«Жас ұстаз – 2023» бағдарламасы еліміздің ауылдық жерлердегі біліміне дем берді. 180-нен астам ұстаз туған мектептеріне көтеріңкі көңіл күй, кәсіби шабытпен оралды.
Биылғы «Жас ұстаз – 2023» бағдарламасында ауылда еңбек етіп жүрген табысты жас ұстаздар бас қосты. Олардың барлығы ауылдық білім берудің әлеуетін дамыту аясындағы жобаға қатысып жатқан тірек мектептерде жұмыс істейді.
– Жаңа оқу жылы басталмас бұрын жас мұғалімдердің республикалық форумын өткізудің өзектілігі сонда, олардың әрқайсысы өзінің жеке даму траекториясын білім берудегі әлемдік трендтермен салыстыра алады. Ауыл мектебінде жұмыс істеу – нағыз миссия екенін бәріміз түсінеміз, ал «Жас ұстаз» кәсіби дамудың жаңа кезеңін ашты, – деді делегаттарға Білім беру жөніндегі жаһандық комиссияның Азия хабының комиссары Күләш Шәмшидинова.
Әр форумда «Галстуксіз кездесуге» Оқу-ағарту министрінің келуі дәстүрге айналып барады. Оқу-ағарту министрі Ғани Бейсембаевтың экспромттары қанатты сөздерге айналып, форум делегаттары өздеріне түртіп алды.
Еліміздің бас ұстазының шын жүректен шыққан сөздеріне зал ду қол шапалақтады.
«Галстуксіз кездесудің» екінші күні «Aitas KZ» холдингінің бас директоры, Білім беруді тұрақты дамыту қорының негізін қалаушы Серик Толукпаевтың табыс тарихы форумның барлық қатысушыларын шабыттандырды.⠀
Жүзуден халықаралық дәрежедегі спорт шебері, жасөспірімдердің Бірінші Азия паралимпиада ойындарының жүлдегері Азамат Оразбек, ғалым-зерттеуші, «Mbionics» компаниясының негізін қалаушы, бірегей экзоскелеттің авторы Мәулен Бектұрғанов, «бокстан халықаралық дәрежедегі спорт шебері, халықаралық жарыстардың жеңімпазы әрі жүлдегері, балаларға арналған бокс секциясының жетекшісі Мұхит Амантаевпен кездесуден шабыттанған ұстаздар қаншама рет қол соққанын есептеу қиын.
Олардың әрқайсысын өз замандастарына шабыт пен жігер бере алатын абсолютті мотивациялық көшбасшы деп атауға болады.
Форумда қазіргі кәсіби басымдықтарға арналған тақырыптық алаңдар жұмыс істеді. Атап айтқанда, тиімді жоспарлау, функционалдық сауаттылықты қалыптастыру, эмоционалды интеллектіні дамыту, мұғалім жұмысындағы зерттеулер, оқытудағы саралаулар, бағалау сынды тақырыптар талқыланды.
Форум делегаттары болашақ мектептің ең батыл және шығармашылық үлгілеріне арналған педагогикалық квест ұйымдастырды. Онда олар «Армандағы мектеп – киіз үй болғанда, бұрышқа ешкім тұрмайды» деген қорытындыға келді. Олар Ыбырай Алтынсарин атындағы «Қара шаңырақ», Саммерхилл және Монтессорр, Вальдорф, «Дальтон-план» мектептерін ғана емес, өздерінің манифесттерін де ұсынды.
«Мұғалім жұмысындағы зерттеулер» тақырыбы ұлттық құндылығымыз – киіз үйдің ассоциациясымен керемет ұштасқан болар еді. Форум қатысушылары соның моделінде зерттеу сабағының жоспарын құрастырды. Шұғыла Қалиханова мен Күнсая Утешева өткізген шеберлік сабақта жас ұстаздар зерттеу жұмысын дайындау процесімен танысты. Алаңның тағы бір өзекті тақырыбы – «Өз эмоциямызды басқарып үйренейік». Қызжібек Абдраманова мен Сәуле Журунтаева өзінің және өзгенің эмоциясын оқу, оларды басқару және олардың себебін түсіну жөнінде айтты. Дауыс тембрі, ым-ишара тілі, дене мүсіні, арома-имидж – бұл ұстаздың имиджін қалыптастырып қана қоймай, сабақ атмосферасын құратыны сөзсіз.
«Функционалдық сауаттылықты арттыру» тақырып алаңының тренерлері Қаламқас Абдикаримова мен Талғат Мукутовтардың пікірінше, педагогтің басты мақсаты – білімді тек тәжірибеде емес, өмірде де қолдануға болады. Қазіргі таңда функционалдық сауаттылық анықтамасына дағды мен тәжірибе, талдау және түсіну, стандартты емес өмірлік жағдайлар мен сыни тұрғыдан ойлау ұғымдары кіреді.
Табыс синергиясын құру үшін мұғалім педагогикалық, мазмұндық және технологиялық білімді өз тәжірибесіне қалай кіріктіре алады? Педагогикалық шеберлік орталығының тренерлері Ринат Рамазанов пен Бауыржан Ділманов TPACK Journey шеберлік сыныбында форум делегаттары үшін осы өзекті сұраққа жауап берді.
– Егер біз осы жолды таңдаған болсақ, үздіксіз білім алуымыз керек», – дейді Батыс Қазақстан облысындағы Т.Жароков атындағы Жәнібек орта мектебі орыс тілі пәнінің мұғалімі Жарқын Халияров.
– Менің ойымша, жас мұғалімдердің тәлімгері философ болуы керек, – дейді Солтүстік Қазақстан облысындағы Мамлют мектеп-гимназиясының ағылшын тілі мұғалімі Риза Хамитова.
«Жас ұстаз – 2023» делегаттары форумға бес деген баға қойды. Форум соңында «Сәттілікке ие бол» бірегей лотереясы болды. Онда барлық жеңімпазға Педагогикалық шеберлік орталығынан вебинарларға сертификаттар мен еліміздің барлық мұғалімдері армандайтын Lesson box қорапшасы табыс етілді.
Алғашқы «Жас ұстаз: табысқа апарар жол» республикалық форумы 2022 жылдың тамыз айында Астанада өтті. Содан кейін барлық өңірде аймақтық форумдар ұйымдастырылды.
Сұранысқа ие форумдар Педагогикалық шеберлік орталығының еңбек жолын енді бастаған мұғалімдердің кәсіби дамуы бойынша ауқымды жобаны жалғастырып келеді. Орталықтың online.cpm.kz платформасында «Жас ұстаздың мектебі» ашық онлайн-курсы әзірленді, еліміздің әр өңірінде «Жасампаз жас ұстаз» клубтары құрылды, сондай-ақ «Шамшырақ» алаңы арқылы үздік жас ұстаздардың тәжірибесі таратылады.
– Бірінші «Жас ұстаз: табысқа апарар жол» форумы жас әріптестеріміз әр мектептің стратегиялық ресурсы екенін дәлелдеді. Олар қазіргі таңдағы білім беруге жаңа идеялар мен жаңа шешімдерді енгізеді, балаға қолайлы атмосфера мен цифрлық білім беру ортасын қалыптастырады. Сонымен қатар форум табысқа жету жолында ең креативті және табысты мұғалімдерді біріктіреді. Бүгін біз барлық өңірдегі ауылдық мектептердің атынан қатысатын екінші форумның қатысушылары да жаңа буынның кәсібилігіне сенім ұялататынына қуаныштымыз, – деп атап өтті Педагогикалық шеберлік орталығының директоры Жанбота Кабдыкаримова.
«Жас ұстаз: табысқа апарар жол» – тағы да өзінің символдық атауын ақтады. Екінші республикалық форум елімізде жас мұғалімдердің біліктілігін арттырудың жаңа шығармашылық алаңы құрылғанын растады. Олар қала мен ауылдағы білім арасындағы алшақтықты шынымен де жоятынына бек сенімді.
Келесі жылы «Жас ұстаз – 2023» делегаттары форумнан кейін өмірлерінің қалай өзгергенін және асыл армандарының барлығының шындыққа айналғанын айтып береді.
