Құжаттардың ішінде бірегейі – Ақмола қалалық думасының 1874 жылғы 25 мамырдағы Жарлығы. Бұл материалда қалалық кеңес мүшелері жұмыс істей бастағаны көрсетілген. Алғаш депутаттар төрт жыл мерзімге сайланған. Алайда сайлау квота бойынша жасырын дауыс беру арқылы өтіпті. Оның үстіне қалалық кеңес мүшелерінің көпшілігі саудагерлер болса керек. 1891-1916 жылдары аралығында Степан Кубрин деген азамат Ақмола қалалық думасының басшысы қызметін атқарыпты.
«Жергілікті өкілді органның ауысу кезеңі Қазан төңкерісімен байланысты. Жаңа кеңестің құрылуына байланысты қалалық Дума таратылады. 1920 жылы 26 маусымда жұмысшы, шаруа және қызыл әскер депутаттары комитетінің I съезінде Ақмола қалалық атқару комитеті өз қызметін бастады», дейді ғылыми-зерттеу және ақпараттық-түсіндіру қызметінің басшысы Жангелді Бимолдин.
1923 жылдың басында Ақмола қалалық кеңесі, артынша оның бөлімдері құрылады. Осылайша, еліміз егемендік алғанға дейін еңбек етіп, қаланың дамуына зор үлес қосқан.
1993 жылы 9 желтоқсанда «Қазақстан Республикасы халық депутаттары жергілікті кеңестерінің өкілеттіктерін мерзімінен бұрын тоқтату туралы» Заң аясында Ақмола қалалық кеңесін тарату туралы шешім қабылданды. Сөйтіп, 1994 жылы 1 сәуірде Ақмола қаласы мәслихатының аппараты қайта құрылды. Мәслихат сессияларында қала инфрақұрылымын дамытудың экономикалық және әлеуметтік бағдарламалары бекітілді.
Еске сала кетейік, 1993 жылы 10 желтоқсанда «Қазақстан Республикасының жергілікті өкілді және атқарушы органдары туралы» Заң қабылданған болатын. Одан кейін 1994 жылы алғаш рет республиканың жаңа өкілді органдары – мәслихат депутаттарының сайлауы өтті. Содан бері жергілікті өзін өзі басқару органдары мемлекеттік басқару жүйесінде маңызды рөл атқара бастады. Міне, бүгінде олар еліміздегі демократиялық өзгерістерді жүзеге асыруға зор үлес қосып келеді.
