Коллажды жасаған – Қонысбай ШЕЖІМБАЙ, «EQ»
Ұлттық қорға қатысты түйткілді Мемлекет басшысы биылғы Жолдауында да айтты. «Ұлттық қордың қаражаты күтпеген сын-қатерлерге тап болған жағдайда қаржы тұрақтылығын қамтамасыз етуге едәуір кепілдік береді. Дегенмен қордағы қаражаттың белгілі бір бөлігін Қазақстанның болашағын айқындайтын стратегиялық жобаларды қаржыландыру үшін пайдалануға болады. Тіпті қазірден бастап соған жұмсау керек. Ұлттық қор әлден-ақ бірқатар ірі жобаны қаржыландырып жатыр. Алайда сол жобаларды іріктеу ісінде жүйелілік жетіспейді. Сондықтан Ұлттық қордың әрбір теңгесі айтарлықтай пайда әкелуі үшін барлық ұсынысқа жан-жақты сараптама жасалуын қамтамасыз ету қажет», деді Президент.
Қаржы министрі Ерұлан Жамаубаевтың айтуынша, биыл қор активі өсімінің тәуір динамикасы байқалады.
«Былтыр мұнайдың орташа бағасы жыл бойы 90 доллардан жоғары болды. Биыл 7 айдың қорытындысы бойынша 80 доллар деңгейінде тұр. Төмендеудің себебі сондықтан (түсімнің төмендеуі – ред.). Әрине, мұндай жағдайда былтырғыдай түсімнің болмайтыны түсінікті. Дегенмен биыл өсім динамикасы жүріп жатыр», деді министр.
Оның сөзінше, жыл басында Ұлттық қор активі 55 млрд-тан аз болған, ал қазір 60 млрд-қа жетіп отыр. Үкімет алдында бұл көрсеткішті 2030 жылға таман 100 млрд долларға жеткізу міндеті бар.
Өз кезегінде Ұлттық банк қор қаражатын АҚШ-тың ұзақмерзімді қазынашылық облигацияларына және тәуекелді активтерге инвестициялауды жоспарлап отыр. Бұл көбірек табыс табуға мүмкіндік бермек. ҰБ төрағасының орынбасары Әлия Молдабекованың айтуынша, қордың жаңа инвестициялары дамыған елдерде шығарылған инвестициялық емес деңгейдегі корпоративтік қарыздарды, сондай-ақ тікелей және жылжымайтын мүлікке инвестицияларды қамтиды. Мақсат – хеджқорларға инвестицияны қосатын «балама құралдарға» 2,5 млрд доллар бөлу. Қор кірістілігін арттыруды күшейту аясында алғаш рет әртүрлі дамушы нарықтағы компания облигацияларына да ақша салынбақ. Осы әрекеттің бәрі 2030 жылға таман қор қоржынындағы актив құнын 100 млрд долларға жеткізу үшін жасалады. 7 жылда жинақты 60-тан 100 млрд долларға жеткізу мүмкін бе?
Бұл орайда мұнай-газ саласының сарапшысы Нұрлан Жұмағұлов Ұлттық банкке былай деп кеңес береді.
«Ұлттық банкке көмек нұсқау, айтайық, Теңізшевройл (ТШО) мұнай үшін экспорттық кедендік төлемдерді (ЭКТ) қайта бағыттауды доғару керек. ТШО роялти орнына ЭКТ төлеп отыр, бұл төлем Ұлттық қорды айналып өтіп, республикалық бюджетке аударылады. Компания келер жылдан бастап мұнай өндірісін жылына 39 млн тоннаға дейін арттырмақ. ЭКТ мөлшерлемесі (80 доллар) кезінде мұнайдың қазіргі бағасы жағдайында ТШО-дан Ұлттық қорға түсетін тікелей түсім 20 млрд долларды құрайды. Өз-өзімізді, анығын айтқанда, өз балаларымызды алдауды қою керек. Ұлттық қорда ақша көп болған сайын, балалардың да жинағы соншалықты көбейеді», дейді сарапшы.
Сарапшы Айбар Олжайдың айтуынша, Ұлттық қор активін 100 млрд долларға жеткізудің оңтайлы тетіктері бар. Тек соны рет-ретімен қолдана алу абзал.
«Қазір Ұлттық қорда 59,1 млрд доллардың активтері бар. Қалған 40 млрд долларды қайдан аламыз? Осы күзде Қазақстан Қашаған дауында соңына дейін барып, инвесторлардан қосымша 13 млрд долларды сілкіп алмақ. Осы жоспар орындалса және ақшаны Ұлттық қорға бағыттасақ, онда активтерді 73 млрд долларға жеткізуге болады. Өз кезегінде Ұлттық банк қордың инвестициялық саясатына өзгерістер енгізді. Бұл бойынша консервативті пассивті инвестициялаудан кетіп, кішкене табысы көбірек жолдарға бет бұрамыз. Бірақ тәуекелдің де сәл артатынын ескеру керек. Бұл енді шеберлікке байланысты. Ұлттық қордың инвестициялық табысы артатыны анық және оның жартысын балалар алады», дейді А.Олжай.
Оның сөзінше, қорды толтырудың басты жолы – одан ақшаны аз алып, көбірек салу. Бекітілген бюджеттік қағидаға сай 2024 жылы қордан алынатын кепілдендірілген трансферт 2,2 трлн теңге болуға тиіс.
«Онда 3,6 трлн қайдан шықты? Үкімет трансферт түрін кепілдендірілген және мақсатты деп екіге бөліп қойған. Мақсаттысына еш шектеу жоқ және ол түрлі манипуляцияға жол ашады. 2022 жылы қорға түскен қаржы алынған ақшадан небәрі 600 млрд теңгеге артық болды. Биыл одан сәл көбірек болуы керек. Біз қыркүйектен жаңа экономикалық саясат күтіп отырмыз. Бірақ ертеңгі бюджетімізді болжап қойдық. Онда жақсы жағына өзгеруге қаншалықты маневр алаңы бар деген сұрақ туындайды. Қор қаржысы тек нақты қайтарымы бар, біздің экономикалық өсімді жыл сайын 10 пайыздан жоғары қылатын әлеуетті жобаларға бағытталуы керек. Ондай әлеуетті жобаны әзірге тек жылыжайлар, логистика, порттар мен теміржолды кеңейту, тауар тасудан көріп тұрмын», дейді сарапшы.
Экономист Мақсат Халықтың айтуынша, елге қайтарылатын шетелдік активтер де басқа қорға емес, Ұлттық қорға аударылуға тиіс. Бұл ретте оның пікірімен Меруерт Махмұтованың да ойы бір жерден шығады.
«Бұған дейін де шетелден қайтарылған активтер Ұлттық қорға аударылған еді (Қазақгейт зерттеуі естеріңізде шығар). Бұл жолы да жаңа қор құрып әуреге түсудің қажеті шамалы. Жыл сайын Ұлттық қордан республикалық бюджетке 9 млрд долларға жуық қаржы аударылып, бюджет шығындары, соның ішінде әлеуметтік шығындарға жұмсалады. Екіншіден, Ұлттық қор активтерін басқару үшін сырттан басқарушылар тартылады. Заң жобасында жаңа қорды (шетелден қайтарылатын активтер аударылатын қор – ред.) басқару үшін сондай жоспар қарастырылып отыр. Сол себепті басқаруға кететін шығындарды шоғырландыру қажет деп санаймын», дейді М.Махмұтова.
Сондай-ақ экономист Ұлттық қор қызметіне аудиторлық есеп жүргізілуі керек деп есептейді.
«Бізге жаңа активтерді өтеу туралы заң жобасы бойынша жаңа қордың аудитін жүргізуге уәде берді. Қайтарылған активтерді қолданыстағы Ұлттық қорға енгізу аудитке жұмсалатын шығындарды оңтайландырады. Мысалы, 2022 жылы Ұлттық қорды тексеру және басқару құны 22 млрд теңге болды. Ұлттық қор құрылған 22 жыл ішінде Ұлттық қордың бірде-бір аудиторлық есебі ресми жария етілген емес. Бізге фискалдық консолидация қажет. Менің ойымша, ХВҚ-ның келесі миссиясы Үкіметке дәл осыны ескертеді», дейді экономист.
Өкінішке қарай, қазіргі уақытта Ұлттық қордың кірістілігі тек мұнайдан түскен табысқа тәуелді. 2022 жылдың қорытындысында мұнай өндіру секторы елдің шоғырландырылған бюджетіне 9 трлн теңге салық түсірген. Бұл – бюджет пен Ұлттық қор еншісіне бұйырған бүкіл түсімнің (21,2 трлн теңге) 42,5 пайызы.
«Егер МӨЗ, мұнай-газ құбырлары, мұнай сервистік компанияларының салық төлемдерін есепке алар болсақ, онда бүкіл түсімнің 50 пайызын мұнай-газ саласы қамтамасыз еткен болып шығады. Ел бюджетін мұнай түсімдерінсіз елестету мүмкін емес. Біз тек бірер жыл ішінде Ұлттық қордағы жинағанымызды тауысып тастар едік. Әрі қарай ойлаудың өзі қорқынышты. Жалпы, тәуелсіздік алғалы елімізде 1 трлн 931 млн тонна мұнай өндірілген. 2001 жылдан бері мұнайшылар Ұлттық қорға 200 млрд доллардан аса қаржы түсірді», дейді сарапшы Нұрлан Жұмағұлов.
«Атамекен» ҰКП төрағасының орынбасары Тимур Жәркенов Ұлттық қор қаражатын пайдалануда басқалай бағыт ұстануға шақырады.
«Егер бюджеттік шығындардың барлық құрылымын қарайтын болсақ, онда шығындардың басым бөлігі білім, медицина жүйесіне жұмсалатынын байқаймыз. Бұл – қалыпты нәрсе. Алайда осы шығындар үшін қорландыру қайдан алынып отыр деген сауал туады. Ақша қайдан келіп жатыр? Қазіргі уақытта бұл ақша – салық түсімдері. Белгілі бір деңгейде шағын және орта бизнестен. Менің ұстанымым бойынша Ұлттық қор қаражатын инвестицияға бағыттау керек. Бірақ бағалы қағаздарға ғана емес. Ұлттық қордан балаларға, жастарға инвестиция жасалғаны жөн: балабақша, мектеп, мұғалім, жоғары оқу орындары дегендей. Ең күшті инвестиция осы дер едім. Сәйкесінше, бюджетті де қазіргіден басқадай құрылымдауға болады», дейді ол.
2024-2026 жылдарға арналған республикалық бюджет туралы заң жобасын таныстырған Қаржы министрі Ерұлан Жамаубаев 2024 жылғы түсім 20,4 трлн теңге деңгейінде болжанып отырғанын мәлімдеді. 2025 жылы – 20,1 трлн теңге, 2026 жылы – 21,2 трлн теңге. Келесі жылы Ұлттық қордан 3,6 трлн теңге трансферт қарастырылмақ. Министрдің айтуынша, аталған қаражат әлеуметтік маңызды және инфрақұрылымдық жобаларға жұмсалады. Олар негізінен – автомобиль жолдарының модернизациясы, жылу, газ және сумен жабдықтау, инженерлік желілерді жөндеу, сонымен қатар «Жайлы мектеп» және «Ауылдағы денсаулық сақтау саласын модернизациялау» жобасы аясында атқарылатын бірқатар әлеуметтік нысанның құрылысы.
2024 жылғы бюджет тапшылығы ішкі жалпы өнімнің 2,6 пайызы деңгейінде болжанады. Ол 2026 жылға қарай 2,3 пайызға дейін төмендемек.
