Мәдениет және ақпарат министрлігінің қолдауымен Ұлттық музейде Қызылорда облыстық тарихи-өлкетану музейінің 85 жылдығы аясында «Сыр өңірі – Түркі өркениетінің алтын бесігі» атты көрменің салтанатты ашылу рәсімі өтті.
Іс-шараға Мәдениет және спорт министрлігі Мәдениет комитетінің төрағасы Күміс Сейітова, Қызылорда қаласы әкімінің орынбасары Шахмардан Байманов, елордалық қаламгерлер мен әншілер қатысты.
– Сыр өңірінің рухани жәдігерлерін насихаттау мақсатында 2023 жылы Астана қаласының 25 жылдығына арналған облысымыздың елордада өнер күндері өткізілсе, 2024 жылы Алматы қаласында да Сыр елінің мәдени күндері өткізілген болатын. Өңірлер арасындағы рухани байланысты арттыру, тәжірибе алмасуды көздейтін бұл игі бастамалар бүгінде елордамызда жүзеге асып жатыр. Міне, көрмеге археологиялық қазба жұмысы кезінде табылған экспонаттар, сақ өркениетіне жататын Шірік Рабаттан табылған алтын жапсырмалар, сонымен бірге С.Айтбаев атындағы көркемсурет галереясы қорында сақталған қылқалам шеберлерінің 40-қа жуық картинасы көпшілік назарына ұсынылмақ, – деді Шахмардан Асқарұлы.
Мұнан соң жыршы, термеші, «Дарын» Мемлекеттік жастар сыйлығының лауреаты Күнсұлу Түрікпен «Толғау» термесін орындап, көрерменге Сыр өнерпаздарының мұрасынан шашу шашты. Келген қонақтар көрме залына өтіп, тарихы терең өңірдің этнографиялық бұйымдарын, музей қорындағы теңдесі жоқ зергерлік бұйымдар коллекциясын тамашалады. Сонымен қатар көрмеге тарихи тұлғалар Бұқарбай батыр Естекбайұлының, Қалмұхаммед ишан Маралұлының, Ер Сейітпенбет әулиенің, Сердалы би Бекшораұлының, Құлболды ишан Сұлтанұлының қару-жарақ, мөр, кітап, қолжазба, шежіре сияқты пайдаланған жәдігерлері әкелінген. «Сығанақ ханшайымы» реконструкциясы қонақтардың назарын аударды. Маржан көзді алтын сырғалар, көгілдір ақық көзді цилиндр формасындағы тұмар, тамшы түріндегі түймелер және маржан моншақтардың түпнұсқа коллекциясы, қыш ыдыстар мен глазурлі қаптамалар, әртүрлі құмыралар көрермен көзайымына айналды.
