![Ұлттық үлгідегі қуыршақтар](/media/2024/08/29/16-betke-1.jpg)
Қазақша киімдегі этно қуыршақтар Ресейдің Киров қаласында біршама уақыттан бері шығарылады. Бүгінде қамзол мен сәукеле киген қыз бен шапан, тақия киген ұл қуыршақтар Ресей дүкендерінде сұранысқа ие. Мұның дәлелі, көптеген дүкеннен қазақы киім киген қуыршақтарды кездестіруге болады.
– Фабрикамыздан бір ғана қазақ ұлттық киіміндегі қуыршақтар емес, өзге ұлттардың киім үлгісіндегі өнімдерді де шығарып отырмыз. Қазіргі таңда қызу жұмыс жалғасын тауып, киімдердің түр-түсі мен тұтынылатын маталарға аздап өзгеріс енгіздік. «Этно» атты топтамамызға өзге елдердің мәдени ахуалымен танысуға, олармен достық қарым-қатынасты нығайтуға бағытталған оқыту жүйесі болғандықтан, арнайы балабақшалардан сұраныс көптеп түсіп отыр. Әрине, балалар үшін қуыршақтар арқылы өзге елдің дәстүрі мен мәдениетіне қанығу әлдеқайда тиімдірек екені даусыз, – дейді ойыншықтар фабрикасының жетекшісі Татьяна Кашина.
Фабрикадан шығатын арнайы 400-ге жуық қуыршақ түрлері болса, олар арқылы 30-ға тарта ұлттық киім үлгілері насихатталып отыр. Жылына өндірістен миллионға жуық өнім шығып, тұтынушылардың қызығушылығы арта түсті. Оның ішінде «Эли» мен «Марат» аталатын қазақша киінген қуыршақтардың бейнесі жақында ғана түбегейлі жаңарудан өткен.
Қуыршақтар фабрикасының бас директоры Ольга Доротюк ұлттық құндылықтардың маңызын атап өтті.
– Қазақша қуыршақтарға қызығушылық білдірушілер үшін жақында жаңа топтамамыздың тұсаукесер рәсімін өткіздік. Олардың ерекшелігі – қазіргі заманауи ұлттық киім үлгілерімен жабдықталған. Елімізде қазақ, өзбек, Кавказ халықтары мол болғандықтан, өнімдеріміз орыс халқына және балалар арасында кеңінен танымал, – дейді ол.
Фабрикада жаңа үлгідегі өнімдерді безендіруге суретшілер мен арнайы дизайнерлер жұмыс жасап отыр. Дәстүрлі қазақша киімдегі қуыршақтарға сұраныс өскендіктен, бүгінде заманауи үлгідегі өнімдердің саны артып келеді.