Мәртебелі басқосуға Түркі академиясының прези-денті Шаһин Мұстафаев, Әдебиет және өнер институты бас директорының орынбасары Эльмира Омарова, сенатор Дархан Қыдырәлі, Серік Негимов, Әділ Ахметов, Сауытбек Абдрахманов сынды зиялы қауым өкілдері қатысты.
Халықаралық Түркі академиясының басшысы Шаһин Мұстафаев мырза іс-шараның маңызына тоқталып, Алаш арыстары Ахмет Байтұрсынұлы мен Мағжан Жұмабаевтың түркі әлеміне сіңірген еңбегін атап өтті.
«Ахмет Байтұрсынұлы қазақ тіл білімінің негізін қалаушы және әліпби реформаторы ретінде түркі дүниесінің рухани дамуына баға жетпес үлес қосты. Оның ортақ түркі терминологиясы мен әдеби тілді қалыптастыру туралы идеялары бүгінде өзектілігін жоғалтқан жоқ. Ал Мағжан Жұмабаев өзінің шығармашылығымен түркілік сананы оятып, түркі әлемінің бірлігін дәріптеген ұлы тұлға. Оның «Алыстағы бауырыма» сияқты өлеңдері – бауырлас халықтар ынтымағының жарқын үлгісі», деді халықаралық Түркі академиясының басшысы.
Сонымен қатар Шаһин Мұстафаев Алаш қайраткерлері көрегендікпен сенген Түркістан идеясының тәуелсіз түркі мемлекеттерінің интеграциясы дәуірінде де өз маңызын сақтап отырғанын атап өтті. Ол биыл қыркүйек айында қабылданған Ортақ түркі әліпбиін Ахмет Байтұрсынұлы мен түркі әлемінің басқа да ұлы ағартушыларының асыл мұраттарының орындалуы ретінде бағалап, мәртебе санайтынын жеткізді.
Түркі академиясының бас болуымен, «ХІХ ғасыр мен ХХ ғасырдың басындағы түркі ағартушылығы: зиялылардың өмірі мен идеялары» жобасы аясында ұлттың өркендеуіне қызмет еткен ойшылдардың өмірбаяндары мен идеялары жинақталып жатыр. Атап айтсақ, келесі жылы Шоқан Уәлихановтың 190 жылдығына орай оның таңдаулы еңбектерін аударып, түрік оқырмандарына ұсынуды жоспарлап отырған көрінеді. Тағы бірі – «Түркі әлемінің тұғырлы тұлғалары» атты жоба. «Бұл жобаның маңыздылығы, жас ұрпақты ортақ құндылықтарды құрметтеуге тәрбиелеу», дейді атқарушы тарап.
Іс-шара соңында М.Әуезов атындағы Әдебиет және өнер институтының өкілі мекеме атынан Түркі академиясының президентіне алғыс хат табыстап, ұлы тұлғалар мұрасын зерттеуге қосқан үлесі үшін ризашылығын білдірді.
