Суретті түсірген – Жұмабай МҰСАБЕКОВ
Қаншама жылдан бері халықтың уайымына айналған ескі көпір жөндеуге келмейді. Орнына жаңа нысан салынбаса, жаңғыртқанмен кейін бәрібір істен шығатыны анық. Мемлекет басшысының Жетісу облысына жұмыс сапары барысында берген тапсырмасының бірі облыстық маңызы бар автомобиль жолының бойында орналасқан 15 аппаттық көпірді қалпына келтіру болатын. Осы ретте облыс әкімдігі жаңа құрылыстың жобалық-сметалық құжаттамасын әзірлеп, мемлекеттік сараптаманың оң қорытындысын алды.
«Өткен жылы Ескелді ауданының Бақтыбай, Кербұлақ ауданының Майтөбе, Көксу ауданының Жарлыөзек ауылдарында үш көпір салынып, қолданысқа берілді. Ал Сарқан мен Қаратал аудандарында тағы екеуінің құрылысы биылғы жылдың қараша айының соңына дейін аяқталады. Қалған онының құрылысы 2025 жылы басталады», дейді Жетісу облысы Жолаушылар көлігі және автомобиль жолдары басқармасы басшысының орынбасары Айдос Досжанов.
Осыдан бірер жыл бұрын Мұқан Төлебаев ауылының тұрғындары көпір салу мәселесін облыс әкімімен болған кездесуде көтерген еді. Бұл – Мұқан Төлебаев, Шұбартүбек, Үлгі елді мекендерін орталықпен жалғастырып тұрған маңызды өткел. Оған қоса ауыл балалары мектепке осы көпір арқылы барады. Сол себепті де нысанның әлеуметтік маңызы басты назарға алынған.
«Бұл көпір бізді басқа ауылдармен, орталықпен байланыстырады. Көпір арқылы көршілес Шұбартүбек ауылының балалары біздің ауылға мектепке оқуға келеді. Сондықтан бұл – аса маңызды құрылыс. Қаншама жылдан бері ескіріп тұр. Қайта салатынына көңіліміз марқайып қалды», деді Мұқан Төлебаев ауылының тұрғыны Берікбол Шалтаев.
Өңір әкімінің баспасөз қызметінің мәліметінше, аталған көпірде жарықтандыру мен жаяу жүргінші жолы қарастырылған. Қазір құрылыс алаңында 25 маман, 13 техника жұмыс істеп жүр. Сол сияқты Қаратал ауданындағы Көкдала ауылында суару каналынан өтетін жаңа көпір салынып жатыр. Ұзындығы 45 метр болатын өткелдің құрылысы 2023 жылы басталған, бүгінде аяқталуға жақын, қосымша ескі көпірді бұзу жұмыстары жүріп жатыр.
Жетісу облысы
