Кеншілерге көмек
Бүгінде 46 отбасы Бірыңғай жинақтаушы зейнетақы қорынан жерлеуге біржолғы төлем алды. Кәмелетке толмаған әрі 23 жасқа дейінгі жоғары оқу орындарында оқитын балалары бар 20 отбасына асыраушысынан айырылу жағдайы бойынша мемлекеттік әлеуметтік жәрдемақы тағайындалыпты.
Аймақ басшысының айтуынша, мемлекет қаза тапқан кеншілер отбасыларын әрі қарайғы қолдау шараларын атқаратын болады. Өз тарапынан «АрселорМиттал Теміртау» компаниясы 44 отбасына 10 жылдық жалақы төледі. Қаза тапқан кеншілер отбасы мүшелерінің несиелері толығымен өтелді. Мұнымен бірге жұмыс беруші әр отбасы мүшесіне кемінде 18 шаршы метр пайдалы алаң есебімен пәтер сатып алады. 18 жасқа дейінгі балаларға сақтандыру төлемдері болады (оқу кезеңінде 23 жасқа дейін).
«Қазір зардап шеккен төрт адам түрлі медициналық мекемелерде ем алып жатыр. Дәрігерлер олардың жағдайын орташа және жеңіл деп бағалайды», дейді облыс әкімі.
Өндірістегі өсім
Облыстың кейінгі 10 айдағы әлеуметтік-экономикалық жағдайы туралы Е.Қабдулаұлы былай деді.
– Биыл 5 жоба іске қосылды. 380-нен аса адам жұмысқа орналастырылды. Жыл соңына дейін тағы алты жаңа өндіріс ашылады, олардың ішінде тұрмыстық техника мен автомобиль шиналарын шығаратын зауыттар да бар. 1900-ден аса қарағандылық жұмыспен қамтамасыз етіледі, – деді спикер.
Өңірімізде 56 инвестициялық жоба пулы құрылып, 1,5 трлн теңгеге 56 инвестициялық жоба іске асырылып жатыр. Бұл дегеніміз – 13 мыңнан аса жаңа жұмыс орны ашылады.
Өңірде «Saran» индустриялық аймағының дамуы сәтті жалғасып жатыр. Мұнда инфрақұрылым жұмыстары аяқталуға жақын. «Сары-Арқа» және «Saran» өнеркәсіптік аймақтарының аумақтарында болашақ инвесторлар үшін 400 гектарға жуық бос алаң дайындалды.
Өнеркәсіп көлемі 2,8 трлн теңгені құрады. Үшінші жыл қатарынан өңірді дамытуға жеке инвесторлардың инвестициялары ұдайы ұлғаю үстінде. Аталған кезең ішінде облысқа шамамен 641 млрд теңге инвестиция тартылса, оның 86%-ы жеке инвестициялар санатынан.
Сондай-ақ Е.Қабдулаұлы машина жасау, жеңіл және қағаз өнеркәсібі, фармацевтика, қара металлургия өндіріс өрісінің көш басында екенін атап өтті.
Ел рейтингіндегі екінші орын
Қарағанды облысы бизнесті жеңіл жүргізу бойынша ел рейтингінде екінші орынға ие болды. Іскерлік белсенділіктің өсуін облыс әкімі Ермағанбет Бөлекпаев төмендегі сөзімен түсіндірді.
– Шағын және орта бизнес субъектілерінің саны 12,2%-ға өсті. Бұл – 100 мыңнан аса жаңа салық төлеушілер. Яғни белсенді халықтың жарымы десек жарасады. Демек, облыстың әрбір екінші тұрғыны шағын және орта бизнестің екі тізгін бір шылбырын тізгіндеген. Ал шағын және орта бизнес өнімін шығару 1,2 трлн теңгеге жетті, – деді өңір басшысы.
Облыс республикада бірінші болып бөлшек салық мөлшерлемесін екі есе төмендетті. Мұның арқасында өзгеріс енгізілген сәттен бастап салық төлеуші саны алты есе өсіп шыға келген. 900-ден аса кәсіпкер бизнесті қолдаудың тың мүмкіндігін қолдану мәртебесін иеленді.
Ірі компаниялар тарапына қызмет көрсетуге 800-ден аса ірілі-ұсақты бизнес кәсіпорындары жұмылдырылыпты. Бұл – қосымша жұмыс орны. Сәйкесінше алты мыңнан аса тұрғын жұмысқа орналастырылды.
Өңірде кәсіпкерлікті дамытуға бағытталған мемлекеттік бағдарламалар легі табыс арттыруға айтқысыз сеп. Мысалы, жастардың әртүрлі бизнес-идеяларын іске асыру үшін жылдық 2,5% мөлшерлемемен несиені айтпағанда, 365 кәсіпкерге арналған грант мақұлданған. Ұлттық жоба негізінде 212 грант иесін тапты. «Ауыл Аманаты» жобасы бойынша 396 бизнес-жоспар бекітіліп, жыл соңына қарай барлық бағдарлама бойынша бизнесті қолдау жобалар портфелін 5,5 мыңға дейін жеткізу көзделді.
Ұлттық деңгейдегі жоба, бағдарлама және жеке бастамалар есебінен 43 мың жаңа жұмыс орны ашылып, 11 мыңнан аса жас жұмысқа орналастырылды. Уақтылы қабылданған шаралар ауқымы өңірдегі жұмыссыздық деңгейін 4,1%-ға дейін төмендетуге игі ықпал етті. Өзге өңірлер арасында бұл дерек ең төменгі көрсеткіш есебінде тіркелді.
Қарағандыда құрылыс та қарқынды
Қарағанды облысының моноқалалары мен ауылдарында тұрғын үй, мектеп пен заманауи қалыптағы медициналық нысандар бой көтеру үстінде. Нақтылап өтер болсақ, 2025 жылға дейін Қарағанды облысында қосымша 22 мектеп салынып, оның 18-і «Жайлы мектеп» бағдарламасы шеңберінде жүзеге аспақшы. Бұл орайда 10 жайлы мектептің құрылысы басталып та кеткен. Бұған Қарағандыда тағы бір заманауи оқушылар сарайын қосып қойыңыз.
Жыл соңына дейінгі мерзім ішінде 400 мың шаршы метр тұрғын үйді қолданысқа тапсыру межеленіп отыр. Есесіне кезекте тұрғандар саны 700 адамға қысқарады деп күтіліп отыр.
– Біз тек облыс орталығында ғана емес, моноқала мен ауданда да үй саламыз. Өңірде барлығы 392,3 мың шаршы метр тұрғын үй пайдалануға берілген болса, жыл соңына таман осы көрсеткішті 400 мың шаршы метрге жеткізбек ниет бар, – деп жеткізді Қарағанды облысының әкімі.
Тұрғын үймен қамтамасыз ету – өңірдегі басым міндеттердің бірі. «Жас отбасыларға арналған ипотека» бағдарламасын 97 отбасы пайдаланды. Осы орайда 153 несие ресімдеу жоспары тұр. Еске салып өтелік, кенші мен металлург үшін жеңілдетілген ипотеканың өңірлік бағдарламасы жұмыс істейді. Дәл осы тарапта 2 млрд теңгеге 121 ипотекалық несие берілді.
Денсаулық сақтау нысандарын салуға және ауылдық аудандар мен моноқалаларға дәрігерлерді тартуға да жете көңіл бөлініп отыр. Ауылдарда 92 денсаулық сақтау нысаны салынып, оның 14-і осы жылдың соңына дейін аяқталуға тиіс. Балқаш пен Теміртауда орталық ауданаралық ауруханалар ашылады.
Ауылдық жерлерге дәрігерлерді тарту үшін қосымша қаржылық қолдау көрсетіліп, әрбір медицина қызметкеріне 5 млн теңге сомасында қаражат ажыратады. 69 маманымыз шетелде оқудан өтті.
Мұнымен қоса, аймақ басшысы Қарағанды облысында 10 миллиард теңгеге инвестициялық жобалар іске асып жатқанын қоса кетті. Агроөнеркәсіптік кешен аясында 24 жоба табысты аяқталып, бар-жоғы 10 млрд теңгеге 28 инвестициялық жоба бастау алды. 193-ке тарта жаңа жұмыс орны құрылмақ.
Жылу жүйесіндегі жұмыстар
Қарағанды облысы жылу маусымына дайын. Қазіргі уақытта өңірдегі бар энергия көздерінің штаттық режимдегі жұмысы қалыпты. Жылу желілерін салып, реконструкциялау бойынша 17 инфрақұрылымдық жоба жалғасын тапты. Брифинг барысында аймақ басшысы Е.Бөлекпаев тұрақты жылумен қамтамасыз ету бағытындағы жұмыстармен де бөлісті.
Мәселен, Қарағандыда ұзындығы 21,5 шақырым жылу желісін жөндеу әрі жаңғырту амалдары аяқталды. Есесіне 70-ке жуық тұрғын үй мен 13 әлеуметтік нысанды жылумен жабдықтау сапасын жақсартуға мүмкіндік туған.
Ал металлургтер қаласы Теміртауда 28 шақырымға жуық жылу желілері жөнделді. Осының арқасында 500-ге жуық тұрғын үй мен 50 әлеуметтік нысан тұрақты жылумен қамтамасыз етіледі.
Бұған дейін Шахтинск жылу электр орталығында бірқатар түйткілдер туындағаны мәлім еді. Мұнда да негізгі қосалқы жабдықтар, үш қазандық және екі турбина жөнделді. Жылу көзі штаттық режімдегі бірқалыпты жұмыс қарқынына көшті.
Аймақты газдандыру да табысты жалғасып жатыр. Газ тарату желілері 5,5 мың жеке үйге жеткізілген. Қарағанды мен Теміртаудағы үшінші іске қосу кешені бойынша құрылыс-монтаждау жұмыстары аяқталуға жақын. Бұл орайда қос қала тұрғындары арасындағы әлеуметтік осал топтардың баспанасын газға қосу үшін бір реттік төлем бөлінді. Жалпы сомасы – 86 млн теңге. Бұл игі шараға 225 отбасы қол жеткізді. Жеке сектор тұрғындарын газға қосуға арналған пайызсыз қарыздың арнайы бағдарламасының пайдасын жергілікті жұрт жылы қабылдады.
Автобус паркі жаңартылады
Қарағандыда қоғамдық көлікті жаңарту үдерісі үдемесе, кемімеді. Жыл соңына дейін 195 автобус сатып алу межеленсе, оның 187-сі күні бұрын жеткізілді. «Нәтижесінде, Қарағанды маңына қызмет көрсететін автобустардың 50 пайызы жаңартылады», деп атап өтті облыс басшысы. Сондай-ақ биыл 1354 шақырым автожол жөнделді. «Ауыл – ел бесігі» жобасы бойынша 22 ауылдық елді мекенде жол жөндеу жұмыстары сәтті аяқталды.
Сан сауалға жауап
Аймақ басшысы Е.Қабдулаұлының баяндамасынан соң кезек сұрақ-жауапқа келді. Бірнеше БАҚ өкілдері Қарағанды өңіріне қатысты түйткілді мәселелер жөнінде сауал жолдады. Мәселен, Теміртаудағы жылу мәселесі көтерілді. Өз кезегінде аймақ басшысы құрыш қалада жылу құбырын ауыстыру жөнінде қыруар жұмыс атқарылып жатқанын атап өтті. Жол мәселесіне қатысты сұрақтар да қойылды. Балқаштағы қалаішілік жолдардың сапасыздығы сөз етілді. Облыс әкімі туристер қаласында су және жылу құбырлары ауыстырылып жатқанын, 2-3 жылда жұмыс аяқталып, көшелер асфальтталатынын жеткізді. Онымен қоса келер жылы Ақтоғай мен Ақсу – Аюлы арасындағы жолдың да 40 шақырымына жөндеу жұмыстарын жүргіземіз деді. Сонымен қатар Қарағанды облысындағы электр желілерінің 60 пайызы тозғанын, дегенмен бұл саладағы жұмыстар да шешімін тауып жатқанын атап өтті. Алдағы уақытта екінші электр стансасын салу жоспарда барын жеткізді.
Қарағанды облысы
