Коллажды жасаған Амангелді Қияс, «EQ»
Жазушы ауылына бет алғандағы көркем табиғат талайды тамсантты. Осындай жерден талантты ұрпақтың қанат қақпауы мүмкін емес-ау дегізеді. Ұлт ардақтыларын, жұрт кісілерін санамаладық. «Жаратылдым топырағыңнан, сен – түбім, Жалғаны жоқ бәрі сенен жан-тәнім. Сенен басқа жерде маған қараңғы, Жарық болар Шолпан, Айым, мен – Күнім», деген Мағжан ақын, «...туған жер, туған ауыл алыстаған сайын, мен оларды сағына, аңсай түстім...» дейтін Сәбит Мұқанов, «Ел деген жетім қозы емес, еміздікпен асырай алмайсың!» деген Ғабит Мүсірепов, «Осы мемлекеттің алтын арқауы, түп қазығы – қазақ! Қазаққа алауыздық жат болуға тиіс», деген Сафуан алдымыздан үн қатып тұрғандай болды.
Қаладағы қапысы кем іске, жол бойындағы керемет көріністерге шаттанған көңіл шіркін, Сафуан ағаның құтмекені, атажұрты Аманкелдіге келгенде нілдей бұзылды. Қираған үйлер үйіндіге айналған. Көшелердің қиюы кеткен. Айтуға ауыз бармайтын бір сұрапыл жайпап өткендей. Осыдан 10 жыл бұрын 110 үй болыпты. Содан қалған жұқана – бір үй. Бұл үй – бабамның жерінде атамнан қалған, әкемнен қалған теңдессіз қазына еді, осы үйде өсіп-өніп едік, – деп, көзінің қарашығындай сақтап келе жатқан жазушының жоқшы ұлы Сайын Шаймерден екен. Қуыс үйден құры шықпаңыздар деп дәм татқызды.
Қаңыраған ауыл шетінде о дүниеліктер жатқан қорым-бейіт қаз-қалпында екен. Көшіп кеткендер көз жұмсақ, бір жерде жатайық деген халықтық қағидамен өмірден озған ағайынды алыс болса да, аянып қалмай әкеліп жерлеу салт-санасынан жаңыла қоймапты. Кіндік қаны тамған топырағы киелі деп білген Сафуан ағамыз да әкесінің жанынан жер алып қойған екен. Адамның айтқаны бола бере ме, ұлы Саянның қасынан топырақ бұйырыпты.
Жақында сол Қызылжар өңірінде он беске жуық ауылдың болашағы жоқ деген дерек айтылды. Ол ауылдар ел картасынан да жойылады деген. Сафуан аға арамызда болса, «болашағы жоқ деген не сұмдық» дер еді-ау деп іштей күңкілдедік. Он жылдың ішінде ойраны шыққан, жазушының ізі өше бастаған ауылын көргенде аттан ауып түскендей күй кештік. «Ой, мұндай ауылдар баршылық», дейді қаумалағандардың арасынан ой бөліскендер. Әшейінде есе жібермейтін қаламгерлер сөйлейтін сөздерінен жаңылып қалғандай. Шашылып жатқан ағаштарға, үйінділерге, үңірейген есік-терезелерге қарағыштайды. Жүректі шымырлатып, көкейді кернеген бұл зар-мұңды кімге жеткізсек екен деген сансыз сұрақ сананы шабақтайды, еңсені езеді. Мұның ақ-қарасын анықтауға шама жеткенше талпыналық, тиісті орындармен тіл айқастыралық, аяқсыз қалдырмалық дейді біріне-бірі. Қиын заманда болашақ үшін деп ауыл тұрғызған жандардың еңбегін еш, тұзын сор етіп, үмітін өшіріп, ауылды жойып, қабірлерді ғана қалқайтып қою қандай ауыр еді деседі, амалдары құрып, айтарлары түгесілген тұста. Осы арада, 1913 жылы жазып кеткен ұлт ұстазы Ахмет Байтұрсынұлының: «Әркім жалғыз өзім демей, өзгелер жайын да ойлап, пейілін кеңге салып іс етпесе, жұрт жұмысы түзелмейді. Жұрт пайдасын аяғына басып, бетімен жайылатындарын қайырып, үйірге кіргізіп отырмаса, бір қойдың қотыры мың қойға жұққан сияқты, бір адамның кесірі мың адамға тимекші», деген сөзі ойға оралып отырғанын қарашы.
Сонымен жарқын болашаққа құлаш сермеген елде, болашағы жоқ ауыл бола ма? Болса себебі не, ертеңгі салдары опындырып жүрмей ме? Қызылжар қызыл көздер көз аларта беретін шекаралы жерде емес пе еді? «Жер, жер және жер. Жерсіз Отан жоқ!» деп бірлік пен теңдікке ұмтылған Алаш арыстары өз әскерін сол Қызылжар жерінде жасақтау идеясын қолға алғаны тарихтан мәлім. Төрт құбыладан жиналып, жиын да өткізген. Ол ұлт болашағының қамы болатын. Сол мәлім тарихты қызылжарлық азаматтар жаңғыртып жатыр екен. Бұл елдік іс дейді. Олар дәл Сафуан туған жерде ұлтым деп білектей бірігіп, мақсатымыз айқын деп, еңсеңді тіктер еңселі ескерткіш тұрғызуды бастап кетіпті. Алда алқалы мәжіліс өткізбекші. Үйренсең – үлгі емес пе?
Иә, қайталап айтайық, болашағы жоқ деп ауылдарды жоюдың арғы жағында не жатыр, астарында не бар? Өз күніңді өзің көрден туған өзімшілдіктен емес пе екен? Әлде «алпауыттар» деп «әспеттеп» жүргендердің жер босатуы ма? Ол жер аумағы тұяқ тоздыратын, қанат талдыратын аз қазаққа кейін қатер төндіріп жүрмей ме? Әуре-сарсаңға салмай ма? Жалпы, аталарымыз «бос жер жау шақырады» деп, ұлтарақтай жерді бос қоймай, атау беріп отырған ғой. Ол бүгінгі таңбалайтын картаның орнына жүрген.
Жойылған ауылдарда тұрған азаматтар кезінде жер үлесін алғаны анық. Олар қазір сол жерінің пайдасын көріп отыр ма? Әсіресе қала жағалап кеткендер. Әлде біреулердің қанжығасында кетті ме? Жойылмаған кейбір ауыл халқының үлесін алдап-арбап үптеп кетіп, кейін жонын көрсетіп, есе бермегендердің айғайы аз естіліп жүрген жоқ емес пе? Ұлтымыз жер дауы мен жесір дауынан тіксінген. Расы керек, бүгіп қайтеміз, күмәні көп. Жер дауы өршіп тұр, жесір дауы тұманды. Біз бұл ойларды біреулерді үркіту үшін емес, жат пиғылдан, жаман әдет өршіп кетпесе екен деп, жыраулар айтпақшы, қауіп қылғаннан қозғап отырмыз.
Жүйкені жұқартып отырған бұл мәселе кешегі жабайы жекешелендірудің, жер жағдайына, барыс-келіске, халықтың тыныс-тірлігіне қарамай, әлемде осылай екен деген тұспалмен жасалған орынсыз, орашолақ реформалардың, қаржыны керекке бермей, орта жолда қақшып кеткендер залалының зардабы деп білеміз. Даламыздың дарқандығына қарамай, дамыған ел тұрғындары қалада тұрады, біз де сөйтеміз деген желбуаздықтың кесірі. Ол кезде қаланың шекесі шылқымай ма еді? Қайта ауылдықтардың аузы аққа тиіп отырған.
Қазақтың қалаға келгеніне ешкім де қарсы емес. Қалаға келгендердің бәрі оңалып кетпегені, әлі күнге төрт керегенің зарын тартып жүргендердің аз емесі мәлім. Ондайлардың кейбірімен тілдессең, ауылға кетер едім, үйім қирап қалыпты, жер жоқ, үлесімді іздестірсем, қолдан-қолға өтіп кеткен дейді. Елден қол үзбегендер біртіндеп барып жатыр. Өйткені ірге көтермей барын місе тұтып отырып қалғандардың, заман ағымын түйсінгендердің қазір өз қолы өз аузына жетіп, қаладағыдай күн кешіп жатқанын көріп жүрміз. Әттең, мақтангерліктің жеңіл буына ере бермей, бір сәт иесіздік етек жайып бара жатқанда ауылдан қотарыла көшпеңдер, ауыл мен қаланы ертең жалғайтын ойлы жастарды ғана жіберелік қалаға, жерді бос қалдырмайық дегенде, болашағы жоқ ауыл сөзін дәл бүгін естімейтін едік.
Қалай десек те, қазақ ел болғанда далақтай бермей, той төріне таласпай қасиетті даласының да, қаласының да иесі болу – парыз ғана емес, бес батпан қарыз болып тұр. Бұл тұрғыдан келгенде, халқы шағын, жері кең шекаралы өңірлерге – тізгін ұстағандар шекеден қарағанды қойып, зеректік танытса, кешегі қателік түзелер еді. Бүгінгідей техникасы жоқ, тұлпарына ғана сенген заманда Қызылжардың Есенейі жерді бос қалдырмаймын, шекараның шебінен табан аудармаймын депті. Ана заманда. Сан сылтауды көлденең тартатын бізге, сондай өршіл рух жетпейтін секілді.
Біз зар заман орнатудан аулақпыз. Бірақ мына дүние мың құбылып тұрғанда ескі сарынға салып «көш жүре түзеледі» деп жағаны жайлау, етекті көктеу етіп көлгірсу опа бермесе керек. Әсіресе Солтүстік өңірде. Болашағы жоқ ауыл деп, қаржы үнемдейміз дегенмен, жерді қайтеміз? Иә, қазір түрлі диқандар бар көрінеді. Аңқылдаған адал қандастар бар екен. Ертең жойылған ауылдарда олардың орнын кім басар екен? Қалаға бауыр басқан қазақ баласы – арба сүйреп жүрсе де, ата-бабамнан қалған жер иесі мен деп бара қояр ма екен? Осыны ойлап көрдік пе? «Дипломмен – ауылға!» дедік. Нәтиже көңіл көншітпеді. Сөз нақты іске ұласпады, ауылға барғандарға жағдай жасалмады, кіші шенеуніктер шіренді, оларға оқыған пысықтан сөзі өтетін сыралғы можантопай тиімді. Алғышарты айқындалмаған жұмыс, солайша құмға құйған судай құрдымға кете бермек. Кетіп те жатыр.
Солтүстікке көш бетін бұру деген жақсы бастама бар. Мұның да толғағы тоқсан түрлі екен. Айтушылардың бір сөзіне құлақ қойсаң, ниет білдіргендер баратын ауылда олар атқаратын қандай жұмыс бар, баласы оқитын мектеп, тұрғын жай, отын-су, дәрігер, тағы басқа мәселелер толық қарастырылған ба, әлде сартап сүрлеумен жәрдем қаржың міне, арғы жағы өзіңе байланысты деп жүрміз бе? Жұмыстың бастысы диқаншылық екен. Оның да қиын түйіндері бірде шешіліп, бірде шешілмейтін көрінеді. Жадыраған жаздан өзге жыл мезгілдері, яғни күздің жауын-шашыны, қыстың кереге қары, адуынды ақ бораны, көктемнің лайсаңы – кімге де болса жеңіл тимесі анық. Байырғы тұрғындар ол туралы күлбілтелемей ашық айтады. Осыдан ба екен, барғандар көп тұрақтай бермейді. Жағдай жасалғанымен ішкі есебі барлар, көмек қаржы қолға тиген соң, сылтауды көбейтіп, бір қаға берісте тайып тұратынын да естідік. Ондайлар ар алдында аяусыз жазасын алар. Ал тәуекелге бел байлағандар, қаны мен жаны ел мен жер дегендер орнығып, алтын астықты сапырып шыға келеді екен. Бұл жұмысты жергілікті жерге ғана теліп қоймай, Астанадағы игілікті іске қатысы бар шенеуніктер болашағы жоқ ауылды тізіп, қаржы үнемдеуді көздемей, өздері жиі дәйекке келтіретін әлемдік үрдісті іске қосып, «Ауыл жылындағыдай» жалған есепке иек артпаса, болашағы жоқ ауыл деген ұлтқа зиянды сөз жойылар еді.
Бір жақсы жұмыс көңілге шуақ құйды. Ол Петропавлдағы жоғары оқу орындарына арнайы бағдармен Оңтүстіктен жастардың көптеп келуі еді. Бітіргендердің 30 пайызы қызметке қала бастаған. Бұған қоса, облыс әкімі арнайы квота тағайындап, жоғары білімнен кейін үш жыл қалып жұмыс істеуді жүктеген. Төрт-бес жыл оқып, үш жыл жұмыс істеген жастың дені қалары хақ. Тек тиісті орындар орныққанша назарда ұстаса болғаны. Ой бөліскен біраз азаматтар ауылға көңіл аударса, жас маманды балапандай баулудағы кеңестік жүйенің жүйелі жағын жаңғыртсақ, ұтылмас едік дегенді алға тартты. Күл шаша бермей, жақсысын алғанның да артығы жоқ шығар.
«Әрбір халықтың ұлттық мектебі – сол халықтың күллі ұлттық мәдениетінің негізі, тіпті тұғыры! Ұлттың тілі, әдебиеті, өнері сол ұлттық мектепте жасалып қалыптасады. Олай болса, ұлттық мектеп – сол ұлттың өмірі, өмір сүру кепілі!» деген, шығармаларында атажұртын Қызылжар деп жасқанбай жазған Сәбит Мұқановтың Ақжол ауылындағы 9 жылдық мектепте 20 бала білім алса, биыл 2, 7, 9-сыныптарда оқитын бала жоқ екен. 29 отбасы қалған. Сонда көрнекті жазушы ауылының да болашағы жоқ деген сөз. Қаламгердің келісті музейінің «күні» не болмақ? Сән салтанатымен тұрған ғимарат киіз үй емес көшіріп, қондыра салатын. Ондай үй салу оңай бола қоймас. Музейдегі мұра шашылып қалмаса жарады. Ендеше, жұрт болып жұмылып, ұлт болып ұйысып Ақжолды болашағы жоқтан құтқарып, болашақ ұрпаққа аманаттасақ, қане! Сонда жасау қиын, құрту оңай деген қасиетсіз сөзден құтылар едік.
Ал Ғабит Мүсіреповтің ауылында 80 үй, 60 бала бар екен. Бәрі ертеңгі тірлігімізге тәуелді. Біз кейде болады ғой дейміз. Болады. Бірақ боладыны уақыт күтіп тұра ма? Заманға теліп, түймедейді түйедей жасамайық дейміз. Иненің жасуындай қателікті жан салып болдырмауды ойлайтындарды көргенде, қирап жатқан ауылдар туралы ұлт болып үн көтеру мәселе емес деп кім дау айта алар екен? Темірді қызғанында соқпай «көш жүре түзеледі» деген бос-белбеулік ұрындырумен келе жатқаны анық. Сол анықтан сабақ алмасақ, жер тағдыры бір кездері тығырыққа тірелуі мүмкін. Біз ғана қателеселік, жұрт қателеспесе екен.
Түйіп айтқанда, Сафуан аға ауылына барғанда елім, жерім деген жомарт жандарды көріп марқайдық. Тып-типыл жұртты көргенде көз тұманданды, осы күйге бұл ауыл қалай түсті, адамдары неге тоз-тоз болды екен деп көңіл жабырқады. «Болады» деген жаттанды ақпаратқа илана бермей, өзге ауылдарды да зерттеп, жойылудан құтқаруды зердеден өткізсек қой дедік. Бұл келешектің кемелдігіне, ертең тағы да сан соғып, әттең-ай деп қалмау үшін керек. Артымнан алдым биік болсын деп үмітін үкілеген ұлттың ұрпағы едік қой, дәулетіміз бар, сәулетіміз артар, болашағы жоқ деген сұрқай сөздің орнын жарқын болашақ басар, қаламгердің жапандағы жалғыз үйі 110 үйге жетер, қыл үстінде тұрған Ақжолдың да жолы ашылып, Сәбең өсиет еткен ұлт ұрпағы, үлбіреген ұл мен қыз сыныпқа толар деп өзімізді өзіміз қолпаштадық. Тыңдайтын Үкімет естіп, тілек шешімін тапса, Тәңір жарылқасын дейтін күнге жетіп, бұл күңіреніс жойылар еді, жерге әр де, нәр де кірер еді, бос жер болмай, ауылдар бой көтеріп, ойдым-ойдым көлдердің ақ құсындай ақ шаңқан үйлер сап түзер еді, деп киелі Қызылжардан аттандық.
Сүлеймен МӘМЕТ