Фото: gov.kz
Осынау мәселеге Парламент депутаттары не дейді екен? Мұндай заңды қабылдап жіберсе, не болады? Ал бұған жеке кәсіпкерлер әбден қарсы тұруы мүмкін. Себебі жекешелендірілген жерлерінен айырылады.
Жылдан-жылға көбейе түскен автокөліктер мегаполис көшелеріне сыймай барады. Онсыз да көлігін қайда қоярын білмей бас қатырып, ақылы автотұрақтар іздеп жүргендер жетерлік. Бұған қоса тар көшелерден орын таппай жүрген көліктер өз алдына, егер құтқару техникалары, өрт сөндіру, жедел жәрдем көрсету, су құбырларының жарылуы, жоғары вольтті кабельдерді қазып, жедел жөндеу, басқа да апаттық жағдайларда техника қалай өтпек?
Өткен жылдың желтоқсанында Үкіметте өткен жиында жылжымайтын мүліктің бірыңғай мемлекеттік кадастрына қатысты комиссияның жұмысы талқыланды. Сонда біраз кемшіліктің беті ашылды. Онда бөлінген жер учаскелерінің айқын көрініс табуы, жер қорына қатысты барлық ақпаратты азаматтар еркін біліп отыруы керек екені айтылды. Сараптама талдауларының нәтижесінде әкімшіліктер тарапынан цифрлық мәліметтер талапқа сай емесі анықталды.
Ал енді Алматыда қала жолдарын тарылту арқылы веложолдар саламыз деген желеумен ұрлықты заңдастыруға жол беруге бола ма? Егер бұл ұсыныс мақұлданса, депутаттар тарапынан ондай заң қабылданып кетсе, демек бұл бұрынғы заңсыздықты жабудың жақсы амалдары болмақ. Аудан, қала әкімдері, жеке кәсіпкерлер үшін ондай заңсыздыққа жол беруге болмайды. Мұны тиісті орындар тексеруге тиіс. Оған инвесторлар да жол бере қоймас. Өйткені олардың қарауындағы жер аумағы тарылып кетеді.
Онсыз да жаз бойы Алматыдағы таспадай тартылған, еш кемшілігі жоқ, әп-әдемі кең даңғылдарды қайта қопарып, қыруар миллиард шығындалып, кептелісті одан әрі көбейтіп, халықтың жүйкесін жұқартты емес пе? Әп-әдемі жиектастар ауыстырылып, тротуарлар қиратылып, қайта төселді ғой. Енді келіп көлік жүретін көшені тарылтса, не болады? Осының бәрі депутаттардың жіті назарында болуы керек деп ойлаймыз.
Саясат БЕЙІСБАЙ,
Философия, саясаттану және дінтану институтының бас сарапшысы
