Жұрттың жанайқайы ел «автобан» атап кеткен «Батыс Еуропа – Батыс Қытай» автодәлізінен құмығып шығады. Айға жетпес уақыт бұрын «Шымкент СпецСтрой» ЖШС-ға қарасты қызметкерлер жалақының аздығын айтып дау шығарған еді. Енді «ШымкентСпецКомплекс» ЖШС-ның жұмысшылары айлық мәселесін алға тартып, жанайқайын жайып салды.
Еңбекақының аздығы жүйкесіне әбден ши жүгіртсе керек, жол тазалығына жауапты серіктестік қызметкерлері айлықты 30 пайызға көбейтуді талап етті. Бас көтерген жұмысшылардың уәжіне сенсек, кейінгі уақытта жалақы кешіктіріліп беріліп келген. Ол аз десеңіз, зейнетақы төлемі тоқтаған. Ал қызметкерлер 170 мың теңге еңбекақыны азсынып отыр. Айтуынша, алатын жалақылары жан бағуға жетпейді. Ал атқаратын жұмыс ауқымы аз емес.
Қысқасы, «ШымкентСпецКомплекс» ЖШС қызметкерлерімен өзара келісімге келе алмай отырған секілді. Содан да болса керек, айлықтың мәселесін көтерген отыздан аса жұмысшы қудалауға ұшырадық деп наразылық танытып отыр. Осындайда «Арқа жайлы болса, арқар ауып несі бар» деген мақал еріксіз еске түседі екен.
Жуалы ауданы мен Меркі ауданы аралығындағы республикалық ақылы жолды күтіп ұстаудың мехнаты зор екені айтпаса да түсінікті. Жол бойындағы тазалыққа жауап беретін қызметкерлер тиісті құрылғылармен қамтылуы керек-ақ. Алайда олар қоршау біткеннің қадасын экскаватордың шөмішімен қағып жүрміз дейді. Айтуынша, қажетті құрылғылар жоқтың қасы көрінеді.
«Біздегі қызметкерлер де, жүргізушілер де, механизаторлар да қолмен жұмыс істеуге мәжбүр болып жүр. Ешқандай техника жоқ деуге де болады. Басымызды бәйгеге тігіп, бар деген қауіпті техникалармен жұмыс істеп жатырмыз. Осы мәселеге бас ауыртатын жан табылар ма екен?», дейді жүк көлігінің жүргізушісі Мақсат Әжібаев ашынып.
Деректерге сенсек, авто дәліздің тазалығына жауапты мекеменің ішкі жұмысына «ҚазАвтоЖол» мекемесі араласа алмайтын көрінеді. Жалақыны төлеу мәселесін тапсырыс алған серіктестік өзі шешеді. Ал серіктестік басшылары жалақы берілмейді деген әңгімені жоққа шығарып отыр. Олар әлеуметтік төлем де тоқтамағанын айтады. Әйтсе де, жол жөндеу жұмысында тексерулер орын алатыны мәлім. Тиісті тексерістерден кейін ғана жалақы қызметкерлердің шотына аударылатынын, салдарынан еңбекақының кешігетінін жоққа шығармайды. Белгілісі сол, жұмысшылардың талабы жақын арада орындалмайтын сияқты. Серіктестік жетекшілері еңбекақыны жуық арада өсіру мүмкін емес дегенді алға тартып отыр. Ал өз міндетін тиісті деңгейде орындамаған алты қызметкер жұмыстан босаған екен.
«Қызметкерлердің жұмысын жүйелейтін шеберлердің қателігінен еңбекақы кешіктіріліп беріліп жатыр. Өкінішке қарай, қалған адамдар солардың соңына еріп, жұмыс орнын тастап кеткендіктен, заң жүзінде акт толтырылып, міндетін дұрыс атқармағандар жұмыстан босады. Ол кісілер жұмыстарын әрмен қарай жалғастыруға ниетті болса, серіктестік басшылары оларды қайтадан жұмысқа қабылдауға еш қарсы емес», дейді «ШымкентСпецКомплекс» ЖШС директорының орынбасары Мақсат Құрмантай.
Қалай десек те, автодәліз бойын тазалау жұмыстарының оңай емес екені анық. Қызметкерлер тиісті құрылғылармен қамтылып, уақыт талабына сай еңбек етсе, одан серіктестік басшыларының ұтылмайтыны даусыз. Ал жалақыны көтеру мәселесі жуық арада шешімін таппайды деп қарап отыру қаншалықты ақылға қонымды? Қымбатшылық қос бүйірден қысқан уақытта жұмысшылар да лайықты еңбекақы алуға тиіс емес пе? Бәлкім, серіктестік басшылары бұл мәселені де оңынан шешуге ден қойғаны жөн шығар.
Жұмысшылар көтерген даудан кейін «ҚазАвтоЖол» Ұлттық компаниясының ресми өкілі Ләззат Стамғазиева үн қатқан. Оның сөзінен түсінгеніміз, еңбекақыны көтеру мәселесін, жоғарыда айтқанымыздай, қазіргі кездегі заңнамаға сәйкес жауапты серіктестік басшылығы өзі шешеді. Ал ұлттық компания мен мердігер мекеме арасындағы келісімшартқа қатысты толыққанды тексеру жұмыстары жүргізілмек. Нәтижесі уақыты келгенде жарияланбақ. Қысқасы, жоғары лауазымды тұлғалар араласпайынша, жұмысшылардың жалақысын көтеру мәселесі екіталай болып тұр.
Жамбыл облысы
