Алматы Мемлекеттік қуыршақ театры араға 10 жыл салып, қайта жаңғырды. Әлемдік театр сахнасын заманауи бағыттар жаулап жатқан қазіргі уақытта қуыршақ театрына күрделі жөндеу жұмыстарын жүргізу, әрине, ең алдымен заман талабы.
Қазіргі таңда көрермен залдары қойылымдардың сапасын арттырып, мамандардың қолайлы жұмыс жасауына ыңғайлы соңғы үлгідегі заманауи дауыс, жарық, сахна жабдықтарымен жаңарып, театр фойесі көрермендерге жайлы атмосфера сыйлайтын жаңашыл дизайнмен көркемделіп, түрлі үлгідегі қуыршақ түрлері, қойылым эскиздерімен безендірілсе, ғимараттың ішкі интерьері, сыртқы фасады көрермен сұранысына сай жасақталды.
Көрермендердің қойылым тамашалау барысында жайлы демалуына жағдай жасайтын ыңғайлы, жұмсақ орындықтар, жоғары талғамды ішкі дизайн және қойылым барысындағы жарық пен дыбыс құрылғыларының сапасы қуыршақ театрына деген сұраныстың артуына өз септігін тигізері анық.
Жаңа үлгіде жабдықталған театр – шығармашылық және техникалық бөлім қызметкерлеріне жаңа тыныс, тың идеялар, жұмысқа деген ерекше көзқарас, шалқар шабыт, жаңа жобаларға деген қызығушылық сыйлап қана қоймай, кәсіби білікті мамандардың театрда жұмыс істеу сұранысының артуына ықпалы зор.
Балдырғандар қиялына қанат бітіріп, жақсылыққа жетелейтін өнердің алғашқы мектебі – қуыршақ театры жаңа жылды жаңа ғимаратта, жаңа жобалармен қуан-
туға дайын. Алдағы уакытта сүйікті көрермендермен қауышуға асық театр ұжымы бүлдіршіндерге арналған танымдық, тәрбиелік мәні зор, батылдық пен өжеттілікке үндейтін «Етік киген мысық», жасөспірімдерге арналған философиялық терең астарға ие «Шапан» қойылымдарының премьераларын ұсынбақ.
