республика экономикасының өсу қарқыны 2,8%-ды құрағаны айтылды. Салалар арасында ауыл шаруашылығы – 6,9%, ақпарат және байланыс – 6,7%, құрылыс – 5,1%, көлік және қоймалау – 4,8%, өңдеу өнеркәсібі – 4,6%, сауда – 4,3% және тау-кен өнеркәсібі 0,1%-ға артып, оң динамика көрсеткен.
Тоғыз айды саралаған министр Қызылорда облысы негізгі капиталға салынған инвестиция бойынша жоғары өсім көрсеткенін атап өтті. Есепті кезеңде инвестиция тарту көлемін 24%-ға ұлғайтқан облыс республикада көш басында тұр.
«Өңірлер арасында ең жоғары көрсеткіш Қызылорда, Алматы және Ақмола облыстары мен Алматы, Шымкент қалаларында байқалды», деді Ә.Қуантыров.
Есепті кезеңде өңірде құрылыс жұмыстарының көлемі – 35,1%, инвестиция тарту – 24,%, пайдалануға берілген тұрғын үйлер көлемі – 3,5 % және сауда көлемі 2,3 пайызға ұлғайған. Бұл өңірде қолға алынған бастамалардың нәтижелілігін көрсетеді.
Үкімет отырысында берілген шағын және орта бизнесті дамыту үшін қолайлы жағдай жасау, кәсіпкерлік бастамаларды қолдау, жаңа жұмыс орындарын құруды ынталандыру бойынша нақты шараларды пысықтау, сондай-ақ бюджеттен қаржыландырылатын инвестициялық және инфрақұрылымдық жобалар бойынша қаражатты толық әрі тиімді игеруді қамтамасыз ету тапсырмасына орай облыс әкімі Нұрлыбек Нәлібаев жиын өткізіп, аймақта мұнай өндірісі азаюы салдарынан төмендеген өнеркәсіп саласынан бөлек макроэкономикалық өсім қалыптасқанын атап өтті.
Биыл 9 ай ішінде небәрі 3 млн тонна мұнай өндірілген. Бұл өткен жылдың осы кезеңімен салыстырғанда 191,8 мың тоннаға аз. Жыл сайын қоры сарқылып келе жатқан «қара алтынға» байланып қалмай, экономиканы әртараптандыру бағытындағы бастамалар нәтижесінде осы кезең аралығында өңдеу өнеркәсібіндегі өсім 8,6 пайызды құрады. Жыл соңына дейін облыстың ірі кәсіпорындары өндіріс көлемін арттыра түседі.
Өңірде уран өңдеумен айналысатын «Байкен-У» ЖШС – 15 %, ас тұзын өндіретін «Аралтұз» АҚ – 50 %, мұнай саласына қажетті полиэтиленді құбырлар шығаратын «КНК Кемикал» ЖШС өнім көлемін 60 пайызға ұлғайтпақшы.
Өңдеу саласын дамытуға бағытталған Индустрияландыру бағдарламасының үшінші бесжылдығы аясында өңірде жалпы құны 654 млрд теңге болатын 46 жоба бойынша жұмыс жүргізіледі.
Облыс басшысы қала әкімі Асылбек Шәменовке кәсіпкерлік және өнеркәсіп басқармасы мен статистика департаментімен бірлесіп өндеу өнеркәсібі бағытында жыл қорытындысында межелі көрсеткіштерге жету үшін жұмыс жүргізуді тапсырды. Сондай-ақ ауыл шаруашылығы өнімінің нақты көлемі бойынша Жалағаш ауданының әкімі Асқарбек Есжановқа да тиісті міндет жүктелді.
Жиын соңында өңір басшысы барлық индикаторлық көрсеткішті жоғары деңгейде ұстап, кәсіпкерлік нысандар ашу арқылы халық табысын көбейту, жаңа жобаларды дамытып, инвестиция тарту қарқынын әлі де күшейту қажет екенін еске салып, қала, аудан әкімдері мен басқарма басшыларына бірқатар нақты тапсырма берді.
Қызылорда облысы
