Балалардың игілігіне беріліп отырған орталықтың ашылу салтанатына өңір басшысы Нұржан Нұржігітов, Оқу-ағарту министрлігі Балалар құқығын қорғау комитеті төрағасының орынбасары Батырхан Жолдас қатысып, балаларды қуанышымен құттықтады. Орталықтың ашылу рәсімінде сөз алған өңір басшысы нысанның жыл бойы тоқтаусыз жұмыс істейтінін айтып өтті.
«Президенттің сайлауалды бағдарламасын іске асыру мақсатында өңірде ауқымды жұмыстар атқарылуда. Бағдарлама аясында республика бойынша балаларға арналған 50 сауықтыру лагерін құру көзделгені мәлім. Мемлекет басшысы бірнеше өңірдегі резиденцияны балалардың игілігіне беруді тапсырған еді. Сол тапсырма өңірде орындалды. Нәтижесінде, «Мөлдір бұлақ» оқу-сауықтыру орталығының ашылу салтанатына куә болып отырмыз. Орталыққа келген балалар жаз мезгілінде 12 күн, басқа мезгілдерде 24 күн сауықтыру шараларымен қамтылады. Балалардың болашағы мен денсаулығы – мемлекет алға қойған басты басымдықтардың бірі. Ел ертеңіне үмітпен қарап отырған жас өскіндердің бір парасы осы орталықтың алғашқы қарлығаштарына айналғанымен баршаңызды құттықтаймын», деді Н.Нұржгітов сауықтыру орталығының ашылу салтанатында сөйлеген сөзінде.
Мұнан кейін сөз алған Оқу-ағарту министрлігі Балалар құқығын қорғау комитеті төрағасының орынбасары Батырхан Жолдас, облыстық ата-аналар қоғамдық кеңесінің төрағасы Ринат Нұрақбаев та ізгі лебіздерін жеткізді. Іс-шара барысында жиналғандар концерттік бағдарламаны тамашалады.
Жалпы, өңір жасөспірімдерінің игілігіне берілген орталық 10 гектар алқапты алып жатыр. Мұнда балалардың демалысын жоғары деңгейде ұйымдастыруға барлық жағдай қарастырылған. Нақтырақ айтар болсақ, заманауи құрал-жабдықтармен қамтылған оқу кабинеттері, спорт алаңдары, үйірме бөлмелері бар. Сондай-ақ балдырғандар бес мезгіл ыстық тамақпен қамтылған.
