Былтыр жергілікті шаруа қожалықтарының иелері 5,5 мың гектарға балтамыр отырғызған болатын. Барлық алқаптан 173,1 мың тонна тәтті түбір жиналды. 2021 жылмен салыстырғанда өнім көлемі 45,8 мың тоннаға артқан. Ал әр гектардан орташа есеппен 415,7 центнерден өнім алынған.
«Жалпы алғанда, Мемлекет тарапынан көрсетіліп отырған қолдау нәтижесінде биыл қант қызылшасы алқабын 10 мың гектарға дейін жеткізу жоспарланған. Сол межеге жетуді басты мақсат санап отырмыз. Бұдан бөлек өңірдің суармалы жерлерінің көлемі 179,2 мың гектарды құрайды. Оның 55,2 мың гектары тиісті нормативтерге сәйкес сумен қамтамасыз етілсе, 47 мың гектар алқап 30-40 пайыз деңгейде қамтылған (қалған 77 мың гектер жер тәлімдік алқап ретінде пайдаланылуда).
Халықаралық қаржы институттары арқылы 35 млрд теңге қаржы бөлініп (13,9 млрд теңге игерілді), 25 мың гектар суармалы алқап қалпына келтірілді.
2022-2024 жылдары 306 су нысанына жөндеу жұмыстарын жүргізіп, 55 мың гектар алқапты айналымға қосу көзделген. Биылдың өнімі үшін күзгі дала жұмыстарын жүргізуге 10 725 тонна арзандатылған дизель отыны бөлінді.
Жалпы, өңірде күзгі дала жұмыстарын қалыпты ырғақпен жүргізуге, қант қызылшасы алқабын ұлғайтуға айрықша назар аударылып отырғанын айта кеткен жөн», деді өңір басшысының орынбасары Қанатбек Мәдібек.
Қант қызылшасын егуді кәсібіне айналдырған шаруалар да жұмыс қарқынын үдете түсуге ниетті секілді.
«Қант қызылшасын өсіру – шаруалар үшін өте пайдалы әрі табысты іс. Неғұрлым ерте ексең, өнім соғұрлым мол болады. Бұл дақыл түрі 5 градус суыққа дейін төзімді. Оның үстіне қант қызылшасын өсірушілерге мемлекеттен жан-жақты қолдау көрсетіледі. Былтыр 900 гектарға балтамыр егіп, әр гектарынан 600 центнерден өнім алдық. Биыл егіс көлемін ұлғайтуды көздеп отырған жайымыз бар», деді «Қызылша жер» ЖШС бас директоры Амангелді Аяғанов.
Деректерге сүйенсек, облыс бойынша жиналған өнімнің 117,1 мың тоннасы қант зауытына өткізіліп, одан 11,1 мың тонна қант өндірілді.
2022 жылы қант қызылшасына берілетін қолдау көлемі тоннасына 30 мың теңгені құраса, оның 15 мың теңгесі қант зауытынан, қалған 15 мың теңгесі мемлекет тарапынан төленді. 80 шаруашылыққа 1 504,3 млн теңге субсидия берілді. Ал 2023 жылы қант қызылшасына берілетін мемлекеттік қолдау 40 мың теңгеге жетеді. Яғни қант зауыттары төлейтін сома – 15 мың теңге, мемлекеттің қолдау қаржысы 25 мың теңгені құрайды.
Шаруа қожалықтарының жетекшілері әр гектардан 800 центнерге дейін өнім алатын жаңа технологияларды қолданса, қант зауыттары жұмысты дұрыс ұйымдастырып отырған барлық шаруаның 65-70 пайызын тұқыммен қамтамасыз етеді. Қант қызылшасы алқабының көлемін арттырудың маңызы зор. Бұл өңірді шикізатпен толық қамтуға мол мүмкіндік береді. Өз кезегінде шет мемлекеттерге тәуелділікті жоюға да сеп болмақ.
Жамбыл облысы
