Байзақ ауданына қарасты Қостөбе ауылында ашылған жаңа кәсіпорынның жобалық құны 1,7 миллиард теңгені құрайды. Деректерге сенсек, зауыт жылына 12 мың тонна өнім өндіруге қауқарлы екен. «KazStoneBox» ЖШС-ның гофрленген картон өндіру зауыты соңғы нұсқадағы автоматтандырылған қондырғылармен жабдықталғанын да айта кеткен ләзім. Қысқасы, іргесі жаңадан қаланған өндіріс ошағында қызметкерлердің ерінбей еңбектенуіне барлық мүмкіндік қарастырылған.
Жаңадан ашылған өндіріс орнының басшысы Берік Үмітқалиевтің айтуынша, минералды шикізаттан жасалған қаптама шығаратын кәсіпорын посткеңестік елдерде баламасы жоқ шикізат ретінде минералды кальций карбонатын пайдаланатын бірегей өндіріс орны болып отыр.
«Қағаз бағасы жыл өткен сайын шарықтап бара жатқанын көріп отырмыз. Қағаз өндірісіне білек түре кіріскен зауыттар әлем елдерінде де сирек кездеседі. Біздің серіктестік өндіретін өнімнің 75 пайызы тастан жасалатынын айта кеткен ләзім.
Іргедегі Қаратау қаласынан тасымалданатын тасты алдымен арнайы аппаратпен уақ қылып аламыз. Одан кейін полиэтилен, полипрофилен қоспасын араластырып, тиісті құрылғыларға салып қағаз дайындауға көшеміз. Кәсіпорын өндірген өнім суға, ылғалға төзімді болуымен айрықшаланатынын айта кеткен ләзім. Серіктестікте бүгінгі таңда қырықтан астам азамат тұрақты жұмыспен қамтылып отыр. Олардың тынбай еңбектенуі үшін басшылық тарапынан барлық жағдай жасалған. Қызметкерлер тегін түскі аспен қамтылған. Оларға арналған арнайы асхана да бар», дейді кәсіпорын басшысы Берік Үмітқалиев.
Серіктестік басшысының айтуынша, Қытайдан әкелінген жаңа құрылғыларды қалай пайдалану керектігін білікті мамандар жергілікті жұмысшыларға барынша үйретіп жатыр. Енді олар жұмысқа белсене кірісіп, зауыт ісін ілгерілетуге күш салмақ.
Кәсіпорын өндірген өнім Түркістан, Алматы облыстарына жөнелтіледі. Сондай-ақ көршілес Өзбекстан еліне экспортқа шығарылатын болады. Қысқасы, жаңадан ашылған зауыт өніміне деген сұраныс қазірдің өзінде аз емес.
«Қандайда бір істі қолға алмас бұрын білікті мамандардың кеңесіне құлақ түргеннің еш артықтығы жоқ. Біршама уақыт бұрын қытайлық әріптесім Ян На деген азаматтан жұмысты жүргізудің жолдарын сұрап, жаңа бастаманың қыр-сырына тереңінен қанықтым.
Осы бір кәсіпті қолға алып отырған өзге елдердегі кәсіпорындардың жұмысын да хал-қадерімше зерделедім. Нәтижесінде, 2021 жылы несие рәсімдеп, жаңа бір істі қолға алған жайым бар», дейді кәсіпкер өткен шаққа көз жүгіртіп.
Серіктестік басшысы қолға алған істі әрі қарай өркендетуді мақсат тұтып отыр. Ол зауыттан өндірілген өнімді Қазақстан мен Өзбекстан аумағынан тыс өзге де мемлекеттерге экспорттағысы келеді. Алдағы уақытта осы бағыттағы жұмысты ширата түспек.
Зауыт басшысы әуелде 10 мың тонна көлемінде өнім өндірсе, кейінгі жылдары көрсеткішті бірнеше есеге арттыруға бекініп отырғаны қуантады. Оның айтуынша, кәсіпорын қызметкерлерінің табанды еңбегінің арқасында зауыт өндіретін өнім алдағы бірнеше жылдың бедерінде 20-30 мың тоннаға дейін жеткізілмекші. Өйткені өнімге деген сұраныс жыл өткен сайын артып келеді.
Жамбыл облысы,
Байзақ ауданы
